Open Studio, një ekspozitë ndryshe

TIRANE - Dy piktoret e reja Ledia Kostandini dhe Matilda Odobashi kanë zgjedhur një mënyrë të veçantë për të ekspozuar punimet e tyre në aktivitetin “Open Studio: Ledia Kostandini dhe Matilda Odobashi”. Aktiviteti është një iniciativë e dy vajzave, të cilat të shtyra nga dëshira për të marrë impulset dhe ngacmimet nga miqtë, kolegët por edhe artëdashësit, kanë krijuar një ambient ndryshe për ekspozimin e krijimeve të tyre.

E veçanta e këtyre punimeve ishte se ato u kryen në një lagje të Tiranës dhe jo në galeritë që ndodhen në qendër të saj, duke e nxjerrë artin jashtë kontekstit statik dhe duke e afruar me shumë me komunitetin.

"Open Studio" qëndroi e hapur për dy fundjava rradhazi, gjatë gjithë dites në rrugën “Ali Visha”, afër pallatit Grand. Në këtë mënyrë gjithë të apasionuarit pas pikturës patën mundësinë të vizitonin atelierin dhe punimet, qe dy artistet i shpjegonin për të pranishmit.


(Foto nga ekspozita)

Ledia Kostandinit tregoi se në punimet e saj janë shprehur: “Situata absurde, vende të kota ku mjediset periferike shndërrohen përkohesisht në një galeri pa mure, për mua dhe për njerëz që ndodhen rastësisht aty. Ky proces instalativ, më njeh me një publik spontan, tepër kurioz dhe fare pak të familjarizuar me figurën e artistit. Unë zgjedh të udhëtoj me instalacionin e parakrijuar në studio, drejt një destinacioni specifik. Realitetin e përdor si një skenografi dramatike mbi të cilën luhet një komedi. Paradoksi dhe kontradita janë lajtmotiv”.


(Foto nga ekspozita)

Kurse Matilda Odobashi thotë se në punimet e saj janë shprehur: “Kërshëria që ndjej kundrejt natyrës njerëzore në tërësinë e saj, më ka bërë të merrem gjatë me të; me marrëdhënien dikotonike që ajo krijon me vetvehten apo/edhe me ambientin që e rrethon. Punimet, kryesisht krijimet e fundit, janë përshfaqje e anktheve, frikërave dhe ndjesisë klaustrofobike që ambjenti urban dhe marrëdhëniet njerëzore në këto ambiente, ngjallin tek vet njerëzit. Këto ndjesi vijnë të theksuara edhe më, në mënyrën se si keto krijime ekspozohen”.


(Foto nga ekspozita)

Redaksia online
(eç/shqiptarja.com)