POP 5

Lajmet më të lexuara të 5 minutave të fundit

Bota

Përgjaket protesta në Mianmar, policia vret dy protestues, plagos 20 të tjerë

Të paktën dy vetë u vranë nga armët e zjarrit në Mianmar të shtunën ndërsa forcat e sigurisë përdorën fishekë luftarakë, plumba gome, gaz lotësjellës, ujë me presion të lartë dhe mjete të tjera kundër protestuesve që demonstronin kundër grushtit ushtarak të shtetit që ndodhi në atë vend me 1 shkurt.

Të paktën dy vetë u vranë nga armët e zjarrit në Mianmar të shtunën ndërsa forcat e sigurisë përdorën fishekë luftarakë, plumba gome, gaz lotësjellës, ujë me presion të lartë dhe mjete të tjera kundër protestuesve që demonstronin kundër grushtit ushtarak të shtetit që ndodhi në atë vend me 1 shkurt.

Rreth 500 policë dhe ushtarë u mblodhën në një kantier detar në qytetin e dytë më të madh të vendit, Mandalay, për të shpërndarë punonjësit dhe demonstrues të tjerë, gjë që shkaktoi një përballje disa orëshe gjatë së cilës protestuesit hodhën gurë me llastik ndaj policisë.

Forcat e sigurisë shpërndanë protesuesit duke përdorur armët e zjarrit dhe mjete të tjera force, ndërsa lanë dy të vdekur dhe 20 të plagosur, sipas faqes së lajmeve në internet Irrawaddy.

Demonstruesit, banorët e zonës dhe gazetarët thuhet se u larguan pasi forcat e sigurisë i ndoqën ata, duke sulmuar një grup gazetarësh me gaz lotsjellës dhe mjete të tjera.

Forcat e sigurisë kanë shtuar gjithnjë e më shumë dhunën kundër protestuesve, të cilët janë përleshur me forcat e sigurisë së Mianmarit që kur ushtria arrestoi udhëheqësen de fakto Aung San Suu Kyi dhe zyrtarë të tjerë të qeverisë civile më 1 shkurt.

Ushtria shpalli gjendjen e jashtëzakonshme një vjeçare, nën pretendimet për mashtrime të gjera në zgjedhjet e përgjithshme të nëntorit të vitit të kaluar, të cilat u fituan bindshëm nga Lidhja Kombëtare për Demokraci e udhëheqëses Aung San Suu Kyi. Pretendimet e ushtrisë janë hedhur poshtë nga komisioni elektoral.

Që nga ajo kohë, dhjetëra mijëra demonstrues kanë dalë në rrugët e qyteteve më të mëdha të Mianmarit, duke sfiduar shtetrrethimin e rreptë dhe ndalimin e grumbullimeve të më shumë se katër personave. Protestuesit kanë mbajtur parulla pro-demokracisë dhe foto të udhëheqëses Suu Kyi. Gjatë tubimeve ata mbajnë tre gishta lartë, një shenjë rezistence kundër tiranisë që është përhapur nga filmi shumë i njohur “Hunger Games”.

Përveç protestave, punonjësit e qeverisë dhe të sherbimit civil janë hedhur në grevë, çfarë ka shkaktur ndërprerje të trenave në mbarë vendin. Ushtria ka dhënë urdhër për kthimin në punë të punonjësve të shërbimit civil duke i kërcënuar se do të ndërmeren veprime ndaj tyre. Edhe punonjës nga sfera të tjera të jetës kanë braktisur punën gjatë ditëve të fundit.

Gjenerali i lartë Min Aung Hlaing, i cili udhëhoqi grushtin e shtetit, premtoi javën e kaluar në televizion se zgjedhjet e reja do të mbaheshin për të sjellë atë që ai e quajti “një demokraci të vërtetë dhe të disiplinuar”, por nuk dha hollësi se kur do të zhvilloheshin./VOA

/b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    27 Nëntor, 11:43

    Si e vlerësoni vendimin e GJKKO që liroi Berishën nga arresti shtëpiak?

Lajme të tjera



×

Lajmi i fundit

Ja pse 'lirimi' i Sali Berishës i gëzoi të gjithë

Ja pse 'lirimi' i Sali Berishës i gëzoi të gjithë

27 Nëntor, 23:04 nga Flogert Muça