PS feston 31-vjetorin e themelimit! Bëhen bashkë të gjithë figurat që kanë kontribuar ndër vite! Festës i bashkohet edhe Xhixho e Braimllari nga LSI si dhe Agron Duka

Partia Socialiste ka festuar në një takim privat pa praninë e mediave 31-vjetorin e themelimit të saj. Të mbledhur para oborrit të selisë së PS-së shumë zyrtarë dhe ish zyrtarë të PS-së ishin të pranishëm në festë. Në fotot e bëra publike shihet kryeministri Edi Rama, njëkohësisht kreu i PS-së duke u takuar përzemërsisht me ish-kryetarin e Kuvendit Gramoz Ruçin si dhe deputetin e PS-së Erion Braçen. 

Në 31-vjetorin e Partisë Socialiste midis shumë figurave të kësaj force politike, Rama është ndalur të pozojë edhe me gazetarët, ku një ndër to ishte e ftuar edhe ish-zëdhënsja e ish-kryeministrit Berisha, Erla Mëhilli në vitet 2007-2013.

Po ashtu nga ana tjetër kryetari i grupit parlamentar Taulant Balla është parë në një tryezë bashkë me deputeten e LSI-së Erisa Xhixhon si dhe Endrit Braimllarin.

Deputetja e LSI-së Erisa Xhixho dhe sekretari i Përgjithshëm i LSI-së Endrit Braimllari kanë marrë pjesë në ditëlindjen e Partisë Socialiste. Siç shihet edhe nga fotot e siguruara nga Report Tv, dy perfaqësuesit e LSI-së i janë përgjigjur pozitivisht ftesës së organizatorëve për të marrë pjesë në festë, ndërsa kryetarja e LSI-së, Monika Kryemadhi, nuk ka pranuar ftesën për të qenë pjesë e organizimit të PS për ditëlindjen e 31.

Pandeli Majko ka uruar 31 vjetorin e Partisë Socialiste. Në kujtim të kësaj dite socialisti ka shpërndërë një urim veçantë.

Deputeti ka zgjedhur një foto të Fatos Nanos dhe Dritëro Agollit për të përcjellë mesazhin e tij në këtë ditë të rëndësishme për socialistët.

“Shumica e jetës së njeriut, është veprimtari plotësuese.

Ka çaste, kur rastësia kthehet në diçka të përsosur, siç ishte 12 qershori i 31 viteve më parë.

Gëzuar ditëlindjen Familja ime, Partia Socialiste!’ shkruan Majko.

Datëlindja e Partisë Socialiste nuk ka pasur vetëm urime nga simpatizantët dhe pjesë e politikës së majtë por edhe nga opozita. Një 'urim' ka ardhur edhe nga ana e ish-kryeministrit Sali Berisha. Sipas tij, kjo parti po feston ditën e pagëzimit të saj të tretë, pasi është themeluar 1941 nga serbët. Në këto 9 vite pushtet sipas Berishës PS ka izoluar Shqipërinë nga Bashkimi Evropian.

"Partia Socialiste kremton sot si parti-shtet përvjetorin e ndërrimit te emrit! Te dashur miq, Sot, partia e PPSH feston diten e pagezimit te saj te trete me emrin qe mbart sot. Ajo u themelua me 8 nentor te vitit 1941 nga serbet Miladin Popoviç dhe Dushan Mugosha si Partia Komuniste e Shqiperise. Per shkak te genocidit dhe krimeve kunder njerzimit qe kreu gjate luftes si nje parti terroriste e vertete, pas lufte emri u nderrua nga PKSH ne Partia e Punes se Shqiperise dhe perseri per shkak te genocidit dhe krimeve kunder njerezimit qe ajo si parti-shtet, nen udheheqjen e diktatorit gjakatar Enver Hoxha kreu per dekada ne pushtet, u detyrua qe me 12 qershor te vitit 1992, te ndryshoje emrin ne Partia Socialiste e Shqiperise.

Pas disa perpjekjeve te bera nga Fatos Nano dhe nje grup te rinjsh per reformimin e saj, kjo parti nen udheheqjen e Edi Rames eshte shendrruar perseri ne nje parti-shtet e lidhur gjeresisht ne kreun e saj, me drogen, krimin dhe vjedhjet e medha te fondeve dhe pasurive publike.

Kjo parti sot, nen drejtimin e Edi Rames kremton pervjetorin e nderrimit te emrit si parti e veprave me te zeza dhe mynxyres se vertete kombetare si parti antikombetare qe shnderroi Tiranen ne Beogradin e Vogel qe u shet shqiptarve interesat e Serbise per interesa te Shqiperise, dhe qe duke zbatuar platformen e Vaso Çubrilliviçit, perzuri ne 4 vite 540 mije shqiptare nga Shqiperia. Kjo parti, me ne krye Edi Ramen, ndertoi narkoshtetin e pare dhe te vetem ne Europe dhe si parti shtet, instaloi pas 31 viteve, monizmin e plote ne Shqiperi! Keto 9 vite ne pushtet, Partia Socialiste mbylli dyert e BE-se per Shqiperine! Edi Rama, ne krye te PS me lidhjet e tij te krimit, shnderroi Shqiperine ne epiqender operative te organizatave kriminale te rajonit, Europes, Amerikes se Veriut e Amerikes se Jugut dhe Lindjes se Mesme", shkruan Berisha. 

Spiropali uron PS-në për 31 vjetorin: Kemi shkruar kapitull njerëzor në historinë e kombit, partia jonë, ishull që nuk e prek e liga

31 vjetori vjetori i Partisë Socialiste ka bërë që personazhe publik të botës politike të urojnë përmes rrjeteve sociale. I tillë ishte edhe urimi i Ministres së Shtetit për Marrëdhëniet me Parlamentin, Elisa Spiropali. Ministrja e konsideroi ecurinë e partisë socialiste si një hapjembyllje sysh në jetën e një kombi. Për të, partia është një refleks i shoqërisë shqiptare si dhe një ishull që nuk e prek e liga.

"Gëzuar socialistë të Tiranës dhe Shkodrës, të Korçës dhe Kukësit, të Durrësit, Elbasanit, Vlorës, Tropojës e gjithë Shqipërisë; gëzuar të gjithë socialistëve dhe progresistëve kudo gjenden në këtë përvjetor të krijimit të partisë së tyre që sot mbush 31 vjeç. 31 vjet janë vetëm një hapjembyllje sysh në jetën e një kombi, por janë shumë për një jetë njerëzore. Dhe në këto 31 vjet, ne, socialistët shqiptarë kemi shkruar një kapitull njerëzor në historinë e kombit tonë. Ne bëmë po bëjmë punën e disa brezave njëherësh për t’i trashëguar brezit të fëmijëve tanë Shqipërinë evropiane, Shqipërinë krenare për çfarë është dhe çfarë do të jetë!

Ne besuam aty ku shumëkush dyshonte, ne qëndruam kur shumë vendosën të ikin, ne ndërtuam aty ku të tjerët merrnin kazmat e shkatërrimit, ne kuruam me dhembshuri atë që të tjerët e sëmurën, ne shihnim dhe shohim nga e ardhmja, aty ku të tjerët projektonin dhe projektojnë të shkuarën. Partia Socialiste është bashkimi i themeluesëve të djeshëm, i opozitarëve krenarë që i dhanë vendit alternativën e të majtës moderne, e shtetformuesve të mandatëve të para dhe punëtorëve modestë të të sotmes.

Partia jonë është refleks i shoqërisë shqiptare, me të mirat dhe defektet e saj. Ajo nuk është një ishull që nuk e prek e liga, por një organizëm i gjallë që reflekton nga gabimet dhe projekton sukses për të gjithë shoqërinë shqiptare. PS, e djeshme dhe e sotme është puna për Shqipërinë e besimit, respektit dhe mundësisë për çdo shqiptar.

Mandati i tretë qeverisës është premtimi ynë për të ndërtuar Shqipërinë e dalë nga tuneli i errët i tranzicionit dhe bashkimin e saj me familjen e madhe evropiane, çka do ta bëjë Shqipërinë më të fortë, më të sigurt, më të begatë, do ta bëjë atdheun shtëpinë e premtuar të të gjithë shqiptarëve. Gëzuar Partia Socialiste! Qofsh përherë e re", shkruan Spiropali. 

Sekretari i Përgjithshëm i PS Damian Gjiknuri ka uruar të gjithë socialistët për 31-vjetorin e PS. Në urimin e tij në rrjete sociale, Gjiknuri shprehet se PS mbetet forca më demokratike e transformuese në Shqipëri.

“31VJETPS! Me urimin e përzemërt për çdo anëtar, mbështetës, drejtues e këdo që ka dhënë e vazhdon të japë një kontribut sado të vogël për Partisë Socialiste , duke dëshmuar se familja jonë politike mbetet forca më demokratike e transformuese në Shqipëri, dhe me premtimin se do vazhdojmë përpjekjen që PS të bëhet më e mirë, më e fortë për të gjithë, ju uroj një ditë të mbarë”, nënvizon Sekretari i Përgjithshëm i PS, Damian Gjiknuri.

Kryetari i Bashkisë së Tiranës Erion Veliaj ka uruar të gjithë socialistët për 31-vjetorin e themelimit të PS. Përmes një postimi në rrjete sociale ku duket me kurriz kryeministri Edi Rama, Veliaj i cili është dhe drejtues politik i PS për qarkun e Tiranës, thekson se PS është forca që po transformon Shqipërinë dhe Tiranën.

“Gëzuar Ditëlindjen. Partia Socialiste, forca që po transformon Shqipërinë dhe Tiranën. Mirënjohje çdo socialisti të thjeshtë, që i jep energji dhe përkushtim, që punët të ecin përpara. #31VJETPS”, shkruan Veliaj.

Kryetari i Grupit Parlamentar të Partisë Socialiste Taulant Balla ka ndarë në rrjetet sociale një mesazh urimi në 31-vjetorin e krijimit të PS. Balla ka shprehur mirënjohjen e tij ndaj themeluesve kurajozë dhe të gjithë kontributorëve ndër vite, të cilët i dhanë Shqipërisë forcën politike më të madhe, më atdhetare, gjithmonë e hapur, gjithmonë progresiste e moderne, e cila promovon në Shqipëri vlerat më të mira social-demokrate europiane.

"Gëzuar Ditëlindjen e 31 të Partisë Socialiste. Mirënjohje themeluesve kurajozë, të gjithë kontributorëve ndër vite, të cilët i dhanë Shqipërisë forcën politike më të madhe, më atdhetare, gjithmonë e hapur, gjithmonë progresiste e moderne, e cila promovon në Shqipëri vlerat më të mira social-demokrate europiane. Mirënjohje anëtarëve, patronazhistëve, simpatizantëve dhe çdo votuesi në këtë ditëlindje të famijes sonë të madhe. GËZUAR!" - shkruan Balla.

Ministrja e Arsimit dhe Sportit Evis Kushi ka shprehur urimin e përzemërt në përvjetorin e Partisë Socialiste, duke zgjedhur një personazh të spikatur, z. Musa Ulqini, të cilin e konsideron një njeri të denjë, themelues dhe kontribues brenda kësaj partie. 

"Këtë 12 qershor festojmë përvjetorin e 31-të të Partisë Socialiste. Është dita kur duhet të shprehim mirënjohje ndaj të gjithë themeluesve dhe kontribuesve ndër vite në këtë forcë politike progresiste, më e madhja e më frymëzuesja në vend.

Unë zgjodha të uroj festën sot së bashku me një njeri të denjë, simbol i PS, themelues i PS dhe kontribues i pandalshëm që në ditën e parë të saj.
Jam e lumtur që sot Musai është krahu im i djathtë, pjesë e ekipit në Ministrinë e Arsimit dhe Sportit, për të jetësuar reformat që kjo forcë politike po i përparon çdo ditë e më shumë", shkruan Kushi.

Në përfundim të mesazhit të saj për këtë ditë Kushi shpreh mirënjohje për të gjithë socialistët e thjeshtë, kudo që ndodhen, në Elbasan e në të gjithë Shqipërinë.