Pronat, publikohet formula e re 
25 mijë hektarë për kompensim

TIRANE- Agjencia e Kthimit dhe Kompensimit të Pronave është shumë pranë identifikimit të faturës së kompensimit që shteti shqiptar ka përballë pronarëve. Ka deklaruar kështu dje Sonila Qato, drejtore e AKKP, në tryezën e dytë të rrumbullakët me temë “Reforma Ligjore dhe Institucionale e AKKP-së”, lidhur me  marrëdhëniet ndërinstitucionale të AKKP me institucionet e treta. Sipas saj, nevoja për t’i dhënë zgjidhje procesit të tejzgjatur të kthimit dhe kompensimit të pronave është tashmë shumë emergjente. Kjo gjë, jo vetëm referuar ngërçit të madh që krijon anomalia e madhe e pronave për një zhvillim të qëndrueshëm ekonomik, por edhe për shkak të faturës me të cilën mund të përballet buxheti i shtetit nga vendimet e pritshme të Gjykatës së Strasburgut.