Atletja shqiptare Luiza Gega bëri një performancë të shkëlqyer në 3 mijë metra me pengesa duke u shpallur kampione Europe, e duke emocionuar çdo shqiptar. Por Gega, nuk ishte e vetmja shqiptare që fitoi në finalet e Kampionatit europian të atletikës.

Kampione e Europës u shpall edhe Elina Tzengko, (Zhengo) e lindur në Greqi nga prindër shqiptarë nga Korça, e cila dominoi garën e hedhjes së shtizës me hedhjen 65 metra e 81 centimetra në Mynih, duke fituar medaljen e artë.

Vetëm 20 vjeç, Elina ka lindur në afërsi të Kalkidikisë, dhe cilësohet si ylli i disiplinës botërore. Në vitin 2018, Elina mori nënshtetësinë grekë, vendi ku është lindur, rritur dhe stërvitur në këtë sport, duke i dhënë vendit fqinj një tjetër protagoniste shqiptare. Tashmë i ka sjellë medalje me shumë vlerë Greqisë, e shumë të tjera priten prej saj në të ardhmen.

Pas triumfit në hedhjen e shtizës, Elina Tzengko, është ndalur të flasë edhe për rrënjët e saj.

“Përpara pak vitesh as që mund të konkurroja jashtë Greqisë sepse nuk kisha shtetësi. Nuk kishte ndjesi më të keqe. Kisha lindur në Greqi por ndihesha e huaj. Prindërit e mi janë shqiptarë, nuk e mohoj dhe nuk e kam as turp ta them një gjë të tillë megjithatë unë kam lindur në Greqi dhe e dua edhe këtë vend.

Së pari babai im u largua kur nëna ime ishte shtatzënë me motrën time më të madhe. Ai mbërriti në këmbë nga Shqipëria në Halkidiki dhe kur gjeti punë si ndërtues, nëna ime e ndoqi.

Përshtatja e tyre me Greqinë nuk ishte e lehtë. Ata kishin lënë punën e tyre (babai im ishte polic dhe nëna ime ishte mësuese), ata nuk njihnin askënd, nuk flisnin gjuhën dhe kur lindi motra ime, ata jetonin në një dhomë pothuajse bosh. Një dyshek, një tavolinë, një enë... Nuk u ankuan kurrë...”, ka thënë ajo në një intervistë për mediat greke.

Rendit zhvillimet sipas orarit:
Ora 10:00
U shpall kampione në hedhjen në shtizë për Greqinë, Elina Xhengo: Kam marrë edhe mesazhe negative, e bëjnë sepse kam origjinë shqiptare

Elina Xhengo, kampione e Europës në hedhje shtize, vajza 20-vjeçare e lindur nga prindër shqiptarë, nuk e ka shijuar tërësisht sukesesin e europianit të Mynihut.

Edhe pse ajo përfaqësoi Greqinë dhe madje valëviti flamurin e vendit fqinjë në europian ku vendosi edhe rekord kontinental si vajza më e re që arrin të fitojë një titull në këtë disiplinë, ka pasur mesazhe fyese me bazë raciste për shkak të origjinës. 

“Kam marrë edhe mesazhe negative, sepse jam me origjinë nga Shqipëria”, tha Elina në një intervistë për televizionin kombëtar ANT1.

 “Bëra shumë përpjekje dhe përgatitje, po bëhesha gati dhe në momentin e fundit nuk shkova në ndeshje pasi nuk kisha nënshtetësi greke. Këtu kam lindur, këtu jam rritur, Greqia është vendi im. Unë jam nga Shqipëria, prindërit e mi janë nga atje. Nuk kam përjetuar racizëm, njerëzit në fshatin ku jetojmë më kanë trajtuar mirë që në fëmijëri, kam qenë edhe shumë sociale”, tha Elina Jengo për vonesën me të cilën mori nënshtetësinë greke.

M.Q./Shqiptarja.com