Zelensky sfidon Putinin: Eja në Kiev për bisedime! Kremlini reagon për armëpushimin: Trump na ka kërkuar të ndalim sulmet deri më 1 shkurt

Foto: Kirill Dmitriev dhe Vladimir Putin

I dërguari special i presidentit rus Vladimir Putin, Kirill Dmitriev, pritet të shkojë në Miami nesër për t'u takuar me zyrtarë të administratës së presidentit amerikan Donald Trump.

 Lajmin e bënë me dije disa burime ruse për Reuters.

Presidenti Volodymyr Zelensky ka thënë se Ukraina zhvilloi një takim "me përparësi të lartë" mbi avancimin e "mbrojtjes ajrore me rreze të shkurtër veprimi kundër dronëve".

Njoftimin Zelensky e bëri përmes një postimi në rrjetet sociale, ku ka shkruar se Ukraina po e forcon ndjeshëm këtë komponent të Forcën Ajrore.

"Ne po e forcojmë ndjeshëm këtë komponent brenda Forcës Ajrore të Forcave të Armatosura të Ukrainës", tha mes të tjerash Zelensky.

Zelensky ka shkruar gjithashtu se është miratuar struktura e një komande të re që do të mbikqyrë këtë fushë të veçantë të mbrojtjes ajrore.

"Ne miratuam strukturën e një komande të re që do të mbikëqyrë këtë fushë të veçantë të mbrojtjes ajrore, së bashku me qasje të reja menaxhimi", shtoi Zelensky.

Zelensky tha po ashtu se mbrojtja kundër dronëve rusë "duhet të përforcohet në qytetet tona" si Kherson dhe Nikopol.

Kryetari i Dhomës së Ulët të Parlamentit në Rusi tha se ligjvënësit rusë po i kërkojnë Moskës që të përdorë armë më të forta për të arritur qëllimet e saj në Ukrainë.

"Deputetët e Dumës Shtetërore këmbëngulin në përdorimin e armëve më të fuqishme, 'armëve të hakmarrjes', për arritjen e qëllimeve të operacionit special ushtarak", ka shkruar Vyacheslav Volodin në Telegram, përcjellin mediat e huaja.

Kina po e mbështet Rusinë në ndërtimin e një rakete të fuqishme hipersonike, që mund të arrijë shpejtësi mbi 8,000 metër/sekondë, sipas një raporti në The Telegraph.

Po ashtu mësohet që kokat bërthamore po ndërtohen duke përdorur makineri dhe mjete të specializuara prodhimi, me vlerë më shumë se 7 miliardë paund.

Rusia e ka përdorur raketën hipersonike Oreshnik, e cila është e aftë të mbajë armë bërthamore, dy herë në Ukrainë, së pari në vitin 2024 dhe për herë të dytë në fillim të këtij muaji, kur goditi një objektiv në qytetin ukrainas të Lvivit, vetëm 40 milje larg kufirit me Poloninë, një vend anëtar të NATO-s.

Por ende nuk është e qartë se për çfarë “armësh” po kërkojnë ligjvënësit në Rusi, që të përdoren në luftën në Ukrainë.

Presidenti Volodymyr Zelensky ka thënë se Rusia nuk i sulmoi objektet energjetike të Ukrainës mbrëmë, pas thirrjeve për një armëpushim afatshkurtër nga Donald Trump.

Sipas mediave të huaja, presidenti ukrainas shkroi në rrjetet sociale se kishte sulme në infrastrukturën energjetike "dje pasdite" në disa rajone dhe Rusia tani i ka zhvendosur sulmet e saj në logjistikë.

"Sulmet me dronë mbi ndërtesat e zakonshme në qytete janë gjithashtu të vazhdueshme", tha Zelensky.

"Një raketë balistike u përdor gjithashtu për të sulmuar Kharkiv, depot e prodhimit civil të një kompanie amerikane u dëmtuan", vijoi më tej Zelensky.

Zelensky tha po ashtu se "shaheedët" goditën Zaporizhian dhe dronë të tjerë goditën rajonin e Khersonit.

Më herët Kremlini tha se Vladimir Putin kishte rënë dakord të ndalonte sulmet në qytetet ukrainase deri më 1 shkurt, pasi "ishte një kërkesë personale nga Presidenti Trump".

Trump tha gjatë një takimi të kabinetit se i kishte kërkuar Putinit të përmbahej nga sulmet me rreze të gjatë veprimi që kanë ndërprerë energjinë elektrike dhe ngrohjen në Ukrainë.

Kremlin

Kremlini tha të premten se presidenti rus Vladimir Putin ka marrë një kërkesë personale nga homologu i tij amerikan, president Donald Trump, për të ndalur sulmet ndaj Kievit deri më 1 shkurt.

Sipas Moskës, kërkesa synon krijimin e një klime të favorshme për negociata paqeje.

Kur u pyet për përmbajtjen e kërkesës dhe përgjigjen e Rusisë, zëdhënësi i Kremlinit Dmitry Peskov nuk pranoi të komentojë më tej.

Ukraina ka bërë të ditur se do të përgjigjet në të njëjtën mënyrë nëse Rusia heq dorë nga sulmet ndaj infrastrukturës energjetike, në një periudhë të shënuar nga temperatura shumë të ulëta.

Ndërkohë, presidenti ukrainas Volodymyr Zelenskyy tha se raundi i ardhshëm i bisedimeve trepalëshe mes Rusisë, Ukrainës dhe Shteteve të Bashkuara, i planifikuar për 1 shkurt në Abu Dhabi, mund të ndryshojë datë ose vendndodhje.

Ministri i jashtëm turk Hakan Fidan

Presidenti i Shteteve të Bashkuara, Donald Trump, po bën përpjekje për t’i dhënë fund luftës në Ukrainë dhe Turqia i mbështet këto iniciativa.

Deklarata u bë nga ministri i Jashtëm turk Hakan Fidan, në një intervistë për Al Jazeera.

“Presidenti Trump po përpiqet t’i japë fund luftës në Ukrainë, një konflikt që ndikon drejtpërdrejt edhe në marrëdhëniet mes Europës dhe Rusisë. Turqia i mbështet këto përpjekje”, tha Fidan.