Avokati Spartak Ngjela ka deklaruar se hapja e negociatave të Shqipërisë me BE më 28 qershor është një gjë e sigurt. Ngjela sqaron në ‘Facebook’ dhe arsyen politike që garanton hapjen e negociatave, që sipas tij, është te politika aktuale amerikane për Ballkanin Perëndimor.

Sipas avokatit, vota e vendeve të BE për çeljen e negociatave me Shqipërinë, politikisht, kuptohet që do të jetë një votë pro ose kundër SHBA, duke shtuar që kjo votë do të jetë pro Amerikës.

Postimi i Spartak Ngjelës:
Çelja e negociatave të Shqipërisë me Bashkimin Evropian më 28 qershor, është një gjë e sigurt. Cila është arsyeja politike që e garanton hapjen e negociatave të Shqipërisë me Bashkimin Europian?

Kurrë nuk duhet menduar se garancia që të gjitha vendet e Bashkimit Europian do të votojnë për Shqipërinë më 28 qershor, do të gjendet në situatën e brendshme të Shqipërisë. Në këtë rast kjo nuk ka lidhje fare me këtë situatë.

Garancia që të gjitha vendet e Bashkimit Europian në mënyrë unanime do të votojnë më 28 qershor për çeljen e negociatave me Shqipërinë, është te politika aktuale amerikane për Ballkanin Perëndimor, prandaj vota e tyre, politikisht, nuk do të hidhet pro apo kundër Shqipërisë.

Kështu siç ka ardhur situata, vota e të gjitha vendeve të Bashkimit Europian për çeljen e negociatave me Shqipërinë, politikisht, kuptohet që do të jetë një votë pro ose kundër Shteteve të Bashkuara Amerikës.

Domethënë është e kuptueshme që do të jetë pro, sepse, natyrshëm, që të gjitha vendet e BE-së do të jenë pro Amerikës. Gjithçka është e sigurt, prandaj korrupsioni i lartë në Tiranë kot e ka që çirret dhe kot e ka që shpreson te vota kundër.