Partia Demokratike me në krye Lulzim Bashën ka reaguar për deklaratat e kryeministrit Edi Rama në konferencën e fundvitit në lidhje me hetimet ndaj ish-ministrit Ilir Beqaj. 

"Arkitekti i kriminalizimit dhe korruptimit të çdo qelize të qeverisjes,  doli sot sërish të mbrojë Ilir Beqajn dhe dyzinën e të korruptuarve të tij që janë vënë në rradhë në dyert e drejtësisë. Fytyra e tij sot para shqiptarëve, është pasqyra ku shohin Arben Ahmetajn, Sajmir Tahirin, Ilir Beqajn, Elvis Roshin, Safet Gjicin e dhjetra kryetarë bashkish dhe zyrtarë të qeverisë nën akuzë dhe të dënuar për lidhjen me krimin dhe korrupsionin. Ky është bilanci i Edi Rames, të tjerat janë justifikime me shpresën se shqiptarët do ta kenë memorien e shkurtër Për Edi Ramën kush nuk vjedh fle gjumë, kush nuk bëhet mburojë e korrupsionit është i paaftë, kush nuk është aleat me krimin në vjedhjen e zgjedhjeve, nuk bën për politikë. Ky është standarti dhe oferta e Edi Ramës për shqiptarët, por kjo nuk mund dhe s'do të jetë kurrë e ardhmja e Shqipërisë", thuhet në deklaratë.

Ky reagim erdhi pasi Rama komentoi aktivitetin e opozitës për këtë vit duke e quajtur të dobët, ndërsa për Bashën tha se me siguri është duke fjetur. Vihet re se në deklaratën e PD nuk ka asnjë reagim për masën e sigurisë arrest në shtëpi për ish kryeministrin Berisha i akuzuar për korrupsion për aferën e privatizimit të ish kompleksit Partizani.