PD: Zgjedhjet me damkë turpi
dhe me vota të tjetërsuara

TIRANË - Partia Demokratike ka reaguar sot pas shpalljes së rezultatit përfundimtar zyrtar të zgjedhjeve të 23 qershorit.

Në një deklaratë, të bërë publike nga zëdhënësja e PD, Laura Vorpsi zgjedhjet, pasi u quajtën "një proces zgjedhor, i cili shënoi arritje në lidhje me standardet e organizimit", janë cilësuar edhe me "damkë turpi" dhe me "vota të tjetërsuara".

"Në Lezhë PS tentoi t’i vidhte një mandat PD-së, siç bëri në Dushkun e vitit 2001. Në Shkodër pati qindra vota të vjedhura. Një transparencë e plotë tregoi se si PS tjetërsoi votën e shqiptarëve", u tha në deklaratë.

Duke vijuar më tej, në deklaratë u shtua fakti se "ishte Lezha, që i vuri damkën e turpit zgjedhjeve". Vorpsi theksoi se PS, që në fillim i shpalli luftë organit më të lartë të zgjedhjeve KQZ-së në mënyrë sistematike.

DEKLARATA E PLOTË E PARTISË DEMOKRATIKE
Me vendimin e sotëm formal, të votuar nga katër anëtarë, KQZ përmbylli një proces zgjedhor i cili shënoi arritje, në lidhje me standardet e organizimit, dëshmoi vullnetin pozitiv të mazhorancës për organizimin e zgjedhjeve sipas standardeve, përkundrejt minimit që PS i bëri procesit, duke tërhequr anëtarët nga KQZ.

Vendimi i sotëm dhe vullneti i dëshmuar i PD dhe aleatëve të saj, për një proces të lirë dhe të ndershëm zgjedhor nuk mund ta shlyejë vulën e turpit, me vjedhjen e votave që u provua në sytë e publikut dhe vëzhguesve vendas e ndërkombëtarë.

Në Lezhë, PS tentoi t’i vidhte një mandat PD, që të arrinte shumicën e cilësuar me 84 vota, njësoj siç bëri me Dushkun, në 2001. Në Shkodër u zbuluan qindra vota të vjedhura nga koalicioni PS-LSI. Një transparencë e plotë, e bazuar në provat që disponohen, do tregonte qartë mënyrën se si Partia Socialiste tjetërsoi votën e qytetarëve, pas angazhimit për fitore me çdo mjet, përfshirë përdorimin e parave të pista dhe angazhimin e kontigjentëve kriminalë. Lezha i vuri damkën e turpit fitores së Partisë Socialiste, ashtu sikurse Dushku në 2001!

Që nga fillimi, PS i shpalli luftë KQZ, organit më të lartë për organizimin e zgjedhjeve dhe këtë e bëri në mënyrë sistematike, të qëllimshme dhe antikushtetuese. Qëllimi i PS ishte i thjeshtë, të shndërronte në organ të vetëm për zgjedhjet Kolegjin Zgjedhor, të cilin siç edhe u dëshmua e kontrollonte lehtësisht.

Për fat të keq, Kolegji kapitulloi para presioneve cka u dëshmua publikisht përmes njëanësisë së tij, duke pranuar çdo kërkesë të bërë nga PS dhe LSI. Kolegji vendosi hapur dy standarde në gjykim, duke anuluar “de facto” kapituj të tërë të Kodit Zgjedhor me vendimet e tij dhe duke shkelur Kushtetutën, me vendimin për shpalljen e rezultatit të zgjedhjeve.

Partia Demokratike është e vendosur për transparencën e shkeljeve dhe vënien para drejtësisë të përgjegjësve të këtyre shkeljeve. Pa këtë proces demokracia dhe shteti ligjor do të futen në një spirale të rrezikshme dhe me pasoja të rënda për fatet e vendit dhe të çdo qytetari shqiptar!

Redaksia Online
(mag/shqiptarja.com)

TAG:
• kqz