Projekti ‘Qëndro në Shkollë’, Ministrja e Arsimit: Po punojmë për parandalimin e braktisjes shkollore! Programet tërheqëse ndikojnë për të identifikuar talentet

‘Qëndro në shkollë’ është projekti 3 vjeçar që po zbatohet pasi ka synim parandalimin e braktisjes shkollore. Në takimin që zhvilloi Ministrja e Arsimit dhe Sportit së bashku me përfaqësues nga Ambasada Italiane në Tiranë dhe UNICEF Shqipëri, Evis Kushi theksoi rëndësinë e këtij projekti që mbështet mjaft mirë politikat dhe programet arsimore në vend.

Kushi tha se efektet negative dhe dëmet mund të vijnë jo vetëm për vetë nxënësit, por edhe për familjet e tyre dhe shoqërinë.

Ministrja shtoi se po bëjnë një punë voluminoze nga të gjitha strukturat arsimore, duke nisur nga fillimi i çdo viti kur bëhet edhe identifikimi i nxënësve që kanë potencial të lartë për braktisje. Kushi theksoi se mësuesit kujdestarë, mësuesit ndihmës, punonjësit e shërbimit Psiko-Social, Oficerët e Sigurisë, në bashkëpunim edhe me prindërit, përpiqen maksimalisht që të krijojnë një klimë sa më familjare, të dashur dhe të ngrohtë për të gjithë.

"Programe si Arti dhe Zejet, Ekipet Sportive, Shkolla Qendër Komunitare e bëjnë shkollën më tërheqëse duke ndikuar drejtpërdrejt tek ata nxënës që kanë tendencë braktisjeje, pasi shkolla krahas mësimdhënies, identifikon edhe talentet e tyre, duke i angazhuar, motivuar dhe zhvilluar në mënyrën e duhur, pavarësisht suksesit në mësimnxënie", tha Kushi.

Në përfundim të fjalës së saj ministrja theksoi se të gjitha institucionet, ministritë e linjës, punonjësit arsimor dhe e gjithë shoqëria duhet të kontribuojë në parandalimin e hershëm të rrezikut për braktisjen.

Projekti ‘Qëndro në shkollë’ po zbatohet në partneritet me qeverinë italiane dhe UNICEF Shqipëri.

 

A.M./Shqiptarja.com

TAG:
• Evis Kushi
• ministria e arsimit