Procedohet penalisht djali i Fahriut
kandidat i PD-së në Pogradec

Vendimi për të shfrytëzuar fëmijët me aftësi të kufizuara në fushatë mund t’i kushtojë shumë shtrenjtë Klevis Balliut, kandidat për deputet i Partisë Demokratike në Qarkun Korçë.

Burime brenda Prokurorisë së Korçës bëjnë me dije se menjëherë pas publikimit të këtij lajmi në media, ndaj djalit të Fahri Balliut ka nisur një procedim penal.

Mësohet se pamjet dhe filmimet e marra në atë takim janë vendosur në dispozicion të hetimeve.



(Klevis Balliu shpërndan dhurata te fëmijët me aftësi të kufizuara)

Me takimin elektoral të 1 qershorit me këta fëmijë, përveç tejkalimit të çdo norme morale, Balliu shkeli njëkohësisht dy ligje, kodin zgjedhor që pengon rreptësisht përdorimin e fëmijëve për qëllime politike dhe ligjin për të drejtat dhe mbrojtjen e fëmijëve.

Klevis Balliu është vendosur në qendër të vëmendjes mediatike për shkak të gafave të tij gjatë kësaj fushate.
 
Në një takim elektoral në Pogradec, i riu ish-këshilltar i Nishanit premtoi "diell demokratik për Pogradecin në datën 26 qershor", duke sjellë në vëmendjen e gjithëkujt Ferdinand Xhaferajn e 2011-ës kur u shpreh se do përmirësonte cilësinë e diellit. 

Por Balliu ka shkuar edhe më tej, po nga Pogradeci ai sulmoi degën e PD-së si dhe kryetarin e bashkisë i cili është gjithashtu i PD-së se s'kanë bërë asgjë për qytetin dhe e kanë lënë jetim atë. Për të mos përmendur më tej analfabetizimin e tij funksional në gjuhën shqipe aq sa edhe CV-në e dorëzuar në KQZ dhe formularin e dekriminalizimit e ka plotësuar me gabime drejtshkrimore. /Lexo.al

Redaksia Online
l.q/Shqiptarja.com

TAG:
• kqz
• gafa