Vetë Lindita Nikolla ka deklaruar për mediat se rritja e pagave për mësuesit do të jetë për të gjithë mësuesit e arsimit parauniversitar.
Gjithashtu në komisionin parlamentar mbajtur këtë të martë, është diskutuar projekt- ligji për sportin, nga ku ministrja Nikolla ka mbajtur një qëndrim në lidhje me ndërhyrjet e politikës në sport,duke u shprehur se në këtë ligj të ri politika nuk do të ketë më të drejtën e ndërhyrjes në sport.
Ndërkohë ligji për sportin ka qënë një nga pikat më të diskutuara gjatë viteve të fundit.
Lidhur me këtë çështje ka reaguar edhe deputeti i PS-së Fidel Ylli i cili e ka quajtur në nivele shumë të ulta buxhetin vjetor për sportin.
Pas diskutimeve me grupet e interesit ministrja Nikolla është konsultuar edhe me ekspertë vendas dhe ndërkombëtarë ku ka paraqitur dhe projekt-ligjin në komisionin parlamentar.
Nikolla: Autoritetet e politikës do të jenë gjithnjë e më larg sportit. Kjo ishte një çështje vullneti i shprehur i kësaj qeverie, i cili nuk mund të mbetet thjesht një vullnet duke adresuar përmes ligjeve konkrete për tu zbatuar që një ligj i ri për sportin e mundëson duke i dhënë zero mundësi politikës që të vendosi diktatin e saj.
Ndërkohë nuk kanë munguar argumentat ku deputeti i PS, Fidel Ylli, ka theksuar se është e paimagjinueshme që qeveria t'i kalojë 1 milion euro kombëtares së futbollit për kualifikimin në Europian, ndërsa buxheti vjetor për të gjitha federatat të jetë vetëm 900 mijë euro.
Fidel Ylli: Kjo qeveri paska para, 1 mln euro për t'i dhënë ekipit kombëtar se na nderoi në kualifikim. Por të gjitha buxhetet e federatave janë 900 mijë euro. Unë nuk mund të pranoj që del ministria e Financave dhe thotë se ne marrim 12 mln euro nga kompanitë e basteve dhe sportit i jep vetëm 0.04%.
Ky projekt-ligj u miratua në parim dhe pritet të kalojë për votim në parlament.
Redaksia online
D.M/Shqiptarja.com