Projektet e talentit të X-Factor
tashmë edhe në MTV

Ai është i ri dhe shumë i talentuar. Ardit Çuni deri më tani ka realizuar disa këngë, të cilat janë pëlqyer nga publiku shqiptar, ndërsa ka qenë pjesëmarrës edhe në disa kompeticione muzikore dhe talent shou. Këngëtari i ri këto ditë po firmos një tjetër sukses në karrierën e tij, të cilën sapo e ka filluar dhe po i ecën shumë mbarë.

Projektet muzikore të Arditit tashmë do të mund t'i shohim edhe në MTV si artisti i parë shqiptar me një kanal të tij. Ardit Çuni është bërë i njohur për “coverat” e tij në bashkëpunim me këngëtaren tashmë të njohur për tregun Eltina Minarolli, e cila është edhe bashkëprezantuese me Arditin dhe gjithashtu ideatore në emisionin më të ri në mbështetje të të gjithë talenteve të tiutlluar “Realizo Një Ëndërr”. Coverat si “Stay”,  “Diamonds”, “Russian Roulette”  kanë qenë shumë të transmetuara në kanalet muzikore shqiptare.


Një tjetër lajm i mirë është që kënga është shpërndarë edhe nga VEVO, e cila siç e dimë është rrjeti që menaxhon videot e yjeve me famë botërore si: Rihanna, Lady Gaga etj. Ata i kanë uruar fat Arditit për këtë produkt duke qenë se ai është edhe artisti shqiptar me një llogari në VEVO. Një ndër bashkëpunimet që Arditi, e cilëson si edhe më të sukseshmin ka qenë ai për 100 Vjetorin e Pavarësisë (ku ai ishte dhe bashkëkompozitor me Eltinën) i titulluar “Pranë njëri-tjetrit” ku morën pjesë dhe këngëtarët më me emër në Shqipëri si Myfarete Laze, Xhensila Myrtezaj, Kejsi Tola, Flaka Krelani, Eltina Minarolli etj.

Një tjetër projekt i rëndësishëm ka qenë “Real Love” në bashkëpunim me këngëtaren mjaft të pëlqyer Enca Haxhia. Ka kaluar pothuajse një muaj pas publikimit të klipit, një projekt i nisur nga Arditi në bashkëpunim me disa producente britanikë  dhe Eltina Minarollin. Klipi është realizuar me shumë kujdes nga Sebastian Production  dhe deri tani ky produksion është nominuar në UK si një nga klipet dhe këngët më cilësore në chartin botëror të Beat100, ku marrin pjesë dhe shumë këngëtarë të famshëm si Birdy, Avicii, Blue...



Shkrimi u publikua sot(14.09.2013) në gazetën Shqiptarja.com(print)
(v.gj/shqiptarja.com)