Integrimi/ Ministri gjerman: Reformat po japin fryte. Xhafaj: Negociatat do i përshpejtonin

TIRANE-Ministri i Shtetit për Çështjet Evropiane në Ministrinë e Jashtme gjermane Michael Roth gjatë vizitës në Shqipëri u prit edhe nga Ministri i Brendshëm Fatmir Xhafaj, i cili i konsideroi të shkëlqyera marrëdhëniet me Gjermaninë, duke veçuar ndihmën e përfituar në fushën e rendit dhe sigurisë publike, e për këtë shtoi ai, jemi shumë mirënjohës.

Ministri i Brendshëm e konsideroi me rëndësi mbështetjen e vendeve anëtare për hapjen e negociatave, si një mundësi jo për qeverinë dhe mazhorancën, por si shans për shqiptarët që besojnë në ëndrrën evropiane. Xhafaj tha se çelja e negociatave do të përshpejtonte ritmin e reformave të ndërmarra.

Ministri i Shtetit Roth konfirmoi se vizita në Tiranë e bën më të qartë rëndësinë që i kushton Gjermania, integrimit të Shqipërisë në Evropë. Sipas tij, të gjitha reformat e nisura po japin tashmë frytet. Ministri Xhafaj i theksoi bashkëbiseduesit se është fat për vendin, që ka një avokat të tillë në rrugën evropiane.

LEXO EDHE:
Vuçiç quajti Tajvanin pjesë të Kinës, reagon ashpër Michael Roth: Presidenti serb është zgjatim i Kremlinit dhe Pekinit

Xhafaj e njohu ministrin gjerman me disa nga detajet e reformës në drejtësi dhe rëndësinë për proceset integruese, duke veçuar faktin se ajo tashmë është një model edhe për vendet e rajonit.

Ai prezantoi Dokumentin e Prioriteteve të MB-së në fushën e rendit dhe sigurisë dhe evidentoi kontributin e ekspertëve gjermanë në hartimin e tij. Gjithashtu u ndal tek rezultatet e punës së Policisë dhe agjencive ligj zbatuese në luftën kundër krimit të organizuar, operacionin “Forca e Ligjit”, operacionin ndërkombëtar “Anti-skifter”, si dhe masat kundër kultivimit të kanabisit.

Në përgjigje të interesit të ministrit Roth, Xhafaj shpjegoi hapat dhe ecurinë e procesit të Vetting-ut në Polici, projektin e Policimit në Komunitet, si dhe masat për uljen e fenomenit të azil kërkimit që kanë dhënë rezultate të dukshme që nga vjeshta e vitit të kaluar.

Ministri gjerman zhvilloi takime edhe me Ramën dhe Bashën, ndërsa në javët në vijim pritet që Berlini të japë edhe vendimin nëse do t'i thotë 'PO' hapjes së negociatave për Shqipërinë apo jo. Gjermania, Franca dhe Holanda janë tre vendet skeptike që duhet të binden nga Shqipëria.

TAG:
• fatmir xhafaj
• Michael Roth

Sondazhi i ditës:

Tragjedia në Shkodër, a duhet gratë të denoncojnë çdo formë dhune?

• Po

  91.4%

• Jo

  4.8%

• Nuk e di

  3.7%

Vota total: 3221

• Sondazhi i ditës:

  Tragjedia në Shkodër, a duhet gratë të denoncojnë çdo formë dhune?

  Po Jo Nuk e di