Naço: Berisha po rrezikon zgjedhjet
s'mund të kthehemi më në ‘96

TIRANE - Deputeti, Nasip Naço shpjegon qëndrimin e grupit parlamentar të LSI lidhur me diskutimet që do të bëhen në seancën plenare ditën e hënë. Ai thotë se do të bëjnë përpjekjen e fundit për të bindur mazhorancën se kjo nismë e tyre është antiligjore. Për Naçon kjo që po ndodh mund të konsiderohet një rikthim i `96.

Të hënën pritet hedhja në votim e kërkesës së mazhorancës për zëvendësimin e anëtarit të KQZ. Çfarë qëndrimi do mbajë LSI?
Në seancën e ditës së hënë, grupi parlamentar i LSI në Parlament do bëjë përpjekjet e duhura për të bindur sërish mazhorancën që rruga e ndjekur prej saj është një rrugë antiligjore, pasi neni 18 i Kodit s’parashikon në asnjë rast shkarkimin e anëtarit siç shprehet PD.

Ne kemi lajmëruar dhe Trojkën për t’u thënë që kjo mazhorancë e ka humbur legjitimitetitn, kjo mazhorancë po rri sot në pushtet me deputetët e PS për të shtyrë dhe këto kohë që i kanë mbetur, por ajo po rrezikon seriozisht zgjedhjet e lira e të ndershme. Nuk është problem i LSI me apo pa anëtar të KQZ, pasi bashkë me të majtën e bashkuar do t`i shërbejë rotacionit politik në 23 qershor dhe sigurisht do ekulibrojë pushtetet e pavarura në Shqipëri.

Rrugët ligjore që do të ndiqen?
Ne kemi kërkuar ndërhyrjen e ndërkombëtarëve përmes një letre që i kemi dërguar Trojkës për gjithë ndërhyrjet parlamentare.

I frikësoheni kësaj lëvizje që po bën Berisha mbi KQZ...?
Kodi Zgjedhor është miratuar me konsensusin e palëve dhe me marrëveshje. Janë votuar edhe anëtarët e propozuar me konensus nga deputetët. Në momentin që janë miratuar në KUvend askush nuk ka të drejtën ligjore të shkarkojë njërin apo tjetrin anëtar. Ky është një precedent i rrezikshëm që kërcënon të zgjedhurit e institucioneve të pavarura.

I bie që ne nesër të fillojmë të heqim nënkryetarin e KLD pasi e ka zgjedhur PD e s’mund të arrijmë deri te Presidenti me këtë logjikë. Është antiligjore, që tregon qartë se PD i ka të humbura zgjedhjet më 23 qershor. Kjo nuk bëri as më shumë as më pak, por bashkoi e unifikoi dhe një herë të majtën, një të majtë të përçarë në këto vitet e fundit.

Mund të themi se ky është një precendet si më `96?
Me apo pa komisionerë, vota do të jetë popullore. Nuk besoj se një apo dy komisionerë të LSI në KQZ apo komisionet e tjera do të ndryshojnë rezultatin e zgjedhjeve në 23 qershor. Berisha është në vëzhgimin e gjithë ndërkombëtarëve. Ne s’jemi vetëm, kemi me vete të gjithë të majtën shqiptare, popoullin shqiptar, por dhe gjithë ndërkombëtarët për zgjedhje të lira e të ndershme në Shqipëri. Nuk mund të kthehemi mbrapa si në viti 1996.

Shkrimi u botua sot në gazetën Shqiptarja.com (print) 14.02.2013

Redaksia Online
(b.m/shqiptarja.com)

TAG:
• kqz