Në Zvërnec, ku prehen eshtrat e
qëndistares së Flamurit Kombëta

Rreth 30 vjet më parë, në seksionin e kulturës, në Komitetin Ekzekutiv të asaj kohe, mbërriti një letër. Një i moshuar nga Kolonja, që prezantohej si i afërm i patriotes Marigo Posio, qëndistares së Flamurit, që u ngrit në 28 Nëntor të vit 1912, shkruante se varri i saj ndodhej në varrezat e Manastirit të Zvërnecit.

“Në letrën e tij, i moshuari këmbëngulte se varri ndodhej në territorin e këtij manastiri. Për t’u bërë më i qartë, ai shkruante se në pjesën e poshtme të varrit gjendej dhe një kryq hekuri i ngulur në tokë”, tregon për ATSH-në një prej funksionarëve të asaj kohe në Vlorë. Ai thotë se, ky fakt u vlerësua menjëherë, aq më tepër që, deri në ato momente, për vendin ku ishte varrosur qëndistarja e flamurit nuk kishte asnjë informacion. Nisën kërkimet dhe shumë shpej u arrit atje ku duhej. “Varri ishte ashtu sikundër përshkruhej në letër dhe në fund të tij u gjet edh kryqi”, tegon ish funksionari, që thotë se pas kësaj, u bë një rregullim i pjesshëm i tij.

Varri ndodhej në juglindje të kishës, në një mjedis të gjelbër. Aty ishte varrosur Marigo Posio, në vitin 1932 kur ndërroi jetë. Ky ishte edhe një nga amanetet e saj, ku përfshihej gjithashtu edhe fakti që, ceremonia të ishte e thjeshtë dhe me sa më pak njerëz.
Në vitet që pasuan, vendvarrimi i Marigo Posios, pothuajse u harrua. Ishin shumë të paktë ata që dinin se ku ishte varrosur ajo. Pas furisë antifetare të vitit 1967, Manastiri i Zvërnecit u braktis përfundimisht dhe shumë gjëra që lidheshin me historinë e tij, u fashitën. Askujt nuk i shkonte ndër mend se nw varrezën e vogël të këtij manastiri, prehej heroina e flamurit të Pavarësisë Kombëtare.

Por edhe pasi u gjet, varri i Marigo Posios mbeti mjaft i thjeshtë. Megjithëse ai u restaurua pjesërisht, pothuajse u braktis. Pak persona, kryesisht funksionarë të asaj kohe, u vunë në dijeni të këtij fakti. Kjo vazhdoi për rreth 15 vjet…

-Një varr i ri për Marigo Posion-

Diku në vitin 2000, vendndodhja ku prehen eshtrat e Marigo Posios, pothuajse doli nga tisi i harresës. Një shoqatë u kujdes që, qëndistarja e Flamurit të kishte një varr dinjitoz. Sot, ai është i dukshëm. Ndodhet në të njëjtin vend ku u gjet 30 vjet më parë, në një pozicion të dukshëm në varrezat e vogla në Manastirin e Zvërnecit.
Vendi është i gjelbëruar. Punonjësit e manastirit kujdesen që ta pastrojnë atë nga barërat e këqia. Ndërkohë, nga lart bëjnë hije qiparisat shekullorë. Nga ky vend duket edhe deti. Vizitorët e shumtë që vijnë në këtë mjedis, afrohen edhe tek vendi ku prehet qëndistarja e Flamurit dhe përkulen me nderim në kujtim të veprës së saj.

Marrë nga//ATSH

Redaksia Online
(Shqiptarja.com)