Nga Turqia në Greqi, Rama darkë me Mitsotakis

Pas vizitës në Turqi, kryeministri Edi Rama do të niset drejt Greqisë, ku në orën 21:00 do të ketë një darkë me homologun grek Kyriakos Mitsotakis.

Kryeministri Edi Rama do të jetë në Athinë sot dhe nesër në cilësinë e kryetarit të OSBE për një konferencë të forumit të revistës Prestigjioze "The Economist” e cila në fokus do të ketë zhvillimin ekonomik, sfidat e rajonit dhe integrimit europian.

Përveç diskutimeve për rritjen e forcimin e tregtisë dhe investimeve mes vendeve të rajonit, kryeministri Rama do të zhvillojë edhe një takim me homologun e tij grek Kyriakos Mitsotakis. Pjesë e diskutimeve pritet të jetë edhe marrëveshja me detin, ku ishte vetë Mitsotakis i cili tha disa ditë më parë për mediat se do ta hap këtë çështje gjatë takimit me Ramën. Vizita ndodh në një periudhë ku në Shqipëri është ndezur një debat i nxehtë politik e publik për kufirin detar pas deklaratës së kryeministrit grek Mitsotakis për zgjerim të kufirit në detin Jon me 12 milje.

Vizita e Ramës në Athinë vjen pas takimit që kryeministri pati me Presidentin turk, Rexhep Taip Erdogan, ku sipas kryeministrit kanë folur për marrëdhëniet mes Shqipërisë e Turqisë, përballimin e Covid19, ecurinë e bashkëpunimit dypalësh, si edhe për situatën në rajonin e Ballkanit Perëndimor.

Ndërkohë vizitat e kreut të qeverisë shqiptare në Turqi dhe Greqi ndodhin në një kohë kur të dyja vendet janë në konflikt me njëra tjetrën për shkak të konfliktit të krijuar në Mesdheun Lindor, për të vënë nën kontroll burimet e hidrokarbureve në zonë.

B.K.//Shqiptarja.com

TAG:
• edi rama
• turqi
• Kyriakos Mitsotakis