TIRANE - Deputetja e Partisë Demokratike Albana Vokshi ka dalë sot në një deklaratë për mediat ku ka akuzuar sistemin shëndetësor dhe ministrin Beqaj se për shkak të ilaçeve të falsifikuara që ministria ka futur në treg njerëzit po humbasin jetën. Vokshi ka bërë publik rastin e ndarjes nga jeta të një gruaje që sipas denoncimit të të shoqit ishte trajtuar me ilaçe jashtë standardeve. Sipas Vokshit dhe PD ndërhyrja e qeverisë për të lejuar importin paralel të ilaçeve ka dëmtuar rëndë sigurinë e medikamenteve dhe ka krijuar hapësira biznesi për klientelën pranë Edi Ramës e në kurriz të shëndetit të qytetarëve.

Por në një reagim nga Ministria e Shëndetësisë, ky institucion sqaron rastin e pacientes me inicielet SH. P që ka ndërruar jetë nga sëmundja.
 
Pacientja SH. P. vuante nga një sëmundje tumorale në tru që nga viti 2005, dhe po atë vit ka kryer një ndërhyrje të parë kirurgjikale. Në vitin 2009, sëmundja është rishfaqur, dhe për një periudhë dy-vjeçare pacientja është trajtuar me kemioterapi të linjës së dytë. Ndërkohë, në fillim të vitit 2013, ka bërë një ndërhyrje kirurgjikale jashtë shtetit, dhe pastaj është trajtuar me radioterapi. Në muajt korrik dhe tetor të vitit 2014, ajo është paraqitur në urgjencë, ku pas një vlerësimi imazherik dhe konsulte të plotë, ekipi mjekësor vendos trajtimin me kemioterapi, përfshirë edhe përdorimin në këtë skemë, të barit “Bevacizumab”. Në fund të vitit 2014, ka realizuar ciklin e parë të kemioterapisë, dhe fatkeqësisht, nuk ka mundur që të realizojë ciklet vijuese, pasi pacientja ndërroi jetë”, sqaron Ministria e Shëndetësisë. 

Ndërkohë, përsa i përket, akuzave të PD  për barna jashtë standardeve, MSH sqaron se barnat që vendosen në treg në Republikën e Shqipërisë qoftë ato që janë të regjistruara, apo qoftë ato që ligji i’a lejon ministrit t’i vendosë me leje të posaçme importi në treg, kanë një origjinë gjeografike të mirëpërcaktuar dhe përmbushin të njëjtat kërkesa që lidhen me importimin e tyre në Shqipëri. Barnat furnizohen nga subjekte të liçensuara për tregtim barnash që plotësojnë tërësisht kushtet për tregtimin e këtyre barnave. 


Deklarata e plotë e deputetes së PD, Albana Vokshit
Shëndetësia e Edi Ramës është sot para akuzës më të rëndë publike.Kemi një viktimë, që sipas familjarëve të saj, vjen si pasojë e trajtimit të papërgjegjshëm e korruptiv nga administrata e spitalit publik.Qytetari Ilir Pojako, ka denoncuar dje publikisht, se bashkëshortja e tij u nda nga jeta, sipas dyshimeve tashmë të përsëritura se trajtohej me një ilac jashtë standarteve, i falsifikuar.Pak kohë më parë, Ilir Pojaku e shprehu shqetësimin e tij edhe në media, se Altuzani që përdorej në komioterapi, nuk ishte origjinal, e nuk po jepte efekte. Ndarja nga jeta e bashkëshortes së tij, një ditë më parë i përforcon edhe më shumë këto dyshime.Futja e ilaceve të falsifikuara në treg, e ka origjinën në modifikimin ligjor që i bëri Ministri i Shëndetësisë tenderit, i nxitur nga interesat e lobeve të farmaceutikës, për të lejuar importin paralel të ilaceve. Kjo ndërhyrje e qeverisë, ka dëmtuar rëndë sigurinë e medikamenteve, dhe ka krijuar hapësira për biznes për klientelën pranë Edi Ramës, në kurriz të shëndetit të qytetarëve.
Eshtë kriminale, lejimi i importimit të barnave pa certifikatë sigurie dhe pa informacion për vendin e origjinës.Sipas një raporti te FDA (Food and Drug Administration), ALTUZAN rezulton të jetë një medikamet i falsifikuar. (ja ku është edhe njoftimi i FDA, të cilin PD e ka bërë publik edhe ne Konferencën për shëndetësinë në dt 31 korrik 2014).Ky rast u denoncua pak kohë më parë publikisht edhe nga një aktivist i njohur i shoqërisë civile. Cili ishte reagimi i qeverisë. Të ndjerës, bashkëshortes së Ilir Pojakut iu hoq kempi pas dyshimeve që shprehu në media, ndërsa Galdini kallëzoi në polici kërcënimet që kishte marrë pasi u shpreh në publik për dyshimet e tij.
Një skemë e mirëfilltë kriminale, e dirigjuar nga klani mafioz që ka kapur shëndetësinë.Ministria e Shëndetësise dhe Qëndra Kombëtare e Kontrollit të Barnave duhet të përgjigjet se:
-Në cilat kushte është kryer transporti i Altuzanit, Herceptines, Mabteres, Velcades?
-Kujt i janë dorëzuar rekordet e temperaturave?
-Kush mban pergjegjesi për cilësinë?
-Edhe sa qytetarë duhet të humbin jetën, që Edi Rama të reagojë. Deri ku shkon etja kriminale për pasurim i klientelës së tij, në kurriz të shëndetit e jetës që qytetarëve.
Eshtë rasti që Porkuroria të nisë një hetim të plotë e të thellë. Përgjegjësit e këtij rrjeti kriminal e vrasës, duhet të dalin menjëherë para ligjit.


Reagimi i Ministrisë së Shëndetësisë
Në përgjigje të deklaratës së sotshme (11/02/2015) të Deputetes së Partisë Demokratike, znj. Albana Vokshi, kemi detyrimin institucional dhe përgjegjësinë morale për të sqaruar opinionin publik se: Së pari, pacientja SH. P. vuante nga një sëmundje tumorale në tru që nga viti 2005, dhe po atë vit ka kryer një ndërhyrje të parë kirurgjikale. Në vitin 2009, sëmundja është rishfaqur, dhe për një periudhë dy-vjeçare pacientja është trajtuar me kemioterapi të linjës së dytë. Ndërkohë, në fillim të vitit 2013, ka bërë një ndërhyrje kirurgjikale jashtë shtetit, dhe pastaj është trajtuar me radioterapi. Në muajt korrik dhe tetor të vitit 2014, ajo është paraqitur në urgjencë, ku pas një vlerësimi imazherik dhe konsulte të plotë, ekipi mjekësor vendos trajtimin me kemioterapi, përfshirë edhe përdorimin në këtë skemë, të barit “Bevacizumab”. Në fund të vitit 2014, ka realizuar ciklin e parë të kemioterapisë, dhe fatkeqësisht, nuk ka mundur që të realizojë ciklet vijuese, pasi pacientja ndërroi jetë.  Sigurisht që, në ditët e sotshme, pavarësisht përmirësimit dhe përdorimit të metodave bashkëkohore të suksesshme e të përparuara të trajtimit, për fat të keq, shumë prej sëmundjeve malinje, në të cilat përfshihet edhe diagnoza e patologjisë prej së cilës vuante shtetasja në fjalë, përfundojnë në fatalitet kudo në Botë. Ndonëse ekzistojnë shumë pyetje e përgjigje për këtë temë, shumë këshilla e studime kërkimore, ende sot e kësaj dite nuk është bërë e mundur që një bar apo mjekim i veçantë t’i çrrënjosë apo zhdukë këto lloj patologjish. Ndërkohë, përsa i përket, akuzave tërësisht të pathemelta dhe tymnajës panikndjellëse, me të cilën PD na ka mësuar rëndom tashmë, për barna jashtë standardeve, apo edhe më keq akoma, të falsifikuara, dëshirojmë të ritheksojmë sërish për opinionin publik se, barnat që vendosen në treg në Republikën e Shqipërisë qoftë ato që janë të regjistruara, apo qoftë ato që ligji i’a lejon ministrit t’i vendosë me leje të posaçme importi në treg, kanë një origjinë gjeografike të mirëpërcaktuar dhe përmbushin të njëjtat kërkesa që lidhen me importimin e tyre në Shqipëri. Barnat furnizohen nga subjekte të liçensuara për tregtim barnash që plotësojnë tërësisht kushtet për tregtimin e këtyre barnave.Këto proçedura zbatohen për çdo bar që importohet në Shqipëri, dhe Ministria e Shëndetësisë konfirmon me përgjegjësi të plotë se janë zbatuar edhe për barnat për të cilat ka patur një pyetje publike sot, përfshirë edhe kushtet specifike të transportit. Lidhur me citimin e sotshëm për një raportimin të FDA-së (Food and Drug Administration), informojmë se bëhet fjalë për një keqinformim të qëllimshëm të opinionin publik shqiptar. FDA-ja nuk ka denoncuar barin Bevacuzimab, me emërtimin tregtar Altuzan të prodhuar nga kompania Roche, por FDA-ja, ka konstatuar në pranverë të vitit 2012, një sasi të caktuar (me numër serie B6021) të falsifikuar të barit në fjalë.Po ashtu, edhe EMA (Euroepean Medicine Agency) ka publikuar në prill 2014 disa numra specifikë serie për shumë barna të vjedhura në Evropë, përfshirë edhe barinHerceptine të prodhuar nga kompania Roche Registration Ltd., apo Alinta, të prodhuar nga kompania Eli Lilly Nederland BV, ose Remicade i prodhuar nga kompania Janssen Biologics BV.Konfirmojmë me përgjegjësi se asnjë nga këto seri barnash nuk është importuar në Shqipëri. Agjencia e Barnave (AKBPM) ndjek në mënyrë të përditshme raportimet ndërkombëtare për falsifikimin e barnave. Ndërsa, përsa i përket akuzave për ndikimin e lobeve të farmaceutikës, sot është dita për t’i kujtuar Opozitës se deri në shtator 2013, këto lobe kanë penguar që barnat të tregtoheshin në Shqipëri po aq sa edhe në vendet e origjinës.Sot, falë vizionit, punës dhe përkushtimit tonë, ka një situatë krejt të re në tregun e barnave. në përmbushje të angazhimit se barnat nuk do të jenë më shtrenjta se në vendet e origjinës, keim ulur çmimin e tregtimit të barnave prej rreth 30%.Të njëjtat barna, dhe për të njëjtën sasi, të vendosura në treg në vitin 2013, sot kushtojnë 50 milion dollarë më pak. Përfitojnë shqiptarët që i blejnë, përfiton fondi i rimbursimit të barnave, përfiton furnizimi spitalor.Ndërkohë, në këto 17 muajt e parë në detyrë, i’a kemi dalë të sigurojmë furnizim më të plotë e të vijueshëm të spitaleve tona me barna e materiale mjekësore. Gjithashtu, kemi një listë barnash të rimbursueshme që për vitin 2014 kishte 56 më tepër barna se sa në vitin 2013, dhe sasitë janë më të mëdha, duke i’a dalë të dyfishojmë fondet për barnat citostatikë. Sigurisht, që ligji i ri barnave dhe ligji i ri i materialeve mjekësore që miratuam në korrik 2014, si dhe Agjencia e re Kombëtare e Barnave dhe Pajisjeve Mjekësore do të rrisin sigurinë e barnave dhe materialeve mjekësore. Sot opozita arriti një tjetër rekord teksa publikisht akuzon Ministrinë e Shëndetësisë përse është e paaftë të shërojë sëmundjen e kancerit. Ndërkohë, puna vazhdon. Ndryshimet reale po vijnë.

 



Redaksia online
(f.m/shqiptarja.com)