PDIU, KQZ zëvendëson nesër
Muçën, deputetja e re Elena Xhina

Kuvendi i Shqipërisë ka shpallur vakancë për një anëtar të saj, pasi Bujar Muça, deputet i zgjedhur në listat e PDIU-së, në qarkun Elbasan dha dorëheqjen dhe dorëzoi mandatin katër muaj pasi e kishte fituar. 

Nëpërmjet shkresës nr. 3042/1 prot., të datës 1 dhjetor, drejtuar KQZ-sё, Sekretari Përgjithshëm i Kuvendit Genci Gjonçaj, njofton krijimin e vakancës për shkak të heqjes dorë nga mandati i deputetit të Kuvendit të Shqipërisë të Bujar Muça, deputet i zonës zgjedhore, Qarku Elbasan. Neni 164 i Kodit Zgjedhor përcakton se në rast të ndërprerjes së mandatit të deputetit, Kuvendi njofton KQZ për krijimin e vakancës dhe KQZ merr vendim për dhënien e mandatit kandidatit të radhës në listën shumemërore të së njëjtës parti politike në zonën zgjedhore përkatëse, regjistruar sipas nenit 67 të Kodit Zgjedhor. 

Rezulton se lista shumemërore e Partisë Drejtësi Integrim dhe Unitet në Qarkun Elbasan i plotëson të gjitha kriteret e barazisë gjinore, dhe në këto kushte nuk bëhen kapërcime në listën e kandidatëve. Për sa më sipër, mandati i ndërprerë duhet t’i kalojë kandidatit vijues të listës së Partisë Drejtësi Integrim dhe Unitet në Zonën Zgjedhore Qarku Elbasan, Elena Xhina. Referuar Ligjit të dekriminalizimit, sipas të dhënave të deklaruara në formularin e vetëdeklarimit dhe informacionit të ardhur nga Drejtoria e Përgjithshme e Burgjeve dhe Drejtoria e Përgjithshme e Gjendjes Civile asnjë kandidatë nuk është në kushtet e ndalimit.

Sipas listës shumemërore të Partisë Drejtësi Integrim dhe unitet për Qarkun Elbasan kandidati i radhës është kandidati me numër rendor 3 (tre) Elena Josif Xhina. Për këtë çështje, KQZ do të mblidhet të mërkurën në orën 12 për të kryer zëvendësimin.

Redaksia Online
l.q/Shqiptarja.com

TAG:
• kqz