Përmbytjet në Vlorë, tenderët dhe kontratat për rrugët e kanalizimet në 'sitën' e KLSH-së! Prokuroria ende asnjë hetim!

Një grup auditi i KLSH prej dy ditësh ka zbarkuar në Bashkinë e Vlorës dhe në Shoqërinë Rajonale të Ujësjellës-Kanalizime në varësi të Ministrisë së Infrastrukturës. Burimet thanë se audituesit po kontrollojnë dokumentet e tenderëve dhe kontratat me privatët për disa investime që janë bërë kohët e fundit në qytet. Ndërsa Prokuroria e Vlorës ende nuk e ka nisur hetim për përgjegjësit e përmbytjes edhe pse PD-ja depozitoi kallëzim penal për shpërdorim detyre dhe banorët denoncuan publikisht bllokimin e kanalit të ujërave të larta.

Katër ditë pas përmbytjeve, në pjesën më të madhe të qytetit është rikthyer normaliteti por lagjet më të goditura si “Rilindja” apo rruga “Rruga Albano e Romina” janë të pushuara nga balta. Po kështu dhe fushat e sportit në Lungomare.

Përmbytjes së 4 tetorit nuk i shpëtoi as lagjja historike e Vlorës, ku siç shihet në pamjet e kamerave të sigurisë, rruga në pak minuta u shndërrua në lumë, duke marrë përpara karrige e tavolina.

Nuk ka ende një bilanc të dëmeve, por grupet e vlerësimit kanë dalë të terren, ku siç është premtuar nga qeveria dhe bashkia banorët do kompensohen për banesat, ndërsa biznesi do përfitojë lehtësira fiskale.

 

R.D/S.G/Shqiptarja.com

TAG:
• KLSH
• Vlore
• permbytjet ne vlore
• bashkia vlore
• tendera