PD-PDIU, vota kundër Vangjel Dules
Aleati i majtë, numri 2 i Kuvendit

TIRANË - Emri i kreut të PBDNJ, Vangjel Dule, propozuar nga e majta në postin e nënkryetarit të Kuvendit solli përçarjen e votave ntë opozitës, i cili arriti siguroi mbështetjen e vetëm 105 deputetëve. Deputetët e PDIU-së, Aqif Rakipi, Omer Mamo, Tahir Muhedini, Dashamir Tahiri, Shpëtim Idrizi por dhe deputetët demokratë Gerti Gogdani, Mesila Doda, Liljana Elmazi dhe Gjovalin Bzhetaj si dhe Alban Zeneli  votuan kundër tij. Në një reagim të tyre, deputetët e PDIU, sqaruan se “grupi parlamentar i PDIU-së vendosi të votonin kundër me karton dhe jo me elektronik gjatë mbledhjes së sotshme të Kuvendit, si një simbol proteste ndaj zgjedhjes si nënkryetar i Kuvendit të Shqipërisë i Vangjel Dules”. Zyra e shtypit rikujton se, kundërshtimi i grupit parlamentar të PDIU-së ishte prezantuar që në mbledhjen e konferencës së kryetarëve nga kryetari i PDIU-së, njëherazi kreu i grupit parlamentar, Shpëtim Idrizi.

Batutat
Kuvendi i Shqipërisë u përfshi dje në debate dhe batuta mes dy kambeve politike, ku shkak u bë vendimi për hedhjen në votim për lirimin nga detyra të anëtarëve të dorëhequr të KQZ, Albana Shtyllës si dhe Denar Bibës. Replikat u shkëmbyen mes kreut të Kuvendit dhe ish-drejtuesit të PD, Sali Berishës, ku si për ironi, të dy iu drejtuan njëri-tjetrit me termin “bashkëkryetar”. “E vlerësoj shumë shqetësimin tuaj bashkëkryetar i opozitës për tu ndalur dorën socialistëve që kanë ardhur në pushtet që të mos heqin socialistët që ju keni mbajtur në administrtaë”, ishte përgjigja e Metës, kundër akuzave që u bënë nga Berisha për pushimin e administratës nga detyra.

Konsensus
Grupi i PS-së me 65 deputetë do të kryesohet sërish nga deputeti Gramoz Ruçi; grupi i PD-së do të ketë 45 deputetë, që do drejtohen nga Edi Paloka; grupi i LSI-së kryesohet nga Petrit Vasili dhe përbëhet nga 16 deputetë; grupi i PR-së ka kryetar Fatmir Mediun dhe përbëhet nga 7 deputetë, ndërsa grupi i PDIU-së me 7 deputetë do të drejtohet nga Shpëtim Idrizi. Kuvendi zyrtarizoi 8 komisionet e përhershme parlamentare që merren me shqyrtimin e projektligjeve të propozuara nga qeveria.  Sipas vendimit të miratuar me unanimitet (120 vota) u ra dakord që pesë nga këto komisione të drejtohen nga përfaqësues të maxhorancës dhe tre të tjerët nga opozita. Ndërkohë, Kuvendi vendosi që kryesimi i komisioneve të Medias, Integrimit dhe Çështjeve Sociale t'i kalojë Partisë Demokratike të opozitës. Deputeti demokrat Genc Pollo do të drejtojë komisionin e Medias; Majlinda Bregu do drejtojë komisionin e Integrimit dhe Albana Vokshi komisionin e Çështjeve Sociale. Nga rendi i ditës u hoq pr/vendimi për lirimin nga detyra të anëtarëve të dorëhequr të KQZ-së, pasi opozita ngriti pretendimin se kjo çështje nuk ishte diskutuar në mbledhjen e kryetarëve të grupëve.

Shkrimi u publikua sot (27.09.2013) në gazetën Shqiptarja.com (print)

Redaksia Online
(a.ç/shqiptarja.com)

TAG:
• kqz