TIRANË- Kryebashkiaku Erion Veliaj ka depozituar në Prokurorinë e Tiranës një kallëzim për falsifikim dokumentesh. I pari i Tiranës pretendon se firma e tij është falsifikuar dhe një person tjetër ka firmosur sikur ai të ketë marrë dijeni në qeli për një vendim të Apelit të GJKKO-së dhe për këtë arsye i është drejtuar organit të akuzës me një kallëzim.

Veliaj i referohet një vendimi të marrë nga gjyqtari Engert Pëllumbi më datë 20.10.2025, ku u rrëzua kërkesa e tij për të shpallur të pavlefshme veprimet hetimore paraprake të SPAK. Veliaj thotë në kallëzim se vendimi i Apelit të GJKKO-së u shpall në mungesë të tij dhe mbrojtësve dhe pretendon se njoftimi për këtë vendimmarrje nuk i është komunikuar asnjëherë personalisht. Sipas Veliajt, në dosjen e Apelit të GJKKO-së është arkivuar një njoftim sikur ai të ketë marrë dijeni për shpalljen e këtij vendimi dhe që mban edhe firmën e kryebashkiakut.

Por Veliaj thotë në kallëzim, se ky nënshkrim nuk është firma e tij, ndërsa shton se ka kërkuar informacion edhe nga Burgu i Durrësit, i cili i ka komunikuar një se vendimi i Apelit nuk ka mbërritur asnjëherë në burgun ku Veliaj ndodhet i paraburgosur.

“Deklaroj shprehimisht dhe në mënyrë të prerë se ky nënshkrim nuk është firma ime. Kjo konstatohet drejtpërdrejt nga unë dhe konfirmohet objektivisht, pa asnjë dyshim, nga krahasimi me nënshkrimet e mia autentike të depozituara në dokumente të tjera zyrtare. publike dhe private, të cilat janë lehtësisht të verifikueshme.

Për të verifikuar në mënyrë objektive dhe të pakontestueshme pretendimin e njoftimit, kam kërkuar zyrtarisht informacion nga Institucioni i Ekzekutimit të Vendimeve Penale Durrës, institucion në të cilin ndodhem i privuar nga liria. Me shkresën nr. 218 Prot., datë 14.01.2026, 1.E.V.P. Durrës ka konfirmuar shprehimisht se vendimi i Gjykatës së Posaçme të Apelit për Korrupsionin dhe Krimin e Organizuar nuk ka mbërritur asnjëherë në këtë institucion. Ky fakt administrativ, i provuar me akt zyrtar, e bën objektivisht dhe juridikisht të pamundur marrjen e dijenisë nga ana ime për vendimin në fjalë, si person i izoluar, dhe përjashton çdo mundësi që njoftimi të jetë kryer në mënyrë të rregullt dhe të vlefshme”, thuhet në kallëzim.

Kryebashkiaku i Tiranës thotë se firma i është falsifikuar qëllimisht me qëllim që të aktivizohet në mënyrë fiktive afati i ushtrimit të rekursit në Gjykatën e Lartë.

“Këto dy elemente të provuara, mungesa absolute e çdo njoftimi real dhe ekzistenca e një deftese komunikimi me nënshkrim jo autentik në emrin tim, përbëjnë, të marra së bashku, provë të drejtpërdrejtë dhe të pakundërshtueshme se dëftesa e komunikimit është falsifikuar. Ky falsifikim është kryer me qëllim që të deformohet artificialisht fakti juridik i njoftimit mbi vendimin gjyqësor dhe të aktivizohet në mënyrë fiktive afati i ushtrimit të rekursit në Gjykatën e Lartë”, thuhet në kallëzim.

Sipas Veliajt, ky veprim cenon rëndë të drejtën kushtetuese për ankim, sigurinë juridike dhe parimin e procesit të rregullt ligjor, duke synuar realisht humbjen e së drejtës së rekursit përmes përdorimit të një akti zyrtar të rremë.

Në kallëzim kërkohet:

• regjistrimi i menjëhershëm i procedimit penal,

• ekspertim grafik i nënshkrimit,

• hetimi i zinxhirit të plotë të personave që kanë hartuar, administruar apo përdorur këtë dokument,

• si dhe hetimi i çdo vepre tjetër penale që mund të rezultojë gjatë hetimit, përfshirë shpërdorimin e detyrës.

Një kopje e kallëzimit penal i është depozituar gjithashtu Gjykatës së Lartë, si provë se afatet procedurale për ushtrimin e rekursit nuk kanë filluar kurrë ligjërisht, për shkak të mungesës së një njoftimi të vlefshëm.

Kliko këtu për të lexuar kallëzimin e plotë