Policia e Tiranës ka arrestuar 22-vjeçarin Erisjaldo Gjuta, nipi i Vladimir Gjutës, pas ngjarjes së ndodhur në hotelin e familjes së tyre ku një 18-vjeçare u plagos me armë zjarri.

18-vjeçarja ishte e dashura e Erisjaldo Gjutës dhe ngjarja e ndodhur ka shumë hije dyshimi nëse ajo është vetë-plagosur apo nëse e ka plagosur dikush tjetër.

“Specialistët për Hetimin e Krimeve kundër Jetës dhe Pronës, në bashkëpunim me Komisariatin e Policisë Nr. 1, kapën dhe ndaluan shtetasin E. Gj., 22 vjeç, i shpallur në kërkim ditën e djeshme për veprat penale 'Moskallëzim i krimit', 'Veprime që pengojnë zbulimin e të vërtetës', kryer në bashkëpunim, dhe 'Mbajtja pa leje e armëve shpërthyese dhe municionit', thuhet në njoftimin e Policisë.

Erisjaldo Gjuta, i dashuri 22-vjeçar i 18-vjeçares që dyshohet se u vetëplagos në hotelin "Gjuta" në Tiranë, ka deklaruar se ka qenë jashtë me të atin në momentin që ka dëgjuar të shtënën e armës.

Sipas tij janë ngjitur me vrap në dhomën ku ishte e dashura, dhe e kanë gjetur të plagosur. Fillimisht kanë tentuar t'i japin ndihmën e parë, por kur kanë parë se gjendja është serioze, kanë vendosur që ta çojnë në spital.

Arma është e Erisjaldos dhe akoma nuk është gjetur. Deri në këtë fazë, Policia nuk ka indicie që ngjarja të ketë dinamik tjetër, përveç asaj të vetëplagosjes. E reja ka tentuar edhe herë tjetër të pres damarët.

Ndërkohë 22-vjeçari i arrestuar nuk tregon se ku e kanë fshehur armën. Ai mban pozita mohuese në këtë drejtim dhe thotë ‘nuk e di’.

Ngjarja është e mbushur me mister, pasi dinamika dhe motivet e ngjarjes janë ende të paqarta. Policia ka arrestuar më herët 2 nga pronarët e hotelit, ndërsa 2 anëtarë të familjes Gjuta janë në kërkim.

Pasi 18-vjeçarja ka mbërritur në spital, policia ka këqyrur kamerat e sigurisë dhe ka zbuluar se ngjarja ka ndodhur të Hotel Gjuta, duke çuar në arrestimin e pronarëve Vladimir Gjuta, xhaxhai i 22-vjeçarit me të cilin vajza kishte raport intim, dhe Mirvete Gjuta, nëna e tij, të akuzuar për veprat penale “Moskallëzim i krimit” dhe “Veprime që pengojnë zbulimin e së vërtetës”.

Në kërkim u shpallën Sajmir Gjuta 49 vjeç, babai i 22-vjeçarit, kushëriri Elvir Gjuta 24 vjeç, si edhe vetë Erisjaldo Gjuta (i kapur sot) të akuzuar për të njëjtat vepra penale “Moskallëzim i krimit” dhe “Veprime që pengojnë zbulimin e së vërtetës”. Mësohet gjithashtu se Mirvetja me Elvirin (nga fisi Gjuta) që kanë dërguar 18-vjeçaren në spital, janë porositur të thonë se e gjetën vajzën të plagosur te 'Rrethi i Ekonomikut'.

Ndërsa ndaj të dashurit të 18-vjeçares, rëndon edhe akuza e “Armëmbajtjes pa leje”, pasi arma me të cilën u shkaktua plaga e 18-vjeçares në gjoks ishte e Erisjaldo Gjutës.