Mbrëmjen e djeshme, protestuesit shkuan në zonën e dedikuar për tifozët e ndeshjeve të kupës së botës, duke u kërkuar të çohen e t’iu bashkohen atyre në tubim. Kryeministri Edi Rama ka postuar një moment nga kjo ngjarje, duke shkruar se këto turma rrisin presionin mbi hapësirën demokratike falë rrugëve.

Një pjesë të madhe të fajit, shefi i qeverisë ia faturon internetit si një platformë që ka shërbyer për linçimin e fabrikimin e gënjeshtrave duke manipuluar qytetarët si dhe për rritjen e bullizmit dhe mbështetjen e fushatave të organizuara të damkosjes.

‘Për hir të ardheut’ thotë Rama, ai grup protestuesish vendosën se kishin të drejtë të frikësonin qytetarët e tjerë duke e paraqitur “intimidimin si aktivizëm dhe linçimi publik i tradhtarëve si drejtësi e Zotit në emër të popullit.”

Reagimi i Edi Ramës

NJË NGA MËSIMET E VYERA TË HISTORISË është se ekstremizmi e kërkon pushtetin duke filluar me rrugën.

Një grup vendos se ka të drejtë të frikësojë të tjerët për hir të atdheut. Britma zë vendin e argumentit. Rrethimi zë vendin e dialogut. Intimidimi paraqitet si aktivizëm dhe linçimi publik i tradhëtarëve si drejtësi e Zotit në emër të popullit.

Kështu vepruan lëvizjet ekstremiste në Europën e paraluftës dhe kështu bëjnë edhe sot, duke e rritur eksponencialisht presionin mbi hapësirën demokratike falë rrugëve pa kontroll të internetit.

Kush nuk mendon si turma bëhet objekt i bullizmit masiv online, i fyerjeve, kërcënimeve, linçimit publik dhe fushatave të organizuara të damkosjes. Qëllimi nuk është debati. Qëllimi është heshtja. Të krijohet një klimë ku njerëzit zgjedhin të heshtin, jo sepse nuk kanë ç’të thonë, por sepse kostoja e të folurit bëhet shumë e lartë.

Historianët bien dakord se terrori i rrugës fillon me akte që duken “të vogla”, me sharje, intimidim, poshtërim publik, marshime rrugësh automobilistike dhe sulme të përzgjedhura ndaj individëve, ndërkohë që turma digjitale shumëfishon frikën dhe presionin.

Videoja më poshtë nga qendra e Tiranës mbrëmë flet vetë dhe është një tjetër pasqyrë ku mund të shihet çdokush që sheh qytetari demokratike në fjalorin e kësaj proteste, që nga tribuna e sharjeve, tek koret e linçimeve dhe ulërimat e marshuesve.