MZHU: do zhbllokohen 50% 
e kredive të buta për strehim

TIRANE- Në vitin 2015, Ministria e Zhvillimit Urban do bëjë të mundur aktivizimin e 50% të kredive të buta për familjet të cilat kanë lidhur kontrata kreditimi me Bankën Kombëtare Tregtare. Ky dikaster ka bërë publik programin afatmesëm “Planifikimi Urban dhe Strehimi”, ku thekson se do krijohen kushtet që këto hua të pezulluara të çlirohen, duke krijuar kështu kushtet që familjet të mund të përdorin kreditë e buta për t’u strehuar.

“Të sigurojë kushtet për strehimin e rreth 50% të familjeve që kanë lidhur kontratë kreditimi me BKT-në; të përmirësojë kushtet e banimit për rreth 171 familje Rome dhe Egjyptiane; të rinovojë banesat në bashkëpronësi për rreth 33 apartamente; si dhe të ndërtojë banesa sociale me qira nga të cilat të përfitojnë 76 familje”, parashikon programi i MZHU për vitin 2015, ku paraqitet gjithashtu gjithë shtrirja e tij deri në vitin 2018.