26 janari është njoftuar si dita e nisjes së protestave në Mal të Zi e Maqedoni, çka do të bllokojë qarkullimin të mjeteve të tonazhit të rëndë në pikat kufitare. Autoritetet malazeze kanë njoftuar se Shoqata e Kamionistëve do të nisë protestën në orën 11:30 dhe do të zgjasë rreth 48 orë.

Vendkalimet kufitare me Malin e Zi:

Muriqan - Sukobin 

Han i Hotit – Bozhaj 

Grabom – Podgoricë 

Vermosh - Guci

Ndërsa në Maqedoninë e Veriut, hyrja e mjeteve të transportit të mallrave është bllokuar në 00:01 të së hënës dhe në orën 12:00 do të bllokohet edhe dalja. Bllokimi përjashton automjetet e transportit të bagëtive dhe barnave.

Protesta në Maqedoninë e Veriut është planifikuar të zgjasë rreth 7 ditë.

Vendkalimet kufitare me Maqedoninë e Veriut:

Bllatë– Banja

Qafë Thanë– Kafasan

Goricë– Stenje

Në pikat kufitare me Malin e Zi e Maqedoninë e Veriut do të lejohen të kalojnë automjetet e vogla, të emergjencës dhe të transportit të pasagjerëve. Autoritetet kanë bërë thirrje për subjektet e transportit dhe për qytetarët që të informohen dhe të marrin masat e nevojshme për të shmangur vonesat dhe problematikat gjatë kësaj periudhe.

Shkak për protestën është sistemi i ri i hyrje-daljes në vendet e zonës Shengen, i cili kufizon qëndrimin e shoferëve të kamionëve nga Ballkani Perëndimor. Sistemi i ri i hyrje daljeve të BE-së, i projektuar për të regjistruar lëvizjen e shtetasve të vendeve të treta në kufijtë e jashtëm të Zonës Shengen, sipas shoferëve ballkanas që transportojnë mallra, kërcënon aftësinë e tyre për të punuar, duke sjellë vonesa të gjata dhe procedura më të ndërlikuara në pikat kufitare.