POP 5

Lajmet më të lexuara të 5 minutave të fundit

Ekonomi

Në 3 muaj 1.6 mld euro në arkën e shtetit, por bien fitimet e biznesit! ‘Financat’: Shpenzimet publike 1.2 mld €

Në tre muajit e parë të vitit janë mbledhur më shumë se 1.6 miliardë euro të ardhura, duke u rritur me afro 76 milionë euro krahasuar me vjet. Ministria e Financave thotë se ndikim kryesor në këtë rritje kanë dhënë tatimet mbi pagat e kontributet. Në këtë periudhë ka rënë aktiviteti i bizneseve dhe nuk u realizuan parashikimet për të ardhurat doganore.

TIRANE- Ekonomia po jep shenjat e para të ngadalësimit, pasi ka rënë ritmi i rritjes së të ardhurave, ndikuar më shumë nga rënia e aktivitetit të bizneseve. Në tremujorin e parë të ardhurat nga tatimi mbi fitimin që lidhet direkt me xhiron e bizneseve ranë me 13.7% krahasuar me vjet. Nga ky zë janë arkëtuar vetëm 18.7 miliardë lekë ose 3 miliardë lekë më pak se viti i kaluar.

Në total në këtë tremujor Ministria e Financave thotë se në arkën e shtetit kanë hyrë 163.8 miliardë lekë ( mbi 1.6 miliardë euro), duke u rritur me afro 7.6 miliardë lekë në raport me vitin e kaluar. Në këtë periudhë të parë të vitit të ardhurat tatimore janë rritur me 11.7% krahasuar me 2023-shin dhe sipas financave kanë arritur në 99.4 miliardë lekë. Peshën më të madhe e kanë mbajtur zërat tatimorë të lidhura me pagat e punësimin.

Nga janari në mars u rritën me 15.5% të ardhurat nga tatimi mbi pagat, dhe arritën në 15.3 miliardë lekë, në këtë pikë ndikim ka dhënë rritja e rrogave në sektorin publik që prej korrikut të vitit të shkuar. Për pasojë janë shtuar edhe kontributet që varen nga rrogat e deklaruara, dhe në tre muaj kontributet e arkëtuara ishin 37.5 miliardë lekë.

Në rritje në këtë periudhë të parë të vitit ishte edhe TVSH-ja, me 17.5 miliardë lekë ose 35.5% më shumë se 3 mujori 2023, e ndikuar edhe prej çmimeve të larta, pasi sa më të larta të jenë çmimet aq më e lartë është vlera e TVSh-së që paguhet.

Kurse të hyrat doganore, për shkak edhe të rënies së çmimeve të mallrave në tregjet e huaja dhe zhvlerësimit të valutave, janë në rënie në këtë tremujor me 0.8% në raport me planin e Ministrisë së Financave, por në rritje krahasuar me vjet.

Nga TVSH-ja në import u mblodhën 34.4 miliardë lekë, 2.1% më pak se plani dhe nga akciza u arkëtuan 13.1 miliardë lekë ose 2.6% më pak se parashikimi. Kurse shpenzimet publike në këtë tremujor u rritën me 5.1 miliardë lekë krahasuar me vjet dhe arritën në shifrën 130.4 miliardë lekë.

K.T./S.G/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    23 Dhjetor, 23:33

    Opozita proteston duke paralizuar 3 orë Tiranën, si e vlerësoni?

Lajme të tjera



×

Lajmi i fundit

Kushtetuesja rrëzon 4 familjarët e ish-zv/kryeministrit Ahmetaj dhe bashkëjetueses së tij, SPAK u sekuestroi prova për hetimin! Zbardhet VENDIMI

Kushtetuesja rrëzon 4 familjarët e ish-zv/kryeministrit Ahmetaj dhe bashkëjetueses së tij, SPAK u sekuestroi prova për hetimin! Zbardhet VENDIMI

25 Dhjetor, 20:33