Plagosja e shefit të Krimeve
Skura transportohet drejt Italisë

TIRANE- Rreth orës 11: 10 Shefi i krimeve të Rënda të Burrelit u transportua me një Ambulancë nga Spitali Ushtarak drejt aeroportit të Rinasit dhe më pas me avion sanitar do të udhëtojë drejt spitalit të Foggias në Itali, për një mjekim më të specializuar.  Musa Skura, 48 vjeç, baba i 3 fëmijëve u plagos gjatë një operacioni për arrestimin e disa të kërkuarve pasditen e 13 janarit (e dielë). Skura iu nënshtrua ndërhyrjes kirurgjikale mbrëmjen e së dielës, ndërkohë që mjekët u shprehën se gjendja e tij lejon transportin me avionin e specializuar sanitar.

Prej orës 09:00 një ambulancë ndodhej në Spital Ushtarak dhe pritet të transportojë komisarin drejt aeroportit të Rinasit, ku ndodhet avioni sanitar i cili do e transportojë drejt Foggias.  Transportimi Musa Skurës ishte parashikuar të kryhej në orën 10:00  por u vonua rreth një orë.  Gjatë kësaj kohe mjekët s'dhanë asnjë informacion në lidhje me gjëndjen shëndetësore, nëse mund të jetë përkeqësuar, apo jo, çka mund të detyronte shtyrjen e transportimit. Ndërkohë që në orën
10:35 minuta në spital Ushtarak mbërriti drejtori i Policisë së Shtetit Hysni Burgaj. Burime të Shqiptarja.com bënë të ditur se mjekët shqiptarë e italianë po bënin konsultën e fundit para se shefi i krimeve të vendoset në Ambulancë për t'u dërguar drejt aeroportit të Rinasit, nga ku do niset drejt Italisë. Në orën 11:14 në Spital Ushtarak mbërriti edhe Ministri i Brendshëm Flamur Noka dhe ministi i Shëndetësisë Vangjel Tavo.



(Në foto Musa Skura në spital ushtarak)

Në spitalin "San Paolo", të Foggias, Komisari pritet t’i nënshtrohet një mjekimi më të specializuar, pasi gjendja e tij shëndetësore është kritike për jetën. Sot në mëngjes mjekët thanë se gjëndja shëndetësore e tij vazhdon të jetë me parametra stabël. Ministri i Brendshëm Flamur Noka deklaroi dje se qeveria ka një vendim për shpëtimin e jetës së shefit të krimeve, dhe transportimi i tij drejt Italisë do të bëhet me avion sanitar.

(foto: Familjarët duke pritur daljen me barrelë të të plagosurit)
 
Mjeku reanimator Fatbardh Kurti deklaroi dje se komisari kishte dëmtime në 5 organe nga plumbi. "Veshka e djathtë iu dëmtua u hoq fare. Çarje të stomakut iu qep. Shpretka, dëmtim të zorrëve të hodha e të trasha dhe pankreasit, të cilat u qepën."- tha dje Kurti.

Policia arrestoi mbrëmë Fitim Alla, 19 vjeç personi që dyshohet se qëlloi në drejtim të shefit të krimeve, Vilson Milkurtin, 18 vjeç, nga fshati Suç, Edison Sinan Lleshi 18 vjeç, si dhe shtetasi me inicialet A. Ll. 15 vjeç, ndërsa është bërë dhe shpallja në kërkim e shtetasit Riza Xhemal Barçi, drejtues i mjetit furgon përmes të cilit është transportuar municioni luftarak. Fitim Alla, 19 vjeç personi që dyshohet se qëlloi në drejtim të Shefit të Krimeve është plagosur në këmbë, por jo me plumb. Ai ndodhet në spitalin e Burrelit nën masa të forta sigurie. Ndërkohë nga strukturat e Policisë së Shtetit vazhdon puna për identifikimin e kapjen e personave të tjerë të përfshirë në këtë aktivitet Kriminal.

KOMITETI I HELSINKIT: SHTETI TE MARRE CDO MASE
Komiteti Shqiptar i Helsinkit ka shprehur keqardhjen për lajmin e plagosjes së rëndë të shefit të krimeve dhe i ka uruar z. Skura shërim të shpejtë.

KShH i kërkon shtetit qe të marrë të gjitha masat e nevojshme për kurimin e z. Musa Skura. Kur persona të tillë dëmtohen në krye të detyrës kurimi i tyre duhet të jetë detyrim nga ana e shtetit.

“KShH çmon të nevojshme të theksojë se zbulimi, hetimi dhe gjykimi i shpejtë i autorëve të këtij krimi të dyfishtë, plagosje e rëndë të oficerit të policisë në krye të detyrës dhe tregtimin e armëve, do të shërbente për ndëshkimin e fajtorëve, vënien në vend të ligjit të shkelur, parandalimin e krimeve të tjera të kësaj natyre, si dhe do të rriste motivimin e organeve të policisë dhe të mbarë shtetasve për të luftuar, pa rezerva, kriminalitetin, si dhe për respektimin e shtetit të së drejtës”, bwhet e ditur nw njoftimin e Komitetit Shqiptar tw Helsinkit.

KShH mbështet punonjësit e policisë, që shpesh herë gjatë plotësimit të detyrave kanë vënë në rrezik jetën e tyre. Sipas KShH, shteti ka për obligim të pajisë policinë me mjetet e duhura dhe të rritet profesionalizmi për kryerjen detyrës.

POLICIA: JA SI NDODHI PLAGOSJA
Policia e Shtetit doli pasditen e djeshme në një konferencë për shtyp për të dhënë detaje mbi operacionin ku mbeti i plagosur rëndë Shefi i Hetimit dhe Parandalimit të Krimit të këtij Komisariati, Komisar Musa Skura. Policia sqaroi se komisariati i policisë Mat kishte organizuar punën për të goditur një rast të shitjes së municioneve luftarake, me qëllim kapjen në flagrancë të autorëve të dyshuar dhe se gjatë momentit të arrestimit të dy të dyshuarve në vendin e quajtur Përroi i Keçit në fshatin Suç, njëri prej tyre ka qëlluar me armë zjarri automatik, duke plagosur Musa Skurën. Nga ndërhyrja e forcave të tjera pjesëmarrëse në operacion është bërë e mundur kapja e shoqërimi në Komisariat i autorëve të dyshuar: Fitim Hashim Alla 19 vjeç, banues në fshatin Rripe të rrethit Mat, si dhe Vilson Petrit Milkurti 18 vjeç, banues në fshatin Suç të rrethit Mat dhe 2 autorëve të tjerë të dyshuar për përfshirjen në veprimtarinë kriminale të shitjes së municionit luftarak, përkatësisht, Edison Sinan Lleshi, 18 vjeç, si dhe shtetasi me inicialet A. Ll. 15 vjeç, që të dy nga fshati Dom, rrethi Mat. Po ashtu është bërë dhe shpallja në kërkim e shtetasit Riza Xhemal Barçi, drejtues i mjetit furgon përmes të cilit është transportuar municioni luftarak.

"Nga tërësia e veprimeve hetimore e procedurale të kryera ka rezultuar se 4 shtetasit e sipërcituar kanë organizuar për të shitur disa shtetasve të tjerë një sasi prej 26 arka me municion (fishekë), të cilin e kanë transportuar përmes një mjeti furgon në vendin e ngjarjes, ku do të realizohej dhe shitja e tij. Në vendin e ngjarjes është gjetur dhe sekuestruar një armë zjarri automatik, tip kallashnikov. Gjithashtu gjatë kontrollit janë gjetur dhe sekuestruar edhe 8(tetë) kuti me municion luftarak fishekë model 56 mm, ku secila prej tyre mbante 720 copë fishekë.- deklaronte policia e shtetit.

Ndaj shtetasve Fitim Alla, Vilson Milkurti, Edison Lleshi dhe shtetasit me inicialet A. Ll. është marrë masa e arrestit në flagrancë dhe materialet do ti referohen Prokurorisë së Krimeve te Renda Tiranë për veprat penale “Vrasje në rrethana të tjera cilësuese e mbetur ne tentative e kryer në bashkëpunim”, si dhe “shitje dhe mbajtje pa leje të armëve dhe municioneve luftarake.” Ndërkohë nga strukturat e Policisë së Shtetit vazhdon puna për identifikimin e kapjen e personave të tjerë të përfshirë në këtë aktivitet Kriminal.


(Në foto Musa Skura dhe Fitim Alia, i dyshuar si autor i plagosjes)

Redaksia online
(sg/shqiptarja,.com)