Sekretari socialist theksoi gjatë një deklarate për shtyp se bilanci i qeverisjes Berisha në turizës është i hidhur. “Pushuesit e vizitorët ankohen për mungesën e ujit të pijshëm, pushuesit e vizitorët ankohen për mungesën e kanalizimeve, pushuesit e vizitorë ankohen për mungesën e energjisë elektrike, pushuesit e vizitorët ankohen për mbeturinat e kudondodhura, ndërsa Sali Berisha ne mes të sezonit turistik u bëri dhuratë lejet për import plehrash”, tha Beqaj.
Sipas tij, “ky është sezoni turistik ku shqiptarëve i ndalohet të lundrojnë në detin e tyre, ndërsa Sali Berisha refuzon të diskutojë propozimin e deputetëve socialistë për çlirimin e detit nga moratoriumi. Ky është sezoni turistik me aksidentet vdekjeprurëse në rrugët e Shqipërisë më të larta në vitet e fundit. Ky është sezoni turistik me plaçkitje të turistëve dhe me tritol të vendosur në operatorët turistikë. Ky është sezoni turistik i parqeve kombëtare që digjen. Të gjithë qytetarët e Tiranës po shohin prej dy ditësh se po digjet faqja perëndimore e malit të Priskës, ndërsa Kryeministria është e zënë me transmetimin e rekordeve të Sali Olimpikut”.
Beqaj akuzoi se territoret ku pritet të zhvillohet turizmi shqiptar, aktualisht janë pushtuar nga “orgjia e ndërtimeve pa leje e pa plan”. “I vetmi investim në turizëm këtë verë është vila qeveritare në Vlorë. Të gjithë shqiptarët e panë dje se si shpërdorohen paratë e tyre, ndërsa qeveria është e interesuar vetëm për turizmin e vet”, theksoi sekretari për Programin në PS.
Por “ka një lajm të mirë për shqiptarët: kjo është vera e fundit në sundimin e pushtetit të Saliut. Verën e ardhshme vendi do të drejtohet nga qeverisja e Partisë Socialiste. Ne kemi një plan për rilindjen e turizmit shqiptar. Është pjesë e planit tonë për rimëkëmbjen e ekonomisë si domosdoshmëri për rilindjen e Shqipërisë", përfundoi ai.
(im/shqiptarja.com)
![](https://www.shqiptarja.com/template/img/sh_logo1.png)