Nesër Maratona e Tiranës, 5,800 pjesëmarrës në edicionin e 10-të, risi gara 5 km! Nga ora 08:00-16:00 bllokohen rrugët, ja harta

Risi dhe një pjesëmarrje më të madhe do të ketë Maratona e Tiranës që këtë vit shënon edicionin e saj të dhjetë.

Aktiviteti sportiv që çelet të dielën pritet të bëjë bashkë rreth 6 mijë garues nga afërsisht 4 mijë që ishin vjet.

“Vitin e kaluar morën pjesë 4 mijë garues, ndërsa deri në këto momente janë regjistruar dhe kanë konfirmuar pjesëmarrjen 5,800 pjesëmarrës, çka tregon interesin e madh që ka kjo garë”, tha Sadi Vorpsi, nënkryetar i bashkisë së Tiranës.

LEXO EDHE:
Hervin Çuli: Tirana nuk e pranon dhunën, vandalizmin

Risia e këtij edicioni është gara 5 kilometra, duke krijuar më shumë mundësi për përfshirjen e qytetarëve.

“Një risi në këtë garë është dhe një garë e re që bëhet për herë të parë, 5 kilometra. Natyrisht që interesi ka qenë goxha i madh në raport me vitin 2025”, u shpreh Vorpsi.

Maratona do të zhvillohet më 15 nëntor, në disa akse të kryeqytetit. Për organizimin e saj janë angazhuar prej gjashtë muajsh rreth 600 vullnetarë, 800 punonjës policie dhe 500 punonjës të Bashkisë së Tiranës.

“Besoj që ky event, pra Maratona e Tiranës, është një event i rëndësisë së veçantë për të zhvilluar turizmin, ndërveprimin qytetar dhe promovimin ndërkombëtar të Tiranës. Kjo ngjarje e madhe sportive kontribuon edhe në krijimin e një atmosfere festive për kryeqytetin, duke i dhënë mundësi komunitetit për t'u përfshirë në këtë aktivitet sportiv dhe social”, tha Vorpsi.

E gjithë unaza e vogël e Tiranës nuk do të ketë qarkullim të automjeteve, po ashtu bulevardi “Zogu i Parë” dhe Bulevardi i Ri. Nga sheshi “Skënderbej” deri te sheshi “Nënë Tereza”, Rruga e Kavajës, e Durrësit, “Myslym Shyri”, rrugët e ish-Bllokut dhe kryqëzimet që të nxjerrin nga bulevardi në Rrugën e Elbasanit, do të jenë të bllokuara.

Për shkak të maratonës, të dielën edhe disa linja të transportit publik urban do të devijohen.

TAG:
• sadi vorpsi
• Tirane
• Maratona e Tiranës