“Hapësira zero” përfaqëson
Shqipërinë në "Venecia 2018" 

Ministria e Kulturës ka shpallur projektin që do të përfaqësojë Shqipërinë në edicionin e 16-të të Ekspozitës Ndërkombëtare të Arkitekturës në Bienalen e Venecias 2018. Projekti fitues është “Hapësira zero” i paraqitur nga Commonsense, Studio/PRGBR Architektur FABLAB, Tirana.

Ky projekt u përzgjodh nëpërmjet një thirrjeje të hapur për projekt-propozime (2 gusht – 3 nëntor 2017), shpallur nga Ministria e Kulturës në rolin e komisionerit të pavijonit të Shqipërisë, në vijim të tre fazave të procesit selektiv, nga një juri ndërkombëtare e përbërë nga: Gëzim Qendro, Bekim Ramku, Simon Battisti, Adelina Greca dhe Arta Dollani.

Anëtarët e jurisë arritën në përfundimin se ky është projekti më i mirë dhe ekipi më bindës për realizimin e suksesshëm të pavijonit shqiptar në Bienale, i cili përmbush kriteret e paraqitura në thirrjen e hapur.

Juria u frymëzua nga lidhja e propozuar nga ekipi midis Venecias dhe Tiranës për të sjellë një pjesë të mjedisit urban të Tiranës në Venecia, një pjesë që Tirana po humbet në procesin e zgjerimit urban / rindërtimit.

Një instalacion që interpreton pozitivisht një fenomen që lind si social, por që përkthehet në një energji plot ngjyra dhe tinguj primordialë do ta përfaqësojë Shqipërinë në Biennalen e 16 Ndërkombëtare të Arkitekturës. Bienalja e Venecias do të mbahet nga data 20 korrik deri më 5 gusht.


(Juria që vlerësoi projektin 'Hapësira zero')

d.c./shqiptarja.com