Në konferencën mbi 3-orëshe të fundvitit, Kryeministri Rama, siç edhe vetë e kishte parashikuar, nuk mund t’i shpëtonte pyetjeve për kryetemën e vitit, punën e SPAK.

“SPAK nuk është opozita e qeverisë por një institucion i ri i krijuar nga vullneti I kësaj force qeverisëse, i mbështetur nga kjo forcë qeverisëse, I garantuar nga kjo forcë qeverisëse. Nuk është opozita e qeverisë por depresioni i thellë në të cilën ndodhet opozita politike bën që puna e SPAK të bëhet e vetmja pikë referimi e opozitës depresive për të goditur qeverinë”, tha Rama.

Megjithatë sipas kreut të qeverisë problemet janë aty dhe më madhori, që duhet të jetë çështje e gjithë shoqërisë tha është situata me paraburgimin në vend.

“Këshilli i Evropës është alarmuar, për burgosjen e njerëzve pa gjyq.... Ne kemi 4492 qytetarë në burgjet shqiptare. A e besoni dot ju që nga këta vetëm 1895 janë të dënuar? Çfarë është kjo? Nuk po hyj tek tjetra. Jemi vendi më skandaloz i Këshillit të Evropës për nivelin e dënimeve”, u shpreh kryeministri.

Për këtë paralajmëroi prekje të ligjeve të drejtësisë.

“Për paraburgimin një herë sigurisht që ka nevojë për ndërhyrje. Nuk mund të jem kryeministri i një vendi që ka më shumë të paraburgosur sesa të dënuar dhe të rri pa folur se thoni ju se e tha këtë për të dalë atje”, theksoi kreu i qeverisë

37 janë rastet që SPAK ka akuzuar zyrtarët e lartë të qeverisjes së tij, me 80% të tyre që i përkasin mandatit të parë e të dytë tha Rama. Ndryshe nga siç pretendohet u shpreh kreu i qeverisë akuzat e korrupsionit janë shumë pak, dhe këtu tha se duhet riparë edhe neni i ‘shpërdorimit të detyrës’ që cenon pavarësinë e ekzekutivit për vendimmarrje, duke marrë një shembull konkret.

“Kryetari i bashkisë të Fushë-Arrësit ka hapur një rrugë për komunitetin, ku janë prerë disa pemë. Nuk e di numrin e tyre. Ka bërë burg për prerje pemësh. Jo se të presësh pemë, nuk është krim, por pa iu lodhur me detaje, rasti është turp. BE ka dalë një direktivë e re për ta riparë këtë nocion (shpërdorimin e detyrës). Pavarësia e një kryeministri, ministri, funksionari të lartë, është pavarësia për të marrë vendim. S’vjen dot një prokuror të thotë pse e vendose kështu dhe jo ashtu. Kjo është një katastrofë dhe kjo ka ndodhur.  Nëse vendimi im ka një prapavijë të qëllimshme për të përfituar në mënyrë të paligjshme apo për të sjellë një dëm, është pavarësia e drejtësisë që vjen te unë, këtu ndahen këto”, u shpreh kryeministri Edi Rama.

Edhe pabarazia në tendera është një akuzë që nuk lidhet me korrupsionin tha Rama, pas pyetjes për dosjen Balluku.

“Ka dhe raste të tjera që nuk kanë lidhje me korrupsionin fare, asgjëkundi dhe që hyjnë tek këto raste dhe nuk po dua t’i komentoj. Ka dhe raste të tjera që lidhen me pabarazinë në tendera. Pabarazia në tendera është vepër tjetër, nuk është korrupsion, është tjetër”, pohoi Rama

Këtu një përgjigje e dha edhe për mesazhet e publikuara, për të cilat nuk ia kurseu kritikat SPAK-ut.

“Qëkur mesazhet janë prova? Dhe qëkur janë ushqim për mediat. Dhe kur mbi bazë mesazhesh bëhen gjyqe si në kohën e gjuetisë së shtrigave....Loja e disave brenda SPAK-ut, që s’kam parë asnjë hetim, se është vepër penale të nxjerrësh të dhënat nga dosja”, tha kryeministri.

Rreziku nëse nuk ndërhyhet në këtë situatë, sipas Kryeministrit është shumë i madh.

“Që kura të bëhet me e rëndë se sëmundja, nuk mund të presim që kjo të ndodhë. Mund të ndodhë për shembull që vendi të humbë 10% të GDP-së. Mund të ndodhë për shembull që biznesmenë të mos vijnë se mund të thonë ku i dihet çfarë ndodh”, theksoi kreu i qeverisë.

Lidhur me reformat e tjera, atë zgjedhore dhe territoriale, komisionet e të cilave PD i ka bojkotuar Rama ka këtë përgjigje për kundërshtarët politikë.

“Gjithmonë e kanë pasur derën hapur. Por neve nuk na merr kush peng. Ne punën do ta bëjmë me ata ose pa ata”, u shoreh Rama në konferencën e fundvitit.