Zëdhënësja e qeverisë Elisa Spiropali është e para e cila ka reaguar për deklaratat e Presidentit Meta për protesta popullore më 2 mars për të rrëzuar qeverinë. Spiropali tha se 'grushti i shtetit' në kokën e Metën ka nisur që me miratimin e 'Reformës në Drejtësi' dhe se çdo ligj i miratuar për drejtësinë e re, Metës i duket si grusht. Për Spiropalin deklaratat e Metës tregojnë se sa 'jashtë kontrollit' ka dalë ai dhe se tashmë atë nuk ë shpëton dot më askush as Luli e as populli, duke iu referuar takimeve në presidencë me kryedemokratin apo thirrjeve për protesta mbarëpopullore.

'Pyetja sot s’është pse Presidentit i ka dalë gjuha jashtë kontrollit dhe s’ka më asnjë kontroll mbi Ilir Metën. Kjo dihet. Pyetja është pse Ilir Meta priti Konferencën e Donatorëve për ta ribërë leckë Presidentin! Keqardhja për Presidentin ka sosur. Ajo për Ilir Metën s’ka të sosur! Zoti e ndihmoftë Ilir Metën se Presidentin s’e ndihmon dot më as Luli! Populli jo e jo. Sa për grushtin e shtetit,ai ka nisur në kokën e Ilirit qysh kur nisi Reforma në Drejtësi dhe do të vazhdojë sa herë që në konsensus me SHBA/BE ne miratojmë ligje që atij i duken grushta', shkruan Spiropali.

Gjatë paradites së të mërkurës, presidenti Meta i bëri thirrje popullit për një protestë dhe 'besëlidhje' popullore më 2 mars në mënyrë që të rrëzojnë Ramën dhe institucionet në bulevardin 'Dëshmorët e Kombit' do i kthehen popullit.