'S'jap dorëheqjen'/ Basha-Ramës: Urdhërove dhunën, mos i kalo caqet, do lutesh të kesh fatin e Gruevskit

Kryeministri Edi Rama sot në zyrën e tij zhvilloi një takim me kryeprokuroren Arta Marku, kreun e SHISH, Helidon Bendo, ministrin e Brendshëm Sandër Lleshaj dhe të Drejtësisë, Etilda Gjonaj pas protestes se dhunshme te opozites. Basha tha Arta Marku është zgjedhur për të mbrojtur Ramën, ndërsa kërkoi aplikimin në Shqipëri të ashtuquajturit 'Raporti Priebe'.

"Shqipëria ka nevojë për një drejtësi të pavarur. Arsyeja pse Arta Marku është emëruar aty është që kjo mos të ndodhë dhe nuk ka ndodhur. Arsyeja pse është kapur KLP, KLGJ dhe Vettingu është që të mos hetohen Rama, Gjiknuri, Balla, Xhafaj...Ne jemi të vendosur për një reformë në drejtësi që të dënojë dhe jo të mbrojë kriminelët. Duhet një raport ' Priebe ' për të ndalur korruptimin e drejtësisë. Ka gjyqtarë që nuk janë shquar për ikona të korrupsionit, thonë po marrim një shukë me lekë se thonë ne do të ikim. Ne nuk kemi rrugë tjetër, sa më e madhe të jetë pjesëmarrja aq më shpejt do të fitohet beteja.

Thirrja ime iu drejtua urdhëruesit të dhunës, njeriut që e ka politizuar dhe kriminalizuar. Për policinë kam vetëm një thirrje mos iu bindni urdhrit politik. mes tyre ka edhe kriminelë me damkë si Baro i mbrëmshëm që duhet të ishte i dënuar, por përfaqëson krimin e veshur me uniformë. Atij i them asgjë nuk do të harrohet dhe do të mbajnë përgjegjësi. Por si mund ta përballonte policia situatën? Nuk jemi këtu për të diskutuar manualet si duhet të sillet policia. Aty janë prindërit e fëmijëve 3-5 që iu hodh gaz lotsjellës. E dini ngjarjen? Gjithashtu e dini sa qytetarë kanë vrarë veten në burgje për 30-50 mijë lekë të vjetra.  Imagjinoni që ka njerëz kanë përballë dhunuesin, që i ka nxjerrë nga shtëpitë, përse? Se të pasurohen një grup njerëzish. Vila miliona dollarëshe si Surreli. Kanë kaq shumë para sa nuk u mjaftojnë edhe shtëpitë e kushërinjve për ti fshehur, këto janë dy realitetet" tha ai.

Por cfarë është 'Raporti Priebe' që Basha kërkon të aplikohet edhe në Shqipëri?
Në 2017 në momentin e krizës së thellë politike së bashku me ndërmjetësimin diplomatik midis aktorëve politikë në Maqedoni, Brukseli mblodhi një grup ekspertësh të pavarur, të udhëhequr nga ish-drejtori për Ballkanin në Komisionin Europian, Reinhard Priebe për të identifikuar çështjet sistematike të Sundimit të Ligjit. Hetimi asokohe në vendin fqinj çoi në të ashtuquajturin “Raporti Priebe”. Ekspertët e pavarur nga vendet anëtare të BE-së identifikuan problemet e demokracisë duke shkuar më thellë se raportet e zakonshme të BE-së. “Raporti Priebe” u porosit dhe publikua nga Komisioni Europian çka i dha peshë më të madhe. Lulzim Basha kërkon nga Brukseli që një gjë e tillë të aplikohet edhe në Shqipëri, në një moment kur na ndajnë vetëm pak javë nga vendimi për hapjen ose jo të negociatave me Bashkimin Europian.

Militantët e Partisë demokratike dhe të Lëvizjes Socialiste për Integrim, i shkuan poshtë shtëpisë kryediplomatit të OSBE-së mbrëmjen e djeshme pas deklaratave të tij për dhunën në protestën e opozitës, duke i lënë një shënim në hyrjen e pallatit ku ai banon. "Turp për ju", shkruhej në mbishkrimin e lënë me bojë. Rama deklaroi sot se "Natën është kërcënuar ambasadori i OSBE pas deklaratë që foli për organizatorë për dhunë kriminale". Por si e komenton Basha? "Nuk kam asnjë informacion që ndonjë ambasador është kërcënuar. Fjala Rama deklaroi sot është parantezë për gënjeshtër, unë nuk kam asnjë fakt që është kërcënuar ndonjë ambasador. Ke ndonjë fakt që ndonjë ambasador është dënuar? Parullat? Nuk bëj koment cfarë parullash". Pasi tha se nuk ka dijeni për kërcënim të ndonjë ambasadori, Basha i kërkoi gazetarit që përsëriste parullën “Borchardt turp të kesh…”

Basha: Keni ndonjë fakt që ndonjë ambasador është kërcënuar sot?!
Gazetari: Ndonjë koment për parullat?
Basha: Çfarë parullash?
Gazetari: Parullat në pallatin e ambasadorit Borchardt?
Basha: Nuk bëj komente për parullat, çfarë parullash?
Gazetari: Borchardt turp të kesh..
Basha: Si?
Gazetari: Borchardt turp të kesh..
Basha: Si?
Gazetari: Borchardt turp të kesh..
Basha: No comment

Protestuesit e opozitës mbrëmë sulmuan edhe gazetarët. Ata sulmuan operatorin e Report TV pranë drejtorisë së policisë dhe tentuan të thyejnë kamerën e tij. Për incidentet mbrëmjen e djeshme, reagoi sot Kryetari i PD-së, Lulzim Basha. Ai tha se protestuesit kanë qenë të irrituar, por u bëri thirrje duke u shprehur se gazetarët janë të pacenueshëm.

"Ju garantoj se përpjekja që po bëjmë sot nuk bëhet as për nesër apo pasnesër, por për 10-15 vitet e ardhshme, jemi shumë pranë fitores. Është në dorën tonë t'ia shkurtojmë ditët të keqes. Kam një falenderim të vecantë për të gjithë ju, gazetarët, operatorët, mbulimin që i keni bërë protestës, po të mos ishte për ju, që filmuan rrahjen barbare, nuk e di cfarë do të kishte ndodhur sot me Dollapin. Keqardhje për cdo gjë që u ka ndodhur si rezultat i dhunës, gazit apo ndonjë përplasje me ndonjë protestues të irrituar. U bëj thirrje protestuesve, mediat janë të pacenueshme, cdokush që i cenon nuk ka të bëjë më misionin tonë. Mediat janë të pacenueshme. Këta vajza dhe djem, burra dhe gra janë të pa cenueshëm. Iu garantoj që kjo betejë do të sjellë edhe lirinë e munguar për ju" deklaroi ai.

Paradite kryeministri Edi Rama tha se nuk do të largohet, por si do të vijojë aksioni opozitar nga Lulzim Basha? "Aksioni opozitar është ai që kemi shpalosur, sot ne jemi në aksion popullor, kriza ku ndodhi ka vetëm dy rrugë, ose do të vijojë në tiraninë e krimit, pasi të ketë kapur edhe ata gjyqtarë dhe prokurorë që kanë mbetur dhe ato pasuri që kanë mbetur, pastaj do të ketë marrëzitë e fundit të autokratit, por shanset që të ndodhë kjo janë zero. Rama në krah të axhendës serbe për ndryshimin e kufijve të Kosovës, kërcënon stabilitetin e rajonit. Kushdo e ka kuptuar, kushdo jo. Është detyra jonë, e shqiptarëve të bëjmë gjithcka për ta ndalur një orë e më parë këtë autokrat të rrezikshëm, jo vetëm për vendin, por edhe për rajonin. Në këtë mision jemi të qartë dhe të vendosur, hapi që kemi hedhur është pa kthim. Mandatet janë djegur ne jemi në krah të qytetarëve. Kjo betejë nuk do të ketë fundin që ëndërrojnë autokratët, por fundin kur një popull bashkohet. Por me cfarë fature? Dhe si do të përfundojë Rama? Pasi si do të përfundojë beteja kjo dihet. Shqipëria do të jetë një vend me një të ardhme që do u takojë qytetarëve, jo azil pleqsh" tha Basha.

Kreu i PD-së, Lulzim Basha ka thënë se më 30 qershorë nuk do të lejohet të mbahen zgjedhje pasi sipas tij do të jetë nëj përsëritje e 2017. Basha thotë se zgjdhjet fasadë nuk do të ketë dhe kështu kërkon largimin e Ramës si kryeministër.

"Ose te futemi me kobure në brez, që siç ju thashë, ne e kemi refuzuar, ose rruga politike që kemi ndjekur duke djegur mandatet dhe duke thirrur qytetarët të vendosin ata kë do të zgjedhin deputet apo kryebashkiak. Kjo betejë bëhet që kjo e drjetë t’u kthehet qytetarëve, sepse kjo e drejtë është asgjesuar nga Edi Rama me krimin. Do ta përsëris për të gjithë ata që kanë iluzionin se me Edi ramën do të ketë zgjedhje më 30 qershor. Do të ketë një tentativë të Edi Ramës për të përsëritur 2017 dhe 2016. Ndryshimi këtë herë është që përvec kandidatëve të krimit, do të ketë kandidatë falso nga opozita falso. Kjo nuk do të ndodhë. Për ne është mision kombëtar të mos lejojmë zgjedhje të diktuara nga krimi. Do të ketë vetëm zgjedhje të lira e të ndershme. Ne kemi treguar edhe rrugën e vetme që këto mund të garantohen pa favorizuar palët, pa i dhënë pushtet në tavolinë asnjë pale. Ka dy palë zgjedhje që Edi Rama merr pushtet në tavolinë me krimin. Kjo nuk ka për të ndodhur më. Hapi i parë i zgjidhjes së krizës është largimi i kryeministrit të lidhur me krimin. I mirëkuptoj ata që më thonë se po kërkon shumë pak. Sepse ky duhet të ishte në burg për ato që kanë bërë. Kjo që po kërkojmë është e panegociueshme. Është e panegociueshme, sepse nuk ka mënyrë tjetër për t’i shërbyer interesit publik. Gjithçka tjetër do ta shndërronte këtë në atë që jemi akuzuar me të padrejtë, për një pazar." ka thënë Basha.

Lulzim Basha u ka bërë thirrje qytetarëve për bashkim në betejën për votë të lirë, që sipas tij do ta nxjerrë Shqipërinë nga ky udhëkryq i rrezikshëm. "Nëse jeni sipërmarrës, fermerë të dëshpëruar, nëse jeni profesionistë, taksoheni shumë dhe këto taksa nuk ju kthehet në investim, nëse jeni pensionist dhe nuk ju dalin paratë për të paguar dritat dhe ilaçet, nëse jeni me ndihmë ekonomike qesharake apo jeni nxjerrë me të padrejtë, në veçanti ju të rinjtë, ejani të ndërtojmë Europën në vendin tonë.

Beteja për votë të lirë do ta nxjerrë Shqipërinë nga ky udhëkryq. O tirani e krimit, o demokraci europiane. Ejani nesër në protestën kombëtare në orën 18.30. Rama më të vërtetë e ka të pamundur dhe shumë të vështirë për paktin që ka bërë me ata që e sollën në pushtet, por ata nuk janë as socialistët dhe i them të mendohet mirë para se të turrë blindat dhe gazin ndaj shqiptarëve. Ju të rinj që doni standarde ejani ta ndërtojmë bashkë këtu" tha ai.

Rudina Hajdari u shpreh dje se shqiptarët kanë zgjedhur demokracinë dhe sipas saj, Azem Hajdari nuk do të kishte mbështetur veprimet e Bashës. Sipas deputetes, Basha po minon parimet e paqes, prosperitetit dhe pluralizmit. Por a është penduar Basha që e futi në lista vajzën e Azem Hajdarit?

"Suksesi në jetë përcaktohet nga të bërit sa më pak gabimeve, por në jetë kalojmë nga të bërit gabime, por unë përpiqem që të mësoj nga gabimet. Në cdo vendim përpiqem që të mësoj nga gabimet, por për rastin konkret nuk dua të bëj asnjë koment. Ose do të jetë zgjedhje ose nuk do të ketë zgjedhje" tha Basha.

Kreu i Partisë Demokratike, Lulzim Basha ka deklaruar se nuk ka pranuar të dëgjojë këshillën e disa miqëve për të hyrë në zgjedhje pasi nëse do të pranonte që Edi Rama të vijonte të ishte kryeministër kriza do të vijonte.

"Kjo nuk është luftë për pushtet dhe për karrige. Është luftë për transformim që të ndryshojmë këtë sistem të qelbur. Nëse do të ishte luftë për pushtet e karrige, do të kalonim nga një krizë tek tjetra.   
Prandaj nuk kam dëgjuar këshillat e disa miqve që të hyjmë në zgjedhje, megjithëse sondazhet na favorizojnë. E vetmja rrugë për ta ndaluar këtë për çdo ymër lalë t’i shtrijmë dorën një ymer lale, për çdo shullaz, nja antishullaz, për cdo avdylaj një anti-avdylaj. Por këto nuk do të ishin zgjedhje, do të ishin luftë mes bandave." ka deklaruar Basha.

Kryetari i PD-së, Basha tha se kryeministri Rama është në panik, ndërsa plani i tij është që të shkurajojë opozitën. "Dosja 339 dhe 184 janë themeli i ngrehinës së të keqes i të keqen që ka zaptuar Shqipërinë. Që rruga të hapet duhet që kjo të shembet me themel. Por që të hetohet 339 dhe 184 duhen prokurorë të pavarur. Gjiknuri duhet të ishte në burg si organizatori i shit blerjes së votave. Ai është sot kreu i fushatës elektorale për të ashtëquajtura zgjedhje lokale të 2019. Po ashtu Balla, Ulsi Manja duhet të ishte në burg.

Rama propozon ta cojë të keqen më thellë, të diktojë një tjetër proces zgjedhor që kryetarët e bashkive të jenë produkt i bashkëpunimit të Ramës me kriminelët dhe oligarkët. Rama sot në panik total foli me tone të ulura, plani i tij është i qartë, të godasë dhe frikësojë përballjen qytetare dhe për këtë i duhet të shkurajojë opozitën. Në vend që në burg të ishte Gjiknuri, u arrestua Klevis Balliu se doli në krah të qytetarëve. Kjo është arsyeja e rrahjes barbare të Dollapit. Beteja jonë nuk është sfidë personale. Me sfidë personale e kam mundur me votë në 2011-ën. Beteja jonë është për normalitet politik.  Pushtet me dhunë nuk mban dot".

Në prag të protestës së nesërme, Basha kishte një paralajmërim për kryeministrin Edi Rama. "Halli hallit nuk i ngjan, po i bashkon fakti që jetojnë në një vend anormal me politikë dhe qeveritarë anormalë. Pse ndodh kjo, pse ndihen kaq të shkëputur nga qeveria, të gjitha krizat i bashkon humbja totale që e bën një shoqëri bashkë. Kjo ka humbur se prej 6 vitesh vendi sundohet dhe fatin nuk e ke në dorën tënde dhe ligjit. Po ky sens i drejtë, kjo ndjenjë e mungesës së normalitetit mora forma dramatike mbrëmjen e kaluar. Junta kriminale për protestuesit, por për të gjithë qytetarët e Tiranës, që dje bashkë me fëmijët e tyre kanë marrë doza të larta të gazit helmues lotsjellës, që u përdorën bashkë me dhunën e pafre kundër protestuesve. Me mirëkuptim që tregoi për rrahjen barbare të numrit tre të PD-së tregoi kush ishte urdhëruesi. Në prag të protestës nesër dua ti bëj një paralajmërim (Ramës), mos i kalo caqet, mos bëj të fortin pas autoblindave dhe gazit, harroje që do të mbash pushtet me dhunë, në rastin më të mirë do të lutesh që të kesh fatin e Nikolla Gruevskit (Ish-kryeministri maqedonas qe kerkoi azil ne Hungari). Për të ardhur te demokracia janë prerë koka mbretërish" deklaroi Basha.

Pas takimit që kreu i qeverisë, Edi Rama bëri me gazetarët në lidhje me protestën e dhunshme të opozitës, ka reaguar edhe ish-kryeministri, Sali Berisha.

Në deklaratën e tij Berisha shprehet se Rama u shfaq para mediave i tmerruar në konferencën me gazetarët nga kryengritja e opozitës. Më pas Berisha ka thënë se Rama do të ketë një fund të shpejtë dhe të tmerrshëm nga ata njerëz që dalin në protesta.

Reagimi i plotë i Berishës:
"I poshteruar, i tmerruar, i droguar dhe ne panik e me poture te mbushura Edvini i la gazetaret pa dreke!

Miq, ne disa ore para mediave i poshteruar, i tmerruar, por qartesisht i droguar dhe me poture te mbushura, Edvin Kristaq Krimi mbajti sot ore te tera dhe i la pa dreke gazetaret qe kishte thirrur per gjoja konference shtypi.

Ne daljen e tij katastrofale, ne te cilen per shkak te kokaines kishte edhe deri ne 30-40 levizje horizontale te globeve, kokerdhokeve te syve, Rama gajasi gazetaret ku u tha se Berisha deshi te me fuste nje plumb ne koke me 21 Janar dhe se ate dite qe ai solli si mish per top njerezit per te mbajtur fjalim nga ballkoni i kryeministrise sipas tij nuk eshte hedhur as dhe nje guriçke drejt nderteses se kryeministrise.

Ai, i tmerruar nga kryengritesit guximtare u tha gazetareve se pergjimet qe faktojne plaçkitjen e votave me bandat kriminale ne komunikim direkt personalisht me te, Gjiknurin dhe Tahirin, Ballen dhe Gjushin etj, nuk jane prova si dhe shpalli pafajesine e Tahirit nga tmerri per te deshmuar se eshte peng i tij.

Rama si zakonisht nuk harroi refrenin e tij bajat se per çdo çeshtje fajin e ka Saliu.

Me kete rast nuk kam asnje koment tjeter veçse: Edvin dje ke pare vetem fillimin. Mjere tij per fundin e shpejte te tmerrshem qe do te te rezervojne ata njerez te ndershem dhe trima qe ti si rrugaç ordiner dhe i tmerruar nga vjedhjet, trafiqet, korrupsioni dhe sarajet e Surrelit i cilesove huligane vetem se ata protestojne sepse ti iu ke shkaterruar te ardhmen. Rama ik. Fitore! sb"

Pas deklaratave të kryeministrit Rama për rreth dy orë në selinë e qeverisë, në orën 17:00 Lulzim Basha ka lajmëruar një bashkëbisedim me gazetarët në selinë blu. Basha pritet që t'i përgjigjet Ramës, ndërsa nesër opozita do të zhvillojë protestën e radhës kombëtare.

Ish-kryetari i grupit të LSI-së, Petrit Vasili ka reaguar pas deklaratës së kreut të qeverisë duke e sulmuar atë dhe kreun e OSBE-së. Ai ftoi qytetarët që të bashkohen nesër për të rrëzuar Ramën. "Edi Rama do të përgjigjet një më një dhe shumë rreptë dhe gjithashtu për helmimin masiv që i ka bërë treçerekut të Tiranës. Lëndës u mbajnë të fshehtë përbërjen. Njerëzit kanë vuajtur rëndë se një kriminel do të rrijë ca ditë më shumë në pushtet. Ky na qau hallin edhe të raportit me OSBE-në? Shefi i OSBE-së nuk e di ku ka kokën. Ndonjë emisar i OSBE-së shet...Rama jo vetëm që do të largohet, por një sahat e më parë. Nesër do të jemi të gjithë në shesh" deklaroi ai.