PS: Tre ‘të pavarurit’ që u zgjodhën në PD

TIRANË- Partia Socialiste, përmes deputetes Blerina Gjylameti, ironizoi sot zgjedhjen në poste kyçe të Partisë Demokratike, të tre ish-zyrtarëve, që deri dje kanë drejtuar institucione të pavarura.
"Ish-kryetarja e Autoritetit të Medias Audiovizive(AMA), Endira Bushati, që në muajt e fundit ishte kthyer në simbolin e institucionit të pavarur nga politika, doli që paska qenë aq e lidhur me pushtetin e deridjeshëm, sa vetëm një javë pasi u zëvendësua nga kryetari i ri i AMA-s, ajo zgjidhet në kryesinë e PD-së, madje emërohet drejtuese e Departamentit të Administratës Civile", deklaroi Gjylameti.
Sipas saj, në garën për kryesinë e PS-së, ishte dhe ish-organizatorja e grevës së urisë së të larguarve nga administrata në vitin 2013, Nertila Qafëzezi.
Deklarata e PS-së ironizonte gjithashtu zgjedhjen në postin e sekretarit të përgjithshëm të PD-së, të Arben Ristanit, ish-kryetar i KQZ-së. "Të gjithë i mbajnë mend zgjedhjet e viti 2009 dhe ato të vitit 2011. Personazhi më i famshëm i KQZ-së në ato vite, Arben Ristani, tentonte të hiqej i pavarur, në krye të një institucioni që kushtetuta e kërkon të pavarur. Në vitin 2009 çertifikoi vjedhjen e votave që mbajti Sali Berishën Kryeministër, kurse në 2011-n vodhi votat që ngjitën në vendin e Kryetarit të Bashkisë së Tiranës, Lulzim Bashën. Sot, ish Kryetari i pavarur i KQZ-së së pavarur është zgjedhur numri dy i Partisë Demokratike. Dhe personat që falenderoi publikisht janë pikërisht ata të cilëve i shërbeu duke vjedhur votat, Berishës në 2009 dhe Bashës në 2011?, u shpreh deputetja Gjylameti.
Ajo përmendi dhe zgjedhjen në Kryesinë e PD-së të bashkëshortit të Argita Berishës, ndërsa për anëtarin e Këshillit Mbikëqyrës të Bankës së Shqipërisë, Petraq Milo, tha se e humbi garën për të qenë drejtues departamenti në PD. /ATSH/

TAG:
• kqz