Arrihet marrëveshja! Rama: Sot do të punohet në Kakavijë edhe gjatë natës! Nga nesër kush hyn në Greqi 1 javë në karantinë! Qytetarët: Jemi shumë të gëzuar (VIDEO)

Qytetarë që mbushin shishet me ujë, të tjerë që shtyjnë makinë, nëna me fëmijët e rraskapitur në krah...Kakavija këto 3 ditë ka ofruar gjithçka. Report Tv sjell nëpërmjet këtyre fotove gjithçka që nuk keni parë në kamera.

Qytetarët ndihen të lehtësuar pas vendimit për të zgjatur afatin e punës përtej orës 22:00. Për mikrofonin e Report Tv, ata shprehen se janë shumë të gëzuar, theksa vënë theksin se autoritet shqiptare u janë gjendur pranë me ujë dhe ushqime.

"Jemi shumë të lehtësuar. Ndihma ka qenë  e madhe, me ujë e ushqime, jna janë gjendur pranë. Nuk e kemi menduar fare që të kthehemi në shtëpi".

"Nata e tretë sot, shpresojmë që të kalojë. U gëzuam shumë, se edhe sot nuk do kalonim, mos të them edhe nesër. Nuk e menduar kurrë të ktheheshim pas, nuk ia vlente, hëngrëm 3 net këtu dhe të ktheheshim pas, nuk ia vlente të bëja tamponin 400 euro për 4 veta. Na dhanë ujë dhe ushqime, nuk them se na lënë pas dore", shprehen qytetarët.

Pas një dakordësie me kryeminstrin Edi Rama dhe qeverisë greke, arrihet marrëveshja! Pala greke do të punojë në Kakavijë edhe gjatë natës. Lajmi është dhënë nga kryeministri Edi Rama.

"Gjatë gjithë ditës kemi bashkëpunuar me palën greke në çdo nivel. Kemi gjetur mirëkuptim e gatishmëri dhe faktin është se e njëjta situatë është edhe në kufijtë e tjerë të Greqisë. Faleminderit për vazhdimin e punës gjatë natës sot dhe lutemi mirëkuptimin e qytetarëve në vijim", shkruan Rama.

Postimi i kryeministrit Edi Rama

Një vendim i tillë duket se do të lehtësojë situatën e krijuar prej 4 ditësh në Kakavijë, ku radha e makinave ka shkuar deri në 25 km.

Kreu i Emergjencave Civile, Haki Çako në një lidhje për Report Tv ka deklaruar se pavarësisht negociatave nga Shqipëria, nuk ka ende një përgjigje pozitive nga pala greke për të zgjatur afatin e punimeve përtej orës 22:00. Çako tha se ende nuk ka një konfirmim zyrtar nga ana e shtetit fqinj, për këtë arsye u ka bërë thirrje qytetarëve që të kthehen pas në shtëpitë e tyre, pasi e kanë të pamundur që të kalojnë.

"Me gjithë komunikimin intesive të autoriteteve shqiptare, ende nuk ka një konfirmim zyrtar për zgjatje të afatit për të punuar jashtë orarit 22:00. Prej orës 24:00 të datës së sotme, do të duhet të ndryshojnë procedura që do të thotë ditën e nesërme do të procedohen me 750 shtetas në Kakavijë dhe 300 në Kapshticë. Kjo është një situatë që duhet të detyrojë apo të përcjellë për të gjithë qytetarë detyrimit për t'u kthyer në shtëpi, janë procedura që u përkasin autoritete greke dhe nuk mund të ndikojmë. Jemi këtu me të gjithë autoritet shqiptare. Shpresojmë akoma, por nga konfirmimi i fundit do të vazhdojnë me të njëjtën procedurë. Ka pasur një intensifikim të punës ë bërë nga ana e institucioneve greke, në raport me ditën e djeshme ka pasur një numë të lartë të punës së tyre, që në maksimum ka shkuar deri në 3000 qytetarë", tha Çako për Report Tv.

Mes personave që ndodhen prej ditësh në radhët kilometrike në pikën kufitare të Kakavijës janë dhe fëmijë të vegjël, të cilët me pafajësinë e tyre përpiqen ta kalojnë këtë situatë mes lojërave dhe kërcimit me muzikën e makinave.

Në foton e shkrepur nga gazetari i "Report Tv" dy fëmijë të vegjël kanë bërë me duart e tyre të vegjël shqiponjën krenare të Shqipërisë.

Në sytë e tyre duket qartë lodhja, pagjumësia dhe mungesa e ushqimit. Me çantat në shpinë, emigrantët e vegjël po presin në radhë së bashku me prindërit e tyre  për të kaluar në kufirin grek.

Ata do të duhet që të kalojnë edhe një natë tjetër të mundimshme duke pritur që t'u vijë radha për të kaluar në vendin ku jetojnë prej vitesh.

Ushtria ndodhet në terren në mbështetje të qytetarëve në situatën e vështirë që po kalojnë. Ministrja e Mbrojtjes, Olta Xhaçka ka shpërndarë disa foto nga momente e punës të efektivë te FA-së, teksa vë në pah dhe solidaritetin e shumë shqiptarëve në këtë situatë të vështirë që po kalohet në kufi.

"Si në çdo situatë të vështirë, edhe kësaj radhe shqiptarët shkëlqejnë me solidaritetin e tyre. Operacionit për t'i ardhur në ndihmë qytetarëve në Kakavijë, i janë bashkuar edhe bizneset e mëdha në Gjirokastër që prodhojnë apo tregtojnë produkte ushqimore", shkruan Xhaçka.

Konsulli shqiptar në Janinë Eltion Verleni, deklaroi se janë në bisedime me palën greke, që të hapë kufirin edhe gjatë natës në Kakavijë. 

“Kemi folur me palën greke. Të gjitha janë pranuar pasi nga 2 mjekë janë bërë tre mjekë, nga dy sportele janë hapur 3 sportele. Gjithashtu është rritur stafi i palës greke. Po negociojmë që pala helene të hapë kufirin edhe gjatë natës. Jemi në negociata edhe për të shtuar numrin e qytetarëve shqiptarë që kalojnë kufirin. Sot kalojnë 4000 qytetarë, nga 1000 që ishin më parë. Kemi kërkuar që të shtohet staf mjekësor, staf në doganë etj", deklaroi Verleni.

Nga Kakavija, aty ku ndodhet prej disa orësh, ministrja e mbrojtjes Olta Xhaka u ka bërë thirrje qytetarëve që të kthehen pasi shanset për të kaluar kufirin janë pothuajse zero. Ajo ka bërë me dije se negociatat me palën greke po vijojnë për të rritur kapacitetin e mjekëve që bëjnë tampnin dhe të sportele, dhe për këtë thotë se ka një dashamirësi nga ana e shtetit fqinj për të gjetur një zgjidhje.

"Nuk i thyejmë dot rregullat, nuk vendosim politikën që vendos shteti fqinj, por mund të bëjmë që të kërkojmë më shumë kapacitet dhe njerëz që procesi të jetë me ritme më të mira, nga dje sot kemi përmirësim, qoftë qytetarëve brenda një ore qoftë me fluksin e gjithë ditës, por nuk është i mjaftueshëm, që e gjithë radha të mund të kalojë kufirin deri në momentin që do të hyjnë rregullat e reja.

Prandaj kemi njoftuar qytetarët që të ushtrojnë arsye, se një pjesë e madhe nuk do të arrijnë të kalojnë kufirin, dhe do ishte e udhës që të ktheheshin në shtëpi, dhe t'i nënshtrohen rregullave të reja. Kjo nuk është një situatë e zakonshme, nuk na e merrte mendja që do jetonim në një situatë të tillë ku e gjithë bota është paralizuar nga COVID dhe nuk duhet të sillemi sikur kjo nuk ekziston. E mirëkuptoj dhe pa diskutim në aspektin njerëzor jam e keqardhur për ata njerëz që kanë punë urgjente dhe tani kanë të drejtë me ngut për t'u kthyer, se bëhet fjalë për ata që kanë mundësi të udhëtojnë.

Nga ata që udhëtojnë janë 80% rezident, të tjerë nënshtetësi greke, që nuk bëhet fjalë për udhëtim turistik dhe ky korridor është i hapur vetëm për këtë kategori, që do të thotë nuk ka tendencë për t'i lënë njerëzit në radhe dhe pastaj për shumë shqiptar që janë rezident, që punojnë e jetojnë, paguajnë taksa dhe kontributor. Nuk ka tendencë, ne po informojmë njerëzit, që po njoftojnë njerëzit për ritmet e hyrjes, që të bëjnë llogaritë e tyre që nuk e kalojnë kufirin dot sot. Deri sa të mbyllet pika, shpresojmë që ky orar të shtyhet dhe ka predispozitë pozitive për të rritur kapacitet njerëzor, qoftë për mjekëve dhe për të shtuar sportele, por edhe kjo ka vështirësitë e veta, pavarësisht dashamirësish për ta ofruar.

Shpresojmë që orari të shtyhet.

Të gjithë po humbasim pak nga e përditshmja jonë në këto kohë. Kjo kategori udhëtarësh e kanë pasur mundësinë të lëvizin, kanë ardhur këtu për arsye të tyre, dhe për faktin se kanë lëvizur në kohë të paqarta kanë të detyruar t'u nënshtrohet këtyre masave. Nuk është vetëm Greqia, i ka vendosur Anglia e Francën, nuk protestuam kur Itali mbylli kufijtë, as kur i mbyllëm ne, sepse kjo ishte mënyra jonë për të mbrojtur qytetarët. Këto masa do i respektojmë. Maksimumi është që ritmet të jenë më të shpejta, por kjo nuk do e zgjidh problemin", tha Xhaçka.

Forcat e Armatosura kanë nisur një aksion të ri, atë të informimit të qytetarët për situatën që i pret. Me anë të një letre, e cila u është shpërndarë qytetarëve që ndodhen në radhë, ato u bëjnë thirrje që të kthehen në shtëpi, pasi është e pamundur kalimi drejt Greqisë për shkak të masave të marra nga shteti fqinj,. Ato bëjnë me dije se nga nesër do të kalojnë një numër i kufizuar i qytetarëve, të cilët duhet të kenë plotësuar formularin PLF, por edhe rezultatin e testit anti- COVID. Për këtë arsye, ato u bëjnë thirrje që të kthehen në shtëpitë e tyre në Shqipëri.

"Nisur nga situata e krijuar në dalje të Republikës së Shqipërisë, ku qytetarët janë dyndur për të dalë drejt shtetit grek, ju bëjmë thirrje se autoritet greke po zbatojnë masat e ndërrmara nga qeveria greke për parandalimin e përhapjes së pandemisë dhe për këtë arsye është e pamundur që të gjithë këta qytetarë të dalin nga Republika e Shqipërisë gjatë këtyre ditëve pasi nga dita e nesërme do të lejohen të kalojnë vetëm 750 shtetas të pajisur me PLF ndërsa nga data 17 gusht do të lejohen të kalojnë 750 shtetas nga Pika e Kalimit Kufitar Kakavijë dhe 300 shtetas nga PKK Kapshticë, të cilët përveç PLF duhet të jenë të pajisur edhe me rezultatin e testit negativ për COVID19, ndërsa pika e kalimit do të funksionojë nga ora 06:00-22:00. Ndaj i bëjmë thirrje të gjithë qytetarëve që të kthehen në banesat e tyre në Shqipëri pasi e kanë të pamundur kalimin drejt Greqisë", shkruhet në letrën që Forcat e Armatosura kanë shpërndarë tek qytetarët në radhë.

Letra që Forcat e Armatosura kanë shpërndarë tek qytetarët në radhë

Disa qytetarët shqiptarë që po protestojne në pikën kufitare të Kakavijës, për të kaluar në kufirin grek, pretendojne se punonjësit e ambulancave dhe efektivët e policisë kanë kaluar njerëz pa radhë. Akuza qe tani për tani mbteten pa asnje lloj konfirmimi, edhe pse te gjithë qytetaret atje jane ta pajisur me celulare për te dokumentuar abuzimet  e pretenduara, nuk kane ofruar ndonje deshmi filmike te qarte. 

Sipas tyre, ambulancat kanë kaluar pa radhë njerëz të njohur. Njeri prej qytetareve deshmon se jane kaluar edhe autobuse pa radhe, te cilet shtojne numrin e personave qe lejohen te kalojne nga autoritetet greke, ndersa makinat me pasagjere vazhdojne te presin ne radhet e gjata prej kater ditesh.

"Ambulancat kanë marrë njerëz dhe i kanë kaluar lart në doganë. Si ka mundësi që  pame tërë natën ambulancat lartë e poshtë duke transportuar njerëz për të kaluar kufirin, ndërsa sot s'ka asnjë ambulancë. Ku është ministri i Jashtëm", deklaruan qytetarët shqiptarë që po presin në doganë.

Pas pritjes së gjatë prej katër ditësh, emigrantët shqiptarë kanë bllokuar rrugën në shenjë proteste.

Qytetarë të shumtë kanë zbritur nga makinat e tyre dhe janë vendosur në rrugë, për të protestuar për shkak të radhëve të gjata dhe procedurave të stërzgjatura të palës greke në pikën kufitare të Kakavijës. Në rrugë ndodhen edhe makina policie.

Në videon e publikuar shihet se në rrugë kanë dalë rreth 40 persona.

Ditën e djeshme  kaluan kufirin 6788 persona. Te gjithe me leje qendrimi, ose pasaporta greke Nëpërmjet doganës së Kakavijës kanë kaluara 2270 persona, një numër shumë i ulët krahasuar me qytetarët që ndodhen në radhe, ndërsa nga Kapshtica kanë dalë një numër më i lartë i personave, më konkretisht 4518.

"Ne PKK Kapshtice në total kanë dalë 4518 shtetas nga të cilët  3452 shtetas shqiptar me leje qëndrimi greke,1066 shtetas të huaj nga të cilët 1057 me pasaporta e karta identiteti Greke, 3 shtetas me pasaporta turke, 2 dy shtetas me pasaporta  franceze dhe 4 shtetas me pasaporta polake. Ne PKK Kakavije kanë dalë në total kanë dalë 2270 shtetas nga të cilët  1376 shtetas shqiptar leje qëndrimi greke dhe 894 shtetas te huaj  nga këto 877 shtetas me pasaporta e karta identiteti Greke, 1 shtetas me pasaporta hungareze, 4 shtetas me pasaporta nga mbretëria e bashkuar , 1 shtetas me pasaporta nga mali i zi , 2 shtetas me pasaporta nga Qipro, 1 shtetas me pasaportë nga SHBA, 4 shtetas me pasaporta nga ukrahina dhe 4 shtetas me pasaporta bullgare", bëjnë me dije burime zyrtare per Report Tv.

Forcat e Armatosura prej më shumë se 24 orësh ndodhen në Kakavijë, në ndihmë të qytetarëve të cilët prej 4 ditësh janë në një situatë të pazakontë! Ato kanë shpërndarë ujë për dhjetëra qytetarë të cilët po presin në radhë për të kaluar drejt Greqisë.

Shumë reagime dhe kritika ka patur sidomos në dy ditët e fundit për situatën e krijuar në Kakavijë ku mijëra qytetarë janë bllokuar për shkak se kërkojnë të kalojnë në Greqi, shtet që ka vendosur disa kushte për shkak të pandemisë.

Radha është bërë kilometrike dhe temperaturat e larta e kanë vështirësuar shumë situatën. Për këtë arsye policia e shtetit, për ti ndihmuar paksa, ka shpërndarë shishe me ujë. Shumë qytetarë marrin edhe nga ose tre, për shkak se udhëtojnë me familjarët e tyre.

Pala greke në pikën kufitare të Kakavijës ka mbyllur portën në tokën neutrale. Mbyllja e portës sipas policit grek është se bërë që të mos ketë radhë dhe fluks të qytetarëve në kufirin grek dhe më pas do të hapet sërish për të marrë të tjerët që janë në radhë përtej portës në tokën shqiptare.

Kjo ka sjellë tensionim të qytetarëve të cilët prej ditësh po presin në radhë për të kaluar drejt territorit grek.

"Rrini këtu deri sa të pakësohet numri i shtetasve poshtë në kufi. Pastaj do vijmë këtu dhe ta hapim. Thjesht qetësohuni", ka thënë polici.

Ndërkohë qytetarët e mbetur pas portë janë të tensionuar dhe të lodhur nga ecjet në këmbë por dhe qëndrimi tre ditë në rrugë të bllokuar.

Ministrja e Mbrojtjes Olta Xhaçka u ka bërë thirrje qytetarëve të mos udhëtojnë më drejt Greqisë dhe se ata që presin në radhë prej 4 ditësh të kthehen pas, deri në normalizimin e situatës.

Ajo tha se Forcat e Armatosura po qëndrojnë në krah të qytetarëve duke i ndihmuar me nevojat bazike. Xhaçka shprehet se fatkeqësisht nuk mund të bëjnë dot asgjë përpara rregullave të vendosura nga qeveria greke si pjesë e masave kufizuese për pandeminë dhe se numri i kalimit të qytetarëve është i kufizuar nga pala greke.

Ditën e sotme situata në Kakavijë është përkeqësuar ku radha e mjeteve ka shkuar deri në 25 kilometër pranë fshatit Grapsh.

"Forcat e Armatosura vijojnë të qëndrojnë në Kakavijë për t'i ardhur në ndihmë çdo qytetari që qëndron në radhë, por gjithësecili duhet të jetë i ndërgjegjshëm që këto janë masa të diktuara për parandalimin e COVID-19, nga një shtet tjetër. Numri i qytetarëve që lejohet të kalojnë është mjaft i kufizuar dhe kalimi i të gjithë atyre që janë aktualisht në radhë fatkeqësisht është i pamundur. Ndaj, bëjmë thirrje që jo vetëm qytetarët e tjerë të mos drejtohen drejt pikave kufitare me Greqinë, por edhe ata që presin në radhë të kthehen në banesat e e tyre, deri në normalizimin e situatës", shkruan Xhaçka.

Nga pamjet e siguruar nga Report Tv, disa nga qytetaret kanë mbërritur në pikën kufitare të Kakavijës këmbë të ngarkuar me valixhe e çanta në krahë. Të rraskapitur nga rruga dhe të paushqyer, qytetarët kanë krijuar një radhë të gjatë në pikën kufitare pranë sporteleve duke u mbledhur në grumbuj me shpresën për të kaluar.

Ata kanë bërë në këmbë kilometra të tëra, kush 13 km dhe kush 17km , pasi autobusët i kanë lënë në rrugë dhe nuk mund të kalojnë për shkak të bllokimit të rrugëve. Mes personave që kanë ecur në këmbë ka pasur edhe fëmijë, të cilët janë të rraskapitur dhe të dehidratuar.

"Kam ardhur nga Gjirokastra në këmbë, kam bërë 17 kilometra', tha një qytetar,

"Kam ecur për 3 orë nga fshati Jorgucat për të ardhur këtu", tha një tjetër.

Autobusët kanë lënë në rrugë qytetarët duke i zbritur nga mjetet edhe pse ato ndodhen me kilometra larg pikës kufitare të Kakavijës për të kaluar në territorin grek. Qytetarët janë zbritur nga autobusët dhe janë detyruar të marrin në krah çantat dhe valixhet e tyre të udhëtimit dhe të nisen në këmbë drejt pikës së kalimit kufitar.

Shkak për këtë është bërë aksidentit tragjik i ndodhur në fshatin Bularat, ku  policia ka bllokuar zonën për inspektimin e vendngjarjes së aksidentit, duke mos lejuar më kalimin e mjeteve.

Qytetarët do të bëjnë me dhjetar kilometra rrugë në këmbë në temperatura të larta, pasi radha e mjeteve ka shkuar në 25 km deri në fshatin Grapsh.

"Po ecim në këmbë pasi autobusët na lanë në rrugë, na thanë zbrisni së nuk mund të kalojmë më tej", tha një qytetare

"Na kanë dalë autobusë 20 km larg, dhe jemi nisur në këmbë. Kam ditë që pres këtu. Ke 20 km pa ujë", tha një tjetër qytetar.

Drejtori i AKMC, Haki Çako ndodhet në Kakavijë për shkak të situatës së krijuar bashkë me 200 efektivët e Forcave të Armatosura  që prej mbrëmjes së djeshme në Kakavijë. Efektivët e FA nga Tirana, Berati dhe Gjirokastra kanë shpërndarë e vazhdojnë të furnizojnë qytetarët me ujë e ushqime. 1.5 mijë litra ujë e qindra paketa ushqimesh vijojnë të shpërndahen që dje

Policia u bën apel qytetarëve  që të mos dynden të gjithë  në një ditë drejt Kakavijës. Nga e hëna do të ketë masa më shtrënguese për të hyrë në Greqi. Një numër më i kufizuar do hyjë në shtetin grek. Gjithashtu do të merren masa jo nga policia shqiptare apo ajo greke por nga autoritetet shëndetësore greke. Drejtori i Departamentit të Kufirit  në Policinë e Shtetit,  Eduart Merkaj po zhvillon takime ne doganën greke me homologët e policisë kufitare greke që të mundësohet shtimi i personelit shëndetësor për realizimin e tamponeve.

Prej ditës së djeshme, Forcat e Armatosura janë në gatishmëri dhe në ndihmë të qytetarëve të bllokuara në pikën kufitare të Kakavijës. Ministrja e Mbrojtjes, Olta Xhaçka tha se autoritetet vijojnë komunikimet me qeverinë greke për të pasur lehtësim të procedurave për kalimin e qytetarëve, të cilët vijojnë të qëndrojnë të bllokuar në rrugë prej 4 ditësh.

Gjithashtu qytetarëve u është dhënë ndihmë ushqimore, shëndetësore dhe asistencë për higjienën  sanitare.

"Autoritetet diplomatike janë në komunikim të vazhdueshëm me palën greke për lehtësimin e procedurave, ndërkohë Forcat e Armatosura e kanë gdhirë me qytetarët që qëndrojnë në radhë në Kakavijë duke ofruar ndihmë shëndetësore, ndihma ushqimore, ujë të pijshëm dhe asistencë për higjienën sanitare në terren. FA në krye të detyrës!", shkruan Xhaçka.

Epike mjekësore, automjete të posaçme me ujë, tualete të lëvizshme dhe ushqime u janë siguruar qytetarëve nga pasditja e djeshme, ku autoritete u vunë në lëvizje për situatën e rënduar në Kakavijë, ku ditën e sotme radha ka shkuar në 25 kilometra.

Report Tv siguron pamjen me dron të radhëve 25 kilometra të gjata në aksin nacional Gjirokastër-Kakavijë nga fshati Grapsh deri në fshatin Vrisera.