Transportuesit privatë në Prishtinë kanë dalë në protestë sot pas vendimit për të pezulluar të gjitha linjat për shkak të mospagesës nga komuna. Atyre iu janë bashkuar edhe punonjësit e “Trafikut Urban” dhe kërkojnë zgjidhje për problemet e vazhdueshme me pagesat.

Protestës i është bashkuar edhe kryetari i Prishtinës, Përparim Rama, i cili ka shprehur mbështetje për kërkesat e transportuesve duke kërkuar ndërhyrjen e qeverisë për të zgjidhur krizën financiare që po ndikon edhe në funksionimin e transportit publik në kryeqytet.

 “Më vjen shumë keq se në çfarë niveli na ka sjellë kjo qeveri me bllokadë dhe e ndjej shumë për të gjithë këta punëtorë këtu që janë të papaguar për punën që e keni bërë për gjithë këta muaj për me i shërbyer qytetarëve të kryeqytetit, përkundër sabotazheve, bllokadave. E di që edhe ne, sikur ju, sikur me pas rrogën tënde në bankë, e një zyrtar i bankës atje mos me t’i lëshura paret. Kështu edhe qeveria po bën ndaj komunës. Paratë tona, të cilat i kemi të gatshme, nuk po na i lëshon për me i kry detyrimet tona ndaj jush. Prandaj, problemi është atje”, tha Rama.

Transportuesit privatë kërkojnë që Qeveria të sigurojë fondet e nevojshme dhe të rregullojë pagesat e vonuara, ndërkohë që protestuesit kanë paralajmëruar se do të vazhdojnë veprimet e tyre derisa të ketë një përgjigje konkrete nga institucionet. Problemet me pagesat e shërbimeve në Komunën e Prishtinës kanë ardhur si pasojë e mosmiratimit të buxhetit të komunës.

Ndërkohë, edhe punonjësit e Radio Televizionit të Kosovës (RTK) kanë hyrë sot në grevë për shkak të mosmarrjes së pagave. Sindikata e Punëtorëve të RTK-së ka njoftuar se greva do të zhvillohet çdo ditë nga ora 11:00 deri në 13:00, me pezullimin e punëve në të gjitha sektorët e institucionit.
 

Rendit zhvillimet sipas orarit:
Ora 11:20
'Pa paga, nuk ka punë!' Radio Televizioni i Kosovës në krizë financiare, punonjësit nisin grevën e përgjithshme

 

Punonjësit e Radio Televizionit të Kosovës (RTK) kanë hyrë sot në grevë për shkak të mosmarrjes së pagave. Sindikata e Punëtorëve të RTK-së ka njoftuar se greva do të zhvillohet çdo ditë nga ora 11:00 deri në 13:00, me pezullimin e të gjitha punëve në të gjitha sektorët e institucionit.

Punonjësit kanë dalë jashtë ambienteve të TV por edhe brenda ndërsa mbajnë në duar pankartat "Pa paga, nuk ka punë", "Greva është zëri ynë", "Grevë, dinjitet, zë" etj. Sipas sindikatës, vendimi për grevë vjen pas një periudhe të gjatë kërkesash të injoruara dhe për shkak të rrezikut për vazhdimësinë e RTK-së për shkak të pagave të bllokuara.

Edhe Shoqata Sindikale e Radio Kosovës ka njoftuar se, duke filluar nga dita e sotme, do të organizohet një grevë njëorëshe para ndërtesës së institucionit. Shoqata kërkon nga organet përgjegjëse ndërhyrje urgjente për të garantuar të drejtat ligjore të punëtorëve dhe për të siguruar funksionimin normal të RTK-së.

Sindikatat paralajmërojnë se greva do të vazhdojë deri në alokimin e buxhetit për RTK-në dhe se në ditët në vijim do të organizohen edhe protesta para Qeverisë dhe Kuvendit. Ata paralajmërojnë se mungesa e pagave dhe moszgjidhja institucionale rrezikon funksionimin e programeve dhe misionin publik të transmetuesit të vetëm shtetëror në vend.

Xh.D/Shqiptarja.com