Asambleja e paligjshme përcakton një datë të 'paligjshme' për zgjedhjet për kreun e FSHF! Shakohoxha për Report Tv: S'marr pjesë në një mbledhje të ndaluar nga gjykata

Me gjithë vendimin e Gjykatës së Tiranës që pezulloi Asamblenë e Zakonshme Zgjedhore të Federatës Shqiptare të Futbollit, Armand Duka e mblodhi këtë të mërkurë institucionin që organizon zgjedhjet për kreun e Federatës, proces në të cilin Duka kërkon një mandat të gjashtë. Për herë të parë pas vendimit penal të Gjykatës së Tiranës që e pezulloi nga drejtimi i Federatë, Armand Duka foli për bashkim e jo gjyqe.

 “T'i lemë mënjanë mllefin e inatin e mbartur. Duhet të shohim përpara, pa u ndikuar nga tensionet artificiale të situatës së kaluar. Duhet të mbyllet e shkuara e të fillojë e ardhmja, siç i takon shtëpisë sonë, ku gjithçka zgjidhet me mirëkuptim, jo gjyqe e penalitete. Ju kërkoj bashkim, kontribut dhe dashuri për këtë lojë"

Në zyrat e Federatës Shqiptare të Futbollit, Duka propozoi shtyrjen e zgjedhjeve për kreun e ri të FSHF-së dhe anëtarët e komitetit ekzekutiv, nga data 2 mars, për në 15 mars.

Të 41 anëtarët me të drejtë vote në sallë, dhanë aprovimin për propozimin e Dukës. 14 delegatë të tjerë me të drejtë vote, shumica kryetar bashkish që administrojnë klube të futbollit, rezufuan të marrin pjesë në Asamblenë e FSHF-së, duke zgjedhur të mos i dalin kundër vendimit të gjykatës.

Në këtë linjë u pozicionua edhe Dritan Shakahoxha, rival i Dukës për kryetar të FSHF-së, që në një reagim për Report Tv u shpreh:

“Nuk mund të marr pjesë në një asamble që është e ndaluar nga një vendim gjykate të zhvillohet. Nuk kemi përse të nxitojmë. Kohë ka plot deri në qershor mendoj kur skadon mandati. Sot nuk besoj që do ketë Asamble sepse tjetër është dëshira sy errur për pushtet me çdo kusht e FSHF dhe tjetër është mundësia për ta bërë. UEFA dhe FIFA nuk e ndjek FSHF në marrëzinë e saj”

Për Shakohoxhën fakti që Federata e Dukës ftoi në Asamble Eduard Prodanin, si kryetar të shoqatës rajonale të Tiranës, dhe jo Krenar Alimehmetin që u zgjodh në një proces të manipuluar më 24 janar, dëshmon se akuzat ishin të bazuara në prova, që edhe vetë FSHF duket se i pranoi.

“Tërheqjet e djeshme tregojnë se gjithë kjo protestë ishte e drejtë. Një pjesë e madhe e delegatëve janë zgjedhur në mënyrë të parregullt. Ashtu si 6 delegatët e Tiranës që edhe FSHF e kuptoi që janë të ligjshëm”.

Në valën e kallëzimeve në Gjykatë për manipulime në zgjedhjet e shoqatave rajonale të futbollit dhe hetimeve që janë në proces, pritet të shihet nëse do të vlerësohet e ligjshme apo jo edhe  data 15 mars dalë nga një asamble mbledhur mes pikëpyetjeve të mëdha. Zëvendëspresidenti  Edvin Libohova që drejtoi formalisht Asamblenë në vend të Dukës së pezulluar, dha këtë argument, pse takimi i 2 marsit është i ligjshëm.

"Janë tërhequr paditësit e Gjirokastrës dhe e Tiranës, për këtë arsye asambleja është e ligjshme", tha ai.

Organizimi i asamblesë kundër një vendimi gjykate që e ka pezulluar atë, është shkelje penale dhe sipas gjykatës organizatorët dënohen nga 2-3 vite burg.

2 ditë më parë Gjykata e Tiranës ka pezulluar Armand Dukën nga ushtrimi i detyrës së Presidentit të Federatës Shqiptare të Futbollit. Por, ndryshe nga pesë vendimet e mëparshme të gjykatave, të cilat kanë qenë të karakterit civil, vendimi i sotëm është penal dhe Armand Duka rrezikon të ndiqet penalisht. Janë pezulluar nga detyra edhe Sekretari i Përgjithshëm i FSHF, Ilir Shulku dhe Sekretarin e Përgjithshëm të Shoqatës Rajonale të Futbollit Tiranë, Ardian Haçin. Arsyeja lidhej me përgatitjet që Duka, Shulku dhe Haçi, po bëjnë për organizimin e Asamblesë së 2 Marsit në kundërshtim të ligjit dhe pesë vendimeve të dhëna nga Gjykata javën e kaluar. Armand Duka, Ilir Shulku dhe Ardian Haçi do të dalin të premten para gjykatës për tu njohur me masën e sigurimit. Sipas ligjit Duka duhet të paraqitet personalisht 

Më herët Gjykata pezulloi zgjedhjet e 2 marsit deri në shqyrtimin e padive të Shoqatave Rajonale për manipulim të procesit dhe zgjedhjet e mbajtura në Shoqatën e Tiranës, duke njohur si kryetar të Shoqatës, Eduard Prodanin.

Rendit zhvillimet sipas orarit:

Të Fundit Të Parat

K.T./M.Q./Shqiptarja.com

TAG:
• Armand Duka
• Komiteti Ekzekutiv i FSHF
• fshf