TIRANE-Kryeministri Edi Rama beson deri në minutën e fundit se Shqipërisë mund t'i hapen negociatat. Kreu i qeverisë shqiptare shprehet se dera nuk është mbyllur, pasi debati mes liderëve të Bashkimit Europian në Bruksel vijon dhe se nesër paradite do të thonë fjalën e fundit. "Gjermania dhe një front i gjerë që mbron idenë se duhen çelur negociatat, dhe nga ana tjetër Franca dhe dy a tre vende që mbrojnë idenë se nuk duhet vazhduar por duhet një qasje e re.

Jemi në kushtet ku as Shqipërisë dhe as Maqedonisë së Veriut dhe as gjë nga ato që kemi bërë apo duhet të bëjmë akoma, nuk kanë asnjë lidhje me atë që po debatohet në tryezën e Këshillit Evropian. Fjala e fundit akoma nuk është thënë do të thuhet nesër paradite. Diskutimi vijon edhe pse qëndrimi i Presidentit francez lë pak dritë, por nuk do të thotë se mbyll derën njëherë e mirë". Por a ka realisht shpresa për nesër? "Përderisa debati në Këshillin e Europës tani që flasim, zhvillohet për këtë cështje do të thotë se nuk ka një përfundim akoma. Gjithçka që kemi bërë edhe pasnesër lidhet me atë që duam për vendin tonë" tha ai për Open.

Presidenti francez Emanuel Macron u shpreh dje se është kundër negociatave aktualisht së pari pasi për momentin, sipas tij nevojitet një reformim i brendshëm i unionit, pastaj të flitet për zgjerimin, ndërsa më pas e vendosi theksin te azilkërkuesit duke thënë se e kishte të vështirë t’u shpjegonte francezëve hapjen e negociatave për Shqipërinë, kur ky shtet është i dyti në Francë për numrin e azilantëve. Por kryeministri Rama rrëfen bisedën me Presidentin e Francës lidhur me këtë cështje. "Nuk e di çfarë prisni ju, kur ai i flet elektoratit francez në funksion të asaj që lidhet me ata. Nuk ka lidhje fare dhe këtë ia kam thënë, liberalizimi i vizave me negociatat.

Ky është një qëndrim që nuk ka lidhje fare me cështjen e liberalizimit të vizave dhe negociatat. Cështja e azilantëve që stërzmadhohet në Francë ka të bëjë me regjimin e trajtimit e atyre që kërkojnë azil. Shqiptarët kërkojnë azil politik për arsye ekonomike. Këtë problem e kishte Gjermania, por duke krijuar një regjim trajtimi shumë më të shpejtë ka rënë në minimum. Është e padrejtë që Shqipërisë ti kërkohet të mbyllë kufijtë e vet. E kam bërë unë këtë debat drejtpërdrejtë me presidentin e Francës dhe nuk e di unë, çfarë prisni ju të thotë ai kur i flet elektoratit francez. Unë di këtë, që nuk ka lidhje fare liberalizimi i vizave me negociatat" tha ai.

Por si qëndron e vërteta e tentativës për ndarjen e Shqipërisë nga Maqedonia për vendimin, që u rrëzua? "Kancelarja e Gjermanisë nuk ka qenë kurrë për ndarjen, por spektri është shfaqur në Berlin në 6-mujorin e parë, kur këtu u bë nami dhe u fus në mes e gjithë balta që u hodh në Berlin përmes linjës partiake, që ne arritëm ta filtrojmë" tha Rama duke akuzuar opozitën shqiptare. Më pas kryeministri u ndal te dy kushtet e Berlinit, ngritja e gjykatave dhe reforma zgjedhore. "Reforma Zgjedhore dhe plotësimi i Gjykatës Kushtetuese dhe SPAK-ut. Reforma Zgjedhore do të kryhet deri nga Dhjetori sipas rekomandimeve të OSBE-së me apo pa PD-në apo opozitën jashtë parlamentare. Plotësimi i gjykatës Kushtetuese apo SPAK brenda vitit apo deri në fillim të vitit të tjetër, se nuk janë në dorën e qeverisë" tha ai.

E ndërsa kryeministri i Maqedonisë Zaev ka paralajmëruar se nëse nuk hapen negociatat do ta dërgojë vendin në zgjedhje të parakohshme, Edi Rama mohoi që një e tillë të ndodhte në Shqipëri. “Ne jo vetëm që nuk do të shkojmë në zgjedhje të parakohshme, por do të vazhdojmë punën tonë. Në datë 19 dielli do të lind përsëri.  Shqipëria nuk ka pse shkon në zgjedhje të parakohshme se Shqipëria nuk i ka lënë mangët asgjë këtij procesi. Nëse zgjedhjet e parakohshme do të zgjidhnin problemin midis Francës dhe Gjermanisë do ta mendoja seriozisht. Futja në zgjedhje e Nardit dhe Dashit nuk zgjidh konfliktin e Merkelit me Macron. Pse nuk u hapën kur u tha që do të hapen, këtë shkoni dhe kërkojani presidentit të Francës. Nëse Komisioni Evropian do të thoshte se nuk i ka plotësuar qeveria kushtet, atëherë mund të më kërkoni llogari mua” përfundoi ai.