/ATSH/.- Kryeministri i Kosovës, Isa Mustafa, deklaroi sot se vlerëson të drejtën për protesta, greva dhe forma të tjera të shprehjes së pakënaqësive qytetare, por zgjidhjen nuk e shikon duke vrapuar pas tyre, por duke parë shkaqet dhe duke kërkuar zgjidhjet.

Në një postim në rrjetin social Facebook, Mustafa thekson se "e kam të qartë se nuk ndodh rastësisht asgjë, aq më pak që në muajin e parë të mandatit të ballafaqohem me kërkesa për rritje të pagave për 25%, me kërkesë për regjistrim edhe të rreth 1000 të rinjve në UP, me protesta për një deklaratë të ministrit Jabllanoviq, me një vendim të Dhomës së Posaçme të Gjykatës Supreme, i cili krijonte kushte që kombinati Trepça të kaloj në likuidim nga data 2 shkurt. Ndërkaq për këtë rrezik nuk isha informuar as nga AKP, as nga drejtoria e Trepçës dhe as nga njerëzit që kanë qenë përgjegjës për këtë në përbërjen e kaluar të Qeverisë, e tani po i shoh në media me deklarata populliste dhe zgjidhje imagjinare".

"Për fat të keq, fjalori politik që përdoret sot, e që nuk është as i shumicës dhe as i pakicës, është me plotë vërejtje dhe papranueshmëri. Pa marrë para sysh se për kë mendon, nuk është e pranueshme të quash njerëzit egërsira, por po ashtu nuk është e pranueshme ta quash dikë fashist, ta quash kriminel, ta quash vrasës apo t'u drejtohesh njerëzve me gisht në Kuvend se ju duhet të shkoni në burg. Për ti thënë këto, çdonjëri duhet të ketë argumente, fakte. Nuk qëndrojnë faktet në shfrytëzimin e familjarëve të të pagjeturëve dhe të tragjedisë së tyre, nuk qëndrojnë faktet as në shfrytëzimin e minatorëve për të mbuluar bizneset e paqarta që po zhvillohen me pasuritë e Trepçës. Këto biznese nuk mund të mbulohen vetëm duke e shpallur Trepçën kompani publike, ose duke montuar kushte që ajo të falimentoj dhe pastaj të zhduket çdo gjurmë", nënvizon Mustafa.

Kreu i qeverisë kosovare shprehet se "gjërat duhet të sqarohen, dhe unë si njeri i parë i qeverisë e kam detyrë që të angazhohem që ato ti sqaroj. E kemi bërë shumë të qartë se buxheti nuk ka mjete për t'i ngritur pagat dhe as për ndërhyrje tjetër në kontratën kolektive, përveç aplikimit të përvojës së punës, prandaj nuk ka asnjë kuptim që fëmijëve t'u privohet e drejta të mbajnë mësim të rregullt. Para të tjera nuk ka përveç këtyre që janë në buxhetin e vendit. Por, po ashtu, duhet ta them qartë dhe me zë, se pagat e sektorit publik këtu në Kosovën (më të varfër në Ballkan) janë më të mëdha sesa të vendeve të tjera në rajon, të cilat e kanë bruto produktin vendor shumë më të lartë dhe buxhetin shumë më të lartë për çdo banor, por ata nuk po protestojne dhe nuk po orgnizojnë greva".

"Ne mund të bëjmë politikë me pagat, mund të bëjmë politikë me kompanitë publike, mund të bëjmë politikë me institucionet e arsimit, me emocionet për Trepçën, por kjo politikë na qon në falimentim të shtetit. Prandaj shtetin nuk do ta falimentojmë. Dhe, ruajtja e shtetit nga rreziku është detyrë e të gjithë neve", përfundon Mustafa.