Tkurrja e protestës, organizatorët: S'numërohen numrat, por ditët që jemi në shesh! Protestuesit me gjuhë dhune: Ta tërheqim zvarrë Ramën, pushtetin ia marrim edhe me forcë

Protestuesit kanë përfunduar fjalimet para kryeministrisë dhe kanë nisur marshimin e zakonshëm në rrugët e Tiranës.

Nga sheshi para kryeministrisë, protestuesit kanë reaguar për lajmin se qeveria do të shfuqizojë ligjin e investimeve strategjike. Ndërsa ritheksoi se kjo është arritje e protestës, aktivisti Edison Lika tha se Marta Kos është vendosur me “shpatulla pas murit” për t’i thënë Shqipërisë që nuk ka anëtarësim në BE pa shfuqizim të ligjit.

Lika shtoi se edhe ata kanë kusht që mos të ketë integrim në BE me Ramën, një deklaratë që shfaqet si cenim ndaj një aspirate të rëndësishme të vendit.

“Aleatja e Ramës, Marta Kos, sot qenka vendosur me shpatulla pas murit. Qenka detyruar të thotë që i kemi vënë kusht Shqipërisë që ta shfuqizojë ligjin 21/24 që para se të fillonin protestat. Marta Kos ka pasur sa të duash kohë ta thoshte këtë gjë. Falë jush sot është detyruar që nuk ka anëtarësim në BE pa shfuqizimin e ligjit 21/24. Siç Marta Kos i ka vënë kusht shfuqizimin e ligjit, edhe ne i themi Marta Kosit që nuk ka integrim me Edi Ramën. Këto ligje nuk është se janë miratuar në mënyrë të pavetëdijshme. Kjo ka qenë mënyra si kjo qeveri ka zaptuar çdo hapësirë private e publike për 13 vite. Na e ka pamundësuar jetesën në Shqipëri. 1 nga 1 do të bien ligjet dhe i fundit do të bjerë Edi Rama me gjithë sistemin që ka ngritur”, tha Lika.

Një tjetër protestues foli për 4.2 mln eurot që qeveria alokoi përmes një akti normativ për mbarëvajtjen e koncertit të Kanye West. Ai e cilësoi reperin amerikan një racist, për të cilin tha se në Europë nuk i lejohet hyrja. Sipas tij, Shqipëria duhet të merrte para për ta pranuar reperin dhe jo t’i jepte.

“Shqipëria është e bukur, por në vend që të zhvillohet turizmi, po promovohet Kanye West, një racist që në Europë nuk i lejohet hyrja, ne nxjerrim 4.2 mln euro. Ne duhet të merrnin para për ta pranuar këtu, jo të jepnim, se gjysma e botës nuk e pranon”, tha ai.

Një protestues tha se tashmë qytetarët mund t’ia marrin kryeministrit Rama pushtetin me dhunë, ndërsa shtoi se “meriton vdekjen.”

“Kemi 45 ditë sakrificë. Kjo është falje për krye, se ne e kemi forcën t’ia marrim me dhunë që në këtë sekondë. Ai nuk e ka monopolin e forcës. Monopolin e forcës e ka populli. Ju jeni kapur në tradhti kombëtare dhe meritoni vdekjen. Ne po ju falim, por ne po të duam ju heqim që tani me forcë”, tha protestuesi.

Ndërsa u rilexuan sërish kërkesat e protestuesve, konkretisht dorëheqja e kryeministrit, qeveria tranzitore, ndryshimet kushtetuese dhe anulimi i ligjeve respektive për zonat e mbrojtura dhe investimet strategjike, një prej tyre e cilësoi “arritje” shfuqizimin e këtij të fundit.

Vetëm pak minuta më parë, kryeministri Rama e konfirmoi shfuqizimin e ligjit për investimet strategjike në Konferencën e 9-të Ndërqeveritare në Bruksel.

“Anulimi i ligjit për zonat e mbrojtura, duket që i ka zënë frika dhe këto ditë një ish-ministër kishte thënë që ligji i investitorëve strategjikë nuk do të rinovohet më. Nëse kjo është e vërtetë, këtu kemi edhe një tjetër arritje të kësaj proteste. Ata nuk guxojnë ta rinovojnë më këtë ligj”, tha protestuesi.

Thirrjet e protestuesve para kryeministrisë kanë marrë tone të dhunshme, duke iu larguar qasjes paqësore të ditëve të para. Njëri prej tyre kërkoi që Forcat e Armatosura “të tërheqin zvarrë” kryeministrin.

“I bëjmë thirrje Forcave të Armatosura ta tërheqim zvarrë atë ndyrësirë nëpër rrugët e Shqipërisë. Kjo të jetë sa më e shpejtë. Ai është aty në krye dhe kërkon gjakderdhje nga shqiptarëve. Forcat e policisë dhe ushtrisë do të bashkohen me popullin se janë bijtë e tij”, tha protestuesi.

Edhe një tjetër protestues foli sërish për aktin normativ 4.2 mln euro për mbarëvajtjen e koncertit të Kanye West. Ai tha se me ato para do ishin blerë pajisje mjekësore.

“Lekët që i ke dhënë amerikanit, me to kishim blerë 47 ambulanca. Me këto 4 milionë euro kishim blerë deri në 8 mijë krevate dhe 5 mijë kondicionerë. Pacientët tanë do të ishin më komodë në spitalet tona. Por në ëndërr do t'i shohim këto pajisje, po nuk u rrëzua ky kryeministër”, tha protestuesi.

Organizatorja e protestës, Luciana Kokaj reagon pas tkurrjes së protestuesve në shesh. Ajo thotë se nuk do të numërohen numrat, por ditët që kanë qëndruar në shesh kundër qeverisë së Ramës.

“Nuk do numërohen numrat por ditët që jemi në shesh. Do numërohet se sa shumë u ka ardhur në majë të hundës shqiptarëve”, tha ajo.

Një protestuese riktheu sërish vëmendjen te koncerti i reperit amerikan Kanye West që u mbajt në Tiranë më 11 korrik. Ajo akuzoi Ramën se vodhi buxhetin e shtetit, duke dhënë 4.2 mln euro përmes një akti që e cilësoi antikushtetues. Ajo tha se Rama mendon se mashtron ndërkombëtarët me atletet e bardha, por ata e dinë se kush është.

"Ne jemi këtu për Shqipërinë, për t'i thënë stop tranzicionit 36-vjeçar. Ju s'mund ta mbani të ardhmen e popullit shqiptar peng. Shqiptarët dhe e gjithë bota e kanë kuptuar fytyrën e Ramës, mashtrues, i cili me atletet e veta kujton se do t'i mashtrojë liderët ndërkombëtarë. Ata e dinë kush jeni ju, që jeni një autokrat që keni vjedhur buxhetin bashkë me bashkëpunëtorët tuaj. Shembulli më tipik është kur i dhatë një këngëtari tallava 4,2 milionë dollarë. Është e turpshme të vidhni buxhetin në kundërshtim me Kushtetutën. Jeni manipulator i opinionit publik. Por tashmë ju ka ardhur fundi", tha protestuesja.