Fondi i SHBA-ve për burgjet, Rama: Mesazh për këdo që dyshon në vendosmërinë tonë

Kryeministri Edi Rama ka falenderuar Shtetet e Bashkuar të Amerikës, për mbështetjen që ka dhënë për reformat që qeveria e tij ka ndërmarrë.

Rasti më i fundit është fondi shtesë që SHBA ka dhënë për regjimin special të izolimit të vazhdueshëm të individëve me profil të lartë kriminal, ose si quhet ndryshe regjim “41-bis”.

Rama shkruan se përfshirja e drejtpërdrejtë e SHBA, me ekspertë të administrimit të regjimit special të izolimit, si edhe teknologji të lartë monitoruese, shënon një hap të madh përpara.

Po ashtu, kryeministri Rama thotë se mbështetja e vazhdueshme e SHBA si dhe fondi shtesë së fundmi, është një mesazh të qartë, për këdo që dyshon në vendosmërinë tonë për ta çuar deri në fund, luftën e paprecedentë që i kemi hapur krimit.

Një ditë më parë, ambasada e SHBA njoftoi se kishte akorduar një fond shtesë prej 920,000 dollarë në mbështetje të programeve të ligjzbatimit në Shqipëri.

Postimi i Ramës:

MIQ TE PERHERSHEM NE ÇASTIN E DUHUR

Në procesin e thellimit të reformës së ndërmarrë nga qeveria, e mbështetjen e shumicës parlametare, e të udhëhequr nga ministrja jonë e drejtësisë, me kurajo e vendosmëri, për regjimin special të izolimit të vazhdueshëm të individëve me profil të lartë kriminal, si edhe për transformimin e sistemit të burgjeve nga një sistem korrupsioni shumëvjeçar, në një sistem penitenciar pa favorizime të paligjshme dhe pa qoka të neveritshme për të dënuarit, nuk na ka munguar në asnjë hap, inkurajimi e ndihma e qeverisë mike të Shteteve të Bashkuara.

Deklarimi i sotëm publik, i pērfshirjes së drejtëpërdrejtë të partnerëve tanë strategjikë, me ekspertë të administrimit të regjimit special të izolimit, si edhe teknologji të lartë monitoruese, shënon një hap të madh përpara dhe përmban një mesazh të qartë, për këdo që dyshon në vendosmërinë tonë për ta çuar deri në fund, luftën e paprecedentë që i kemi hapur krimit.

Mesazhi publik i Ambasadës së Shteteve të Bashkuara:

Një sistem i përmirësuar burgjesh është thelbësor për përpjekjet e vazhduara të Shqipërisë për të forcuar sundimin e ligjit dhe luftuar krimin e organizuar. Më 1 tetor, Shtetet e Bashkuara akorduan një fond shtesë prej 920,000 dollarë në mbështetje të programeve të ligjzbatimit në Shqipëri, duke e rritur totalin e mbështetjes së SHBA në 5.1 milionë dollarë. Ndihma shtesë do të kontribuojë për Planin e Veprimit për Burgjet 2019 të Ministrisë së Drejtësisë, të cilat do të kenë në shënjestër reformat brenda Drejtorisë së Përgjithshme të Burgjeve për të profesionalizuar edhe më tej sistemin korrektiv, përforcuar sigurinë publike, dhe zbatuar masa energjike kundër aktivitetit kriminal të organizuar. Shtetet e Bashkuara mbeten të përkushtuara në mënyrë të palëkundur për t’i mbështetur këto përpjekje dhe për të ndihmuar Shqipërinë që të ndërtojë një sistem drejtësie penale që të jetë i efektshëm dhe transparent.

/r.k./Shqiptarja.com

TAG:
• edi rama
• SHBA