TIRANË- Kur kanë mbetur edhe pak ditë nga protesta e 12 nëntorit thirrur nga ‘Rithemelimi’, Edi Paloka ka provokuar kryeministrin Edi Rama. Paloka heq një paralele me protestën e përgjakshme të 21 janarit, duke thënë se Rama duhet të qëndrojë një zyrën e tij në Kryeministri kur turma do jetë në protestë, njësoj siç bëri Berisha atë ditë. 

Është e vërtetë që Berisha ndenji në godinë, madje ka pasur edhe foto të tij në dritare, nga ana tjeter Edi Rama nuk ka qëndruar në zyrë kur janë zhvilluar protestat e opozitës, sipas tij me qëllim që të mos provokojë turmët.  Nga ana tjetër, është po aq e vërtetë gjithashtu që Berisha për “t’u vetëmbrojtur” nga protestuesit në 21 janar 2011 vrau 4 prej tyre të paarmatosur dhe pa asnjë sjellje të dhunshme. Duket se Paloka, e ka harruar këtë moment.

 “Ka diskutime ide se si duhet të vijohet me protestat, se një protestë nuk i jep fund gjithçkaje, kjo duhet të ikë nga mendjet e njerëzve. Të ishte kështu e kishim bërë me kohë. Duhet vullneti i organizatorëve të jetë i palëkundur për qëllimin e ku do shkojë protesta, apo protestat. Kemi hyrë ne primare e para kemi zgjedhjet lokale. nuk kemi dyshime që ndryshimi vjen me votë. Duhet të krijojmë kushtet si opozitë që shqiptarët të votojnë lirisht e grevat e protestat janë ato që do përdorim për të arritur tek vota e lirë. Që Rama të llogarisë pasojat, që nuk do të jenë më si ato që ka përballur deri tani, deklarata boshe që kanë mbetur vetëm aty. Ram ka një të mirë që sa herë ka protesta largohet. Blindon dyert me hekura, e di ai çfarë frike ka, por përderisa e ka frikën duhet të ketë edhe një arsye.

Problem nuk është hyrja në Kryeministri, duam të heqim qeverinë jo ca karrige e as të prishim pikturat e Ramës. Të rrijë në zyrë si burrë e të shohë si e pa Berisha më 21 janar”, tha ai në një intervistë televizive.

Ky krahasim i Palokës, duket si një mesazh se ‘Rithemelimi’  është përgatitur për një protestë me tensione.