Presidenti Ilir Meta, teksa ka përshëndetur dorëheqjen e Presidentit të Kirgistanit, pas protestave masive kundër rezultatit të zgjedhjeve të manipuluara, ka përcjellë një mesazh të koduar për kryeministrin Edi Rama.

Në një postim në “Facebook”, Meta teksa shkruan se populli trim i Kirgistanit i tregoi mbarë botës demokratike si rrëzohen regjimet që bazohen mbi shtypjen, shton se autorët e krimeve zgjedhore dhe dhunës kriminale duhet të vihen para përgjegjësisë.

"Përshëndes dorëheqjen e Presidentit të Kirgistanit pas manipulimit të zgjedhjeve të fundit, që nuk u pranuan nga populli i revoltuar me shumë të drejtë. Populli trim i Kirgistanit i tregoi mbarë botës demokratike si rrëzohen regjimet që bazohen mbi shtypjen, manipulimin, oligarkinë dhe poshtërimin e qytetarëve. Autorët e krimeve zgjedhore dhe dhunës kriminale të vihen para përgjegjësisë", shkruan Meta.

Ky reagim i presidentit është pasuar me një përgjigje të menjëhershme nga Rama, i cili nuk ndal akuzat.

Rendit zhvillimet sipas orarit:
Ora 17:06
Presidenca-Ramës: Respekto urgjent 5 qershorin, se le nam! Ti i fute kriminelët në Kuvend, pse ke frikë të përballesh me Metën?

Pasi kryeministri Edi Rama, i ktheu përgjigje presidentit Ilir Meta, duke thënë se krim zgjedhor është edhe përfshirja e presidentit si palë në zgjedhje, duke shtuar se futja e e tij nëpër lokale ku vënë baste ilegale subjektet e OFL për të propaganduar rrëzimin e qeverisë me revolucion, është krim mendor, presidenca regon përsëri me anë të zëdhënësit Tedi Blushi.

Blushi teksa e quan Ramën trendi buburrec, i ka kërkuar që të respektojë 5 qershorin, ku nuk ndal dhe akuzat se sipas tij ka qenë ai që ka futur në parlament kriminelët.

"Buburrec Trendi respekto urgjent 5 Qershorin se le nam dhe dënoi në emër të OSBE-së zgjedhjet e Kirgistanit që ishin si të Shijakut dhe Dibrës. Me Presidentin ti je vite dritë larg. Ishe ti që i fute në Parlament dhe i vendose në krye të Bashkive, kriminelët dhe trafikantët", shkruan Blushi.

Sakaq ai i ka kujtuar Ramës ftesën për përballje në studio me Metën, ndërsa e ka pyetur se përse ka frikë që të shkojë.

"Këtë e di e gjithë bota! Presidenti të ka ftuar në Përballje! Po pret studion televizive dhe orën! Pse ke frikë?! Pse mblidhesh si buburrec e fshihesh pas Tëitterit?! Je aq frikacak sa trembesh edhe nga protestat e popullit në Kirgistanin e largët! Ora e Përballjes po afron! As në skutat e Tëitter-it nuk do fshihesh dot po nuk respektove urgjent Marrëveshjen e 5 Qershorit", shton zëdhënësi i Metës.

Ora 16:43
Rama ia kthen Metës për '5 minuta': Krim zgjedhor edhe përfshirja e presidentit si palë në zgjedhje! Krim mendor futja e tij nëpër lokale ku vënë baste subjektet e OFL

Kryeministri Edi Rama i  ka kthyer përgjigje të ashpër për "5 minuta" presidentit Ilir Meta, sa i përket akuzave për krime zgjedhore.

Në një postim në "facebook" ai shkruan se krim zgjedhor është edhe përfshirja e presidentit si palë në zgjedhje, ndërsa shton se futja e presidentit nëpër lokale ku vënë baste ilegale subjektet e OFL për të propaganduar rrëzimin e qeverisë me revolucion, është krim mendor.

"Ilir, krim zgjedhor në Republikat Parlamentare është edhe përfshirja e presidentit si palë në zgjedhje me thikë në gojë! Ndërsa futja e Presidentit skutave nëpër lokale ku vënë baste ilegale subjektet e OFL për të propaganduar rrëzimin e qeverisë me revolucion është krim mendor", shkruan Rama.