Po pastronte pistoletën pa leje që mbante në banesë, burri vret aksidentalisht gruan në Mirditë! Shoqërohet në polici

LEZHË- Një ngjarje e rëndë është regjistruar mesditën e sotme në Mirditë në fshatin Jezull. Paulin Pacuku 61-vjeç, duke pastruar një armë zjarri pistoletë, të cilën e kishte pa leje, ka qëlluar aksidentalisht bashkëshorten e tij, Vitore Pacuku, 54 vjeçe.

54-vjeçarja është  transportuar me urgjencë në spital nga të afërmit e saj, por si pasojë e dëmtimeve të marra nuk ka mundur që t’u mbijetojë plagëve dhe ka ndërruar jetë në spital. Pas ngjarjes së rëndë 61-vjeçari është shoqëruar në policie, ndërsa arma e zjarrit është sekuestruar në cilësinë e provës materiale.

'Spitali Rajonal Rrëshen ka njoftuar sallën operative të Komisariatit të Policisë Mirditë, se ishte dërguar nga të afërmit e saj, për ndihmë mjekësore, shtetasja V. P., e plagosur me armë zjarri, e cila si pasojë e dëmtimeve kishte humbur jetën.

LEXO EDHE:
Nga Skënderbeu tek Fishta, Bledar Çakalli vizaton muralen nacionaliste në Rrugën e Kombit

Nga verifikimet paraprake të kryera nga shërbimet e Policisë, dyshohet se në fshatin Jezull, Mirditë, në banesë, shtetasi P. P., 61 vjeç, duke pastruar një armë zjarri pistoletë, ka qëlluar aksidentalisht bashkëshorten e tij, shtetasen V. P., 54 vjeçe, e cila është transportuar menjëherë në spital për ndihmë mjekësore, nga të afërmit e saj, por si pasojë e dëmtimeve të marra ka humbur jetën.

Shtetasi P. P. është shoqëruar në ambientet e Komisariatit të Policisë Mirditë, për veprime të mëtejshme procedurale, ndërsa arma e zjarrit pistoletë është sekuestruar në cilësinë e proves materiale. Grupi hetimor, nën drejtimin Prokurorisë së Rrethit Gjyqësor Lezhë, vijon punën në vendngjarje, për zbardhjen e plotë të rrethanave të ngjarjes.'- njofton policia.

M.Q./SI.E./Shqiptarja.com

TAG:
• mirdite