Akuzat për dënimin/ Kajmaku: PD limon i shtrydhur! Kam punuar për bukën e gojës, fjalën e fundit ta thotë drejtësia

Agim Kajmaku kryebashkiaku i ri i Vorës reagon pas publikimit  të dokumenteve nga PD lidhur me dënimin e tij në Greqi.

Kajmaku deklaron se nuk ka marrë kurrë pjesë në trafiqe dhe krime dhe se ka punuar për të nxjerrë bukën e gojës në emigracion dhe për këtë arsye ka ndryshuar edhe emrin.

Ai thotë se fjalën e fundit do ta thonë vetë autoritetet ndërsa sulmon PD duke thënë se është nj limon i shtrydhur që nuk i duhet më asnjeriu.

"Që pas marrjes së detyrës si kryetar i Bashkisë së Vorës, ata s’u përballen nga frika e humbjes së padiskutueshme, më janë vërsulur me tërbim!

Por unë siguroj me bindje, në radhë të parë qytetarët e Vorës se i qëndroj pikë për pikë asaj që kam deklaruar edhe më herët lidhur për këtë sulm.

Unë nuk jam marrë kurrë me trafiqe dhe krime. Kam qenë dhe jam punëtor e familjar. Kam punuar për të nxjerrë bukën e gojës në Shqipëri e në emigracion dhe emrin e kam ndryshuar si të gjithë shqiptarët, që të më jepej mundësia të rrija atje dhe punoja.

Partia Demokratike po merret me limona dhe me mandarina emigrantësh shqiptarë, të cilët halli i ka shtyrë të punojnë në një vend të huaj! Ata bëjnë sikur nuk e dijnë se çfarë kanë hequr shqiptarët për të mbijetuar me emra e me mbiemra nga më të ndryshmit në Greqi.

Në fakt PD është limoni i shtrydhur që s’i duhet më asnjeriu. Le ta thonë autoritetet fjalën e tyre dhe të na falin qytetarët për këtë shqetësim!

Unë dua të siguroj qytetarët e Vorës se pavarësisht kësaj poshtërsie, jam dhe do të jem në çdo moment në krye të detyrës! Ju më besuat në 30 qershor për t’i ndryshuar faqen Vorës sonë dhe për t’a vënë bashkinë në shërbim të qytetarëve", shkruan Kajmaku.

TAG:
• partia socialiste
• Agim Kajmaku