Pushteti vendor/ Bashkitë jëpin më shumë leje ndërtimi, por kanë më pak të ardhura

Edhe pse bashkitë kanë dhënë më shumë leje ndërtimi gjatë vitit 2018, të ardhurat që ato kanë siguruar nga taksa e ndikimit në infrastrukturë, që janë pagesat që bëjnë firmat, kanë pësuar rënie.

Sipas raportit të Financave Vendore, (www.financatvendore.al) publikuar nga Coplan dhe Ministria e Financave rezulton se pas një rritje të theksuar në vitin 2017, të hyrat nga kjo taksë shënuan një nivel prej rreth 3.7 miliardë lekë, me rënie 15.7% në terma vjetorë. Ekspertët e raportit shpjegojnë se ndonëse në nivel disi më të ulët, të ardhurat nga kjo taksë përfaqësojnë një burim të rëndësishëm të ardhurash për bashkitë në vend.

Në nivel bashkie, rënia e të ardhurave nga taksa e ndikimit në infrastrukturë u udhëhoq nga Bashkia Tiranë e cila ka mbledhur rreth 674.8 milionë lekë më pak se e njëjta periudhë e vitit të kaluar. Tkurrje e fortë ka edhe në Bashkinë Durrës, ku të ardhurat nga taksa e ndikimit në infrastrukturë rezultojnë të jenë ulur ndjeshëm krahasuar me nivelin e shënuar në nëntëmujorin e vitit 2017, përkatësisht nga rreth 314.6 milionë lekë në rreth 176.8 milionë lekë.

TAG:
• pushteti vendor
• leje ndertimi