PD: Bashkia po betonizon parkun e liqenit. Veliaj: Kanë hallin e kunetërve, se i kishin prenotuar për ta

Partia Demokratike ka akuzuar sot kryetarin e Bashkisë Tiranë, Erion Veliaj se bashkë me qeverinë po betonizojnë hyrjen e  parkut të liqenit të Tiranës. Kryetari i Departamentit për Mjedisin në PD, Jamarbër Malltezi ka thënë se ka një plan rregullues të bashkisë që po mbahet i fshehtë dhe se ky plan ka ndryshuar. Malltezi ka thënë se faqet e internetit të institucioneve janë jashtë funksionit, dhe sipas PD, kjo tregon se plani rregullues po fshihet.

Mafia e lidhur me bashkinë e Tiranës dhe me qeverinë. Bashkia e Tiranës ka ndryshuar planin e vitit 2012 që ndalonte ndërtime në çdo park dhe lulishte të qytetit. Me planin e ndryshuar, hyrja e parkut të liqenit kthehet ne beton masiv. Parku dhe plani rregullues i bashkisë mbahet i fshehtë duke mos e publikuar. Hyrja e parkut të liqenit u betonizua.

Jamarbër Malltezi, kreu i Departamentit për Mjedisin në PD

Foto e publikuar nga Malltezi, ku sipas tij qëndron fshehja e planit rregullues të Bashkisë Tiranë, pasi faqet e internetit nuk aksesojnë informacion

Malltezi ka publikuar disa foto dhe harta, ku sipas PD, tregohet se bashkia po e fsheh planin rregullues të Tiranës. 

Plani vendor për Bashkinë e Tiranës

Deklarata e plotë e Jamarbër Malltezit:

Partia Demokratike denoncoi disa javë më parë planin e Edi Ramës dhe Erion Veliajt për të ndërtuar qiellgërvishtës brenda Parkut të Liqenit. 

Të dy heshtën dhe akoma nuk kanë dhënë llogari për vendimin e tyre, i cili lejon që kryeqytetit t’i hiqet një pjesë e mushkërisë së tij për t’u zëvendësuar me beton. 

Këta janë të njëjtët që heshtën, kur ne denoncuam se brenda Parkut të Liqenit, dy mikeshat e Edi Ramës, po ndërtonin vila në kundërshtim me çdo ligj në fuqi. 

 Qytetarët e Tiranës duhet ta dinë se kafshimi i Parkut të Liqenit për interesat e mafias së ndërtimit, të lidhur me Bashkinë dhe me Qeverinë, është pjesë e Planit të ri të Tiranës. 

Plani mafioz Rama-Veliaj  ndryshoi Planin e vitit 2013, i cili ndalonte ndërtimet në çdo park apo lulishte të qytetit. Në kapitullin 7.4 të Planit 2013 duken qartë kufizimet dhe ndalimet e ndërtimeve në parqet dhe lulishtet e Tiranës. 

Në planin e ndryshuar kundër interesit të qytetarëve të Tiranës, hyrja e Parkut të Liqenit shënohet me fjalët “Sherbime + BANIM + Institucione”. Me pak fjalë kjo do të thotë beton masiv për Parkun e Liqenit. 

Është e papranueshme që Plani Rregullues i Tiranës mbahet i fshehtë. Asnjë website zyrtar i Bashkisë apo qeverisë që e ka miratuar atë, nuk e ka të publikuar planin, në bazë të të cilit hyrja e Parkut të Liqenit betonizohet dhe mbushet me qiellgërvishtës. (websitet: (i) bashkia, (ii) planifikimi, (iii) agjensia territorit & (iv) programi transparences kane ikur ne drejtim te paditur)

Plani i Edi Ramës dhe Erion Veliajt është që ta mbajnë në heshtje deri në zgjedhjet e ardhshme lokale dhe qytetarët të mos keni informacion për këtë aferë të rëndë korruptive, për këtë krim mjedisor që shkatërron hyrjen e Parkut të Liqenit dhe shëndetin e qytetit. 

 

Ora 13:30/ Veliaj i përgjigjet Malltezit: Llokma të prenotuara për kunetërit, presim Vetting-un

Kryetari i Bashkisë Tiranë, Erion Veliaj i është përgjigjur akuzave të kreut të Departamentit të Mjedisit në PD, Jamarbër Malltezi, se po betonizohet hyrja e Parkut të Liqenit.

Në inspektimin e hapësirave të reja që do t’i bashkohen këtij parku, kryebashkiaku Veliaj tha se akuzat e PD, burojnë nga interesa të ngushta dhe krejtësisht private, e jo nga interesi i qytetarëve, të cilët duan që ky territor t’i shtohet parkut.

Unë e kuptoj shqetësimin e Partisë Demokratike! Të gjitha këto kanë qenë llokma të prenotuara për kunetër, për vjehërr. E kuptoj shqetësimin e tyre, duhet të jenë realisht të tronditur që kjo hapësirë i shkon qytetit dhe jo kunetërve. Fakti që dalin përditë, përditë për këtë hapësirë, do të thotë se u ka dhembur shumë fakti që këtë hapësirë do e gëzojnë qytetarët e Tiranës dhe jo ata që, në fakt, duhet të kalojnë në vetting. Prandaj, të gjithë jemi buzagaz kur dëgjojmë për vettingun e Lul Bashës, sepse ne presim vettingun e SPAK dhe BKH, që i shkon edhe vjehrrit, edhe kunatit, gjithë fisit e farës ku parkohen asetet e vjedhura nga ky vend. Ndërkohë, marrim sot një version komplet të holluar, ku vettingun e bëjnë vetë politikanët, ku nuk preken vjehërrit e kunetërit, dhe ku sigurisht, nuk japin llogari për gjithë dëmet që i kanë bërë këtij vendi. Por, ne kemi nevojë për një vetting të vërtetë, kemi nevojë për agjenci të vërteta që i menaxhojnë këto asete, dhe jo për vjehërrit e kunetërit.

Erion Veliaj, kryetar i Bashkisë Tiranë

//Shqiptarja.com

TAG:
• erion veliaj
• bashkia tirane
• Jamarbër Malltezi
• plani rregullues i tiranes