Posta Shqiptare ka reaguar pas grabitjes që ndodhi mesditën e sotme në ambientet e Hipotekës së Tiranës. Posta ka rrëzuar policinë, e cila tha në njoftimin e saj se është grabitur pikërisht filiali i Postës Shqiptare nga një person me kapuç, duke sqaruar se në zyrat e këtij shërbimi nuk ka ndodhur asnjë grabitje. 

Në njoftimin për media, Posta sqaron se është grabitur një bankë e nivelit të dytë, ndërsa sportelet e Postës Shqiptare vazhdojnë normalisht shërbimin, duke garantuar siguri dhe cilësi maksimale.

"Posta Shqiptare Sh.A, u njoh me lajmin e publikuar në disa media, në të cilin pretendohej “Grabitja e Zyrës Postare të atashuar në ambientet e Hipotekës, Tiranë”, për të cilin sqarojmë dhe saktësojmë: Posta Shqiptare Sh.A u informua në lidhje me një grabitje që ka ndodhur në një Bankë të Nivelit të Dytë, në ambientet e sporteleve të zyrave të pritjes të Hipotekës, Tiranë.

Sipas informacioneve të marra nga organet kompetente, Sigurimi Postar dhe Policia e Shtetit, fatmirësisht rezulton se nuk ka patur dëmtime fizike në njerëz, dhe saktëson se kjo grabitje nuk ka ndodhur në Zyrën e Shërbimit Postar që operon në ambientet e brendshme të Hipotekës.

Duke shprehur keqardhje për këtë ngjarje, Posta Shqiptare dëshiron të informoj dhe të sigurojë të gjithë qytetarët që shërbimi nëpër sportelet e Postës Shqiptare vazhdon normalisht, duke garantuar siguri dhe cilësi maksimale", thuhet në njoftimin e Postës.

d.c./shqiptarja.com