Projektet në Shqipëri dhe Serbi/ Dhëndri i Trumpit flet për investimet: Në Sazan uji është kristal si Maldivet! Kam ndjekur ligjet

Jared Kushner, dhëndri i ish-presidentit Donald Trump dhe një tjetër figurë e shquar në politikën amerikane, i kanë vënë syrin Ballkanit për 3 projekte transformuese të zonave në Shqipëri dhe Serbi. Përpjekja e Kushnerit në këtë rajon vjen teksa firma e tij e kapitaleve private me bazë në Majami, Affinity Partners po angazhohet në diskutime të avancuara për investime që tejkalojnë 1 miliard dollarë, me shpresën për të riformuar peizazhin e turizmit dhe pasurive të paluajtshme në Evropën Juglindore. Ndër projektet ambicioze është transformimi i ishullit të Sazanit në Shqipëri, dikur një bastion ushtarak, në një komunitet luksoz eko-resort.

“Aftësia për të zhvilluar 3 milje vijë bregdetare të bukur dhe një ishull 1400 hektarësh në mes të zemrës së Mesdheut është unike. Uji është blu kristal si Maldivet. Është i bukur. Plazhet janë të pabesueshme dhe është vetëm një nga këto vende të veçanta” – tha Kushner për The Post.

Bashkë me miqtë e tij, Ric Grenell, ish-ambasadorin e SHBA-së në Gjermani dhe zhvilluesin e NYC, Asher Abehsera, Kushner është tërhequr nga sektori i turizmit në Shqipëri, i nxitur nga zhvillimi i tij i shpejtë dhe vlerësimi ndërkombëtar.

Veçanërisht, Ksamili i Shqipërisë renditet ndër destinacionet kryesore globale në Airbnb, duke reflektuar daljen e vendit nga e kaluara e tij komuniste për t’u bërë një pikë e nxehtë për udhëtarët që kërkojnë bukuri të paprishura dhe intriga historie.

Dikur e quajtur “Koreja e Veriut e Evropës”, Shqipëria ka pësuar një evolucion dhe tani krenohet me stabilitetin makroekonomik, një industri turistike në rritje dhe një tërheqje në rritje për investitorët ndërkombëtarë. Të dhënat nga UNWTO (Organizata Botërore e Turizmit të Kombeve të Bashkuara) nënvizojnë ngjitjen e Shqipërisë si destinacioni turistik me rritjen më të shpejtë në Evropë, duke e pozicionuar atë përkrah peshave të rënda globale si Katari dhe Arabia Saudite.

Joshja nga Ballkani shtrihet përtej Shqipërisë, pasi Affinity synon një tjetër sipërmarrje në kryeqytetin e Serbisë, Beograd. Këtu, Kushner planifikon të rivitalizojë një zonë historike të mbetur bosh që nga bombardimet e NATO-s në 1999, duke parashikuar një hotel luksoz, hapësira tregtare dhe mbi 1500 rezidenca. Dhe nuk është e vështirë të kuptosh pse Kushner do të donte një copë nga ai byrek.

Një shkrim i New York Times e nënvizoi Beogradin si “kryeqytetin e ri koktej të Evropës”. “Ekziston edhe rëndësia historike e ndërtesës” – shpjegoi Kushner. “Transformimi i saj nga një moment pikëllimi, në një pikë referimi që do të krijojë vende pune dhe të ardhura për qytetin është diçka emocionuese për t’u përfshirë.”

Sipërmarrjet e Kushnerit përputhen me transformimin më të gjerë ekonomik të rajonit. Por nuk ka të bëjë vetëm me joshjen nga plazhet me rërë dhe ujëra të kaltra. Teksa Affinity po ndërmerr këto nisma të guximshme, Kushner është i vetëdijshëm për potencialin e tyre për të katalizuar zhvillimin e mëtejshëm në rajon, duke lindur ndoshta një vatër tjetër të turizmit dhe investimeve.

“Nuk do të jetë sekret për shumë më gjatë”, – tha Kushner. Ende në fazat e hershme të zhvillimit, nuk dihet se kur do të përfundojnë këto projekte.

Një draft i marrëveshjes i dhënë për The Times zbuloi se qeveria serbe do t’i jepte Kushnerit një qira 99-vjeçare pa pagesë dhe akses për të ndërtuar një hotel luksoz, një kompleks apartamentesh dhe një muze në vendin historik.

Por vendimi i Kushnerit për të investuar në Beograd nuk erdhi nga hiçi. Në vitin 2013, dy vjet para se të fillonte punën për të kandiduar për president, Trump i foli një zyrtari të lartë të qeverisë serbe për vizionin e tij për të ndërtuar një hotel luksoz në atë vend.

Përfaqësuesit nga “Organizata Trump” udhëtuan në Beograd për të vlerësuar vendin. Megjithatë, projekti dështoi të materializohej përpara zgjedhjes së Trump në 2016-ën. Pas inaugurimit të tij, ai u zotua të ndalte nisjen e ndonjë sipërmarrjeje të re biznesi ndërkombëtar. Pas largimit nga qeveria, Kushner themeloi Affinity, një firmë e kapitaleve private që ka grumbulluar asete prej 3.1 miliardë dollarësh.

Firma siguroi mbështetje të konsiderueshme nga investitorët e Lindjes së Mesme, veçanërisht duke marrë rreth 2 miliardë dollarë nga Fondi i Investimeve Publike të Arabisë Saudite. Megjithëse investimi i madh ka “rrudhur disa vetulla”, Kushner mbrojti financimin gjatë një samiti në Majami të sponsorizuar nga kompania mediatike Axios muajin e kaluar duke thënë se ai "ka ndjekur çdo ligj dhe rregull".

“Nëse më pyesni për punën që kemi bërë në Shtëpinë e Bardhë, për kritikët e mi, ajo që them është se çdo vendim që morëm që ishte në interes të Amerikës”, – tha Kushner. Për më tepër, Affinity po eksploron mundësi për investime në sektorë të tillë si energjia e rinovueshme, qendrat e të dhënave dhe inteligjenca artificiale. /Marrë nga The New York Post

B.K/Shqiptarja.com

TAG:
• Jared Kushner
• sazan
• ishulli i sazanit
• resorte ne sazan